ҲУҚУҚИЙ МАДАНИЯТ ВА ОИЛА МУҚАДДАСЛИГИ ТАРҒИБ ЭТИЛМОҚДА

Аҳолининг ҳуқуқий онги ва маданиятини юксалтиришга шу вақтгача ҳуқуқни муҳофаза қилувчи органлар, давлат идоралари шуғулланади, деган қараш ҳукм суриб келди.

Муҳтарам Юртбошимизнинг 2019 йил 9 январдаги “Жамиятда ҳуқуқий онг ва ҳуқуқий маданиятни юксалтириш тизимини тубдан такомиллаштириш тўғрисида”ги Фармонида бу борадаги камчиликларни бартараф этиш, ҳар бир шахсда қонунларга ва одоб-ахлоқ қоидаларига ҳурмат, миллий қадриятларга садоқат, ҳуқуқбузарликларга нисбатан муросасизлик ҳиссини уйғотиш йўл-йўриқлари кўрсатиб берилди. Жамиятда ҳуқуқий онг ва ҳуқуқий маданиятни юксалтиришда таълим-тарбиянинг тизимли ва узвий равишда олиб борилишига эътибор қаратиш, мактабгача тълим тизимидан бошлаб, аҳолининг барча қатламларига бу борадаги билимларни чуқур сингдириш вазифа қилиб қўйилди. Президентимизнинг мазкур Фармони ва 2018 йил 2 февралдаги “Хотин-қизларни қўллаб-қувватлаш ва оила институтини мустаҳкамлаш соҳасидаги фаолиятини тубдан такомиллаштириш чора-тадбирлари тўғрисида”ги Фармони ижросини таъминлаш мақсадида Ўзбекистон Республикаси Вазирлар Маҳкамаси ҳузуридаги “Оила” илмий-амалий тадқиқот марказининг 2019 йил 11 январь кунги Фармоийишига мувофиқ бутун мамлакатимиз бўйлаб 2019 йилнинг 25 январидан 5 февралига қадар “Фаровон оила – жамият равнақининг асоси” мавзусида тарғибот ўнкунлиги ўтказилмоқда.

Ўнкунлик доирасида аҳолининг, айниқса ёшларнинг ҳуқуқий билимини ошириш, ўзбекона урф-одатларимизга, амалдаги қонунларимизга ҳурмат ҳиссини тарбиялаш, оила, ота-оналик, фуқаролик масъулиятини тарғиб этиш мақсадида кўплаб тарғибот тадбирларини ўтказиш вазифа қилиб қўйилган.

Ўнкунлик доирасида туманимиздаги “Оила” маркази томонидан ҳам кўплаб чора-тадбирлар амалга оширилаяпти. Хусусан, Чордара, Бойовул маҳаллаларида, Бўзёп овулида, Манғит Иқтисод коллежида, туман Тиббиёт бирлашмасида “Соғлом оила – соғлом жамият”, “Оила жамият ва давлат ҳимоясида”, “Миллий қадриятларимизнинг ҳаётимиздаги ўрни ва аҳамияти”, “Бахтли оила тушунчаси” каби мавзуларда тарғибот тадбирлари ўтказилди.

31 январь куни 13-сонли мактабда ҳам шу каби тадбир ўтказилиб, унда мактаб ўқитувчилари, юқори синф ўқувчилари иштирок этдилар. “Миллий қадриятларимизнинг ҳаётимиздаги ўрни ва аҳамияти” мавзусидаги тадбирни мактаб директори Мурдбой Ҳайбуллаев очди ва олиб борди. Тадбир иштирокчилари “Оила” маркази туман бўлими раҳбари Гулшод Юсупова, Ўзбекистон Миллий тикланиш демократик партияси туман Кенгаши раиси Ширин Янгибоева, ҳудуд профилактика инспектори Мингбой Сайнетуллаев, туман Тиббиёт бирлашмаси шифокори Гуландом Оллоқуловаларнинг кун тартибидаги мавзу юзасидан маърузаларини тингладилар. Шунингдек, ўқувчи – ёшлар ҳам ўз фикрларини билдирдилар.

Шу куни “Боғ” маҳалласи аҳолиси, фаоллари билан ҳам бахтли оила қуриш, оилавий ажримларнинг олдини олишда нуроний кексаларнинг ҳаётий сабоқларидан ўрнак олишнинг аҳамиятини, оила муқаддаслигини тарғиб этишга бағишланган тадбир ўтказилди.

– Ҳали ўн кунлик доирасида ўтказилиши режалаштирилган тадбирларимиз кўп, - дейди “Оила” маркази туман бўлими раҳбари Гулшод Юсупова.

Жамият равнақи, бахтиёр турмуш тарзига эришиш учун аҳоли, айниқса ёшларнинг ҳуқуқий онги ва маданиятини юксалтириш борасидаги бу каби саъй-ҳаракатлар келгусида ўз самарасини беради, албатта.

Ойгул РАЖАБОВА.