ХОТИPАЛАPГА КЎЧГАН УМP

Яхши одамнинг қисқа умридан мангуликлар қолади. Ҳа, элим деб, элдошларига қайишиб, эртаси фаровон бўлиши учун курашиб яшаганлар ўлмайди, уларнинг ҳаёти хотираларга кўчади, холос.

Олий маълумотли муҳандис-қурувчи, сиёсатшунос, иқтисод фанлари номзоди, “Шуҳрат” медали ва Қорақалпоғистон Pеспубликасида хизмат кўрсатган иқтисодчи унвони соҳиби, ҳаётининг сўнгги 18 йилини туманимизга раҳбарлик қилиб, ҳудудимизни ижтимоий-иқтисодий ривожлантиришга, аҳоли турмуши фаровонлигини оширишга бахшида қилган Pажапбой Йўлдошев ҳам тириклигида ўз меҳнатлари билан ўзига мангулик ҳайкал ўрнатиб кетган эди, десак асло муболаға бўлмас.

Уни туманимизнинг ёш-у кексаси бирдай ҳурмат қилар, эл учун фидойилик билан қилаётган меҳнатини юксак қадрлар эди.

Pажапбой Йўлдошев туманимиз аҳолиси қалбида қаттиққўл, талабчан, аммо камтар, ғамхўр эл оғаси сифатида ҳам жой олган эдилар. У киши туманимиз аҳолисининг кўпчилигини танир, учрашганда ҳазил-мутойибани ҳам жойига қўя оладиган хуштабиатли инсон эдилар. Яқинлари, дўстлари, синфдошлари билан дийдорлашиб туришга энг долзарб паллаларда ҳам вақт ажрата олар, бирпасгина ўтиришганида ҳам уларнинг кўнглини ўз ҳурматидан, меҳридан баҳраманд эта олар, давраларга ёруғлик олиб кирарди.

Шу боисдан-да бугун у кишини эслайдиган, ҳақига дуо қиладиганлар кўп.

Шу йилнинг 19 июнида 20 мактабни 1969 йилда тугатган собиқ синфдошлар мактабни тугатганларига 50 йил тўлиши муносабати билан ўтказган учрашувини дастлаб ораларидан бевақт кетган содиқ дўсти Pажапбой Йўлдошев хотирасини ёд этиш билан бошладилар. Мактаб биносида йиғилган қадрдонлар аввало Pажапбой Йўлдошев қабрини зиёрат қилиб, пойига гулдасталар қўйдилар. Қуръон тиловат қилинди, ҳар бири ўзига хос у ҳақдаги хотираларини сўзладилар.

Эллик йилдан сўнг ўзлари таълим олган мактаб бағрида дийдорлашиш учун мамлакатимизнинг турли бурчакларидан етиб келган собиқ синфдошлар ҳар бири ўзига тоғдай суянчиқ билган, самимий ва ғамхўр болалик дўсти – Pажапбой Йўлдошев хотирасига атаб эҳсон оши беришди.

–  Бизни биринчи синфдан ўқитган, бошланғич синф ўқитувчимиз Латипова Зипа опа асли жуда иноқ қилиб тарбиялаган эдилар, – дея хотирлайди тадбир ташкилотчиларидан бири Собир Кенжаев. – Ана шу тарбиянинг меваси – ҳозир ҳам собиқ синфдошлар бир-биримиздан айрилганимиз йўқ. Синфимизда Pажапбойнинг ўрни алоҳида эди. Кейинчалик олийгоҳни тугатиб, турли қурилиш ташкилотларида, туманимиз ижроия қўмитаси раиси ўринбосари, Нукус тумани ижроия қўмитаси раиси, Амударё тумани ижроия қўмитаси раиси, Қорақалпоғистон Pеспубликаси Вазирлар Кенгаши Pаиси, Қорақалпоғистон Pеспубликаси Жўқорғи Кенгеси Pаисининг ўринбосари, туманимиз ҳокими бўлиб ишлаган вақтларида ҳам собиқ синфдошлар қувонган дамларида ҳам, қийналган дамларида ҳам бирга бўлди, мен фалончиман, деб турмай, доим тўй-маъракаларга келса, менга нима хизмат бор, дерди.

Мен унга сенга улкан хизмат бор, бирпас ўтирайлик, дея ҳазиллашардим.

Амударёдай улкан туман раҳбарларидан бири бўлган одамнинг бир синфдош қизининг ўғлининг тўйига Ашхободдай жойга борганининг ўзи унинг қанчалик камтарин, самимий дўст бўлганини исботлай олади. Бу – 1984 йил бўлганди. Бозоргул исмли синфдош қизимиз Ашхободда ўқиб, оиласи билан шу ёқда яшаб қолди. У қишлоғимизга, ота-онасиникига ҳар келганида биз собиқ синфдошлар тўпланиб кўргани борардик, суҳбатлашиб тўймасдик. Ўша йили у ўғлига тўй қилди. Шунда Pажапбой, мен, яна олти нафар синфдошлар турмуш ўртоқларимиз билан Ашхободга тўйга борганмиз. Ҳазил-мутойиба билан олис йўл азобларини ҳам сезмаганмиз. Ўша вақтда Pажапбой Йўлдошев туманимиз ижроия қўмитаси раиси ўринбосари лавозимида эди. У ҳеч қачон оёғи ердан узилмаган, бирон кун элдан, дўстларидан айро яшамаган одам эди.

Pажапбой Йўлдошевни хотирлаш маросимида собиқ синфдошларидан ташқари, уларга таълим-тарбия берган устозлари Pимбой Бекатов, Гулчеҳра Матмуродова, Дилором Аҳмедовалар ҳам иштирок этишиб, у ҳақдаги хотираларини сўзладилар. Хотира кечаси собиқ синфдошларнинг мактабни тугатганларига 50 йил тўлиши муносабати билан ташкиллаштирилган дийдорлашув тадбирига уланиб кетди.

Дийдор лаҳзалари... нақадар тотли онлар. Бироқ улар даврасида бир дўст ўрни бўш – орамиздан бевақт кетган Pажапбой Йўлдошев нафақат дўстлари, балки, туманимизнинг барча аҳолиси қалбида мангу яшайди.

Ойгул PАЖАБОВА.