ОИЛАНИ АСРАНГ
Баҳорда экилган ниҳол ёз жазирамасида тобланиб, кузнинг муздек шамолларига дош берсагина, қаҳратон қишнинг қорли совуқларига чидай олади. Худди шундай икки ёш бир-бирини эмас, аксинча ўз мақсадини, яъни ўзини ҳурмат қилса, ҳаёт тўсиқларини мардона енгиб ўтади. Турмуш муштига дош бера олмаган эркак ёки хотин ажрашиш туфайли бошқа муҳит, бекам-кўст турмуш ўртоқ, тортишувсиз оила топа оладими? Қаҳратон қиш совуғи чилласига чидай олган ниҳол яна баҳор юзини кўради. Худди шундай, турмушдаги толиқиш, кўп меҳнат қилиб, кам дам олиш сабабли жаҳл ва асабийликни енгиш билан оилани сақлаб қолиш мумкин.
Аввал меҳнат, бошқарув, мослашув ва сўнгги ўринда ҳиссиёт шаклланади. Аввалги ҳиссиёт ўрнини вояга етган ҳиссиёт, ҳурмат, фидойилик, тушуниш, келишув эгаллайди. Вояга етган ҳиссиётнинг болалик ҳиссиётидан фарқи – кутмайди. Кутиш психологияси бу кучсизлик психологиясидир. Меҳр кутилмайди, берилади. Сабр қилиш сўралмайди, ўзи сабр қилади. Тарбиялаш билан шуғулланилмайди, инсон ўзини тарбиялаш билан банд бўлади. Бу энг кучли инсонларга хос сифатлар бўлиб, шу сифатлар шаклланиши орқали болани ҳам тарбиялаш замини яратилади. Фарзанд отадан жаҳлни енгишни, ғайрат билан мақсадга етишни, эрта уйғонишни, ўз гапига жавоб бера олишни, бўйсунишни, раҳбарнинг қарорларини пухта бажаришни, меҳр беришни, қийинчиликларни сабр билан енгишни ўрганади. Болангизни тарбиялаш турмуш ўртоғингизни тарбиялаш эмас, ўзингизни тарбиялашдир. Фақат ва фақат ўзингизни тарбиялаш орқали оилангизни асрай оласиз. Оилангизни асранг, азизлар!
Ҳ.АБДУРАҲМОНОВА,
“Оила” маркази туман бўлими мутахассиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
