6-СОНЛИ МАКТАБ СОБИҚ ЎҚУВЧИСИ МАКТАБ КУТУБХОНАСИГА БАДИИЙ АСАРЛАР ТАҚДИМ ЭТДИ

Ёшларнинг айниқса таълим муассасалари ўқувчиларининг бўш вақтларини мазмунли ўтказишларига эришиш учун китоб мутолаасига кенг жалб қилиш, мутолаа маданиятини ошириш шу баробарида уларни ёт ғоялардан, мафкура майдонининг хуружларидан ишончли ҳимоя қилиш – асосий вазифалардан ҳисобланади.

Маълумки, ўқувчи-ёшлар аҳолининг бўш вақти энг кўп қатлами ҳисобланар экан. Шу боисдан ҳам мамлакатимизда фаолият юритаётган барча таълим муассасаларида бадиий адабиётлар жамланган кутубхоналар мавжуд.

Туманимиздаги 6-сонли умумтаълим мактабида ўқувчи-ёшларнинг ўқишдан бўш вақтларида мутолаа қилишлари учун 350 тадан кўпроқ бадиий адабиётлар мавжуд. Мактабнинг собиқ битирувчиси, туман Мактабгача таълим бўлими мудири Ўктам Қўшназаров синфдошларининг мактабни битирганларига 20 йил тўлиши муносабати билан ўтказилган учрашувида 35 та ўзбек адабиётининг дурдона асарларини мактаб кутубхонасига совға қилганида ўқувчилар беҳад севинишган эди.

Яқинда, Наврўз байрами арафасида мактабнинг яна бир собиқ ўқувчиси, Ўзбекистон Ёзувчилар уюшмаси поликлиникаси бош шифокори Анвар Ражабов мактаб ўқитувчилари, ўқувчилари учун ажойиб туҳфа қилди. Бу туҳфани ҳеч қандай моддий бойликка қиёслаб бўлмайди. Яъни Анвар Ражабов ўз ҳисобидан 204 та турли мавзудаги бадиий адабиётларни мактаб кутубхонасига топширди. Шунингдек, таниқли адиб, Ўзбекистон халқ ёзувчиси, Давлат мукофоти лауреати Муҳаммад Али томонидан берилган 30 та, Муҳаммад Юсуф номидаги жамоат фонди раиси, Муҳаммад Юсуфнинг рафиқаси Назира ас-Салом тақдим этган 25 та китобини адибларнинг ўқувчиларга тилаклари битилган хатлари билан бирга топширди.

Ушбу тадбир мактабда байрам тусини олди.

Мактаб директори Матқурбон Ражабов мактабнинг собиқ ўқувчиси Анвар Ражабовга ушбу хайрли иши учун мактаб ўқитувчилари, ўқувчилари номидан чуқур миннатдорчилик билдирди.

А.Нафасов,

О.Ражабова.