Янгиликлар, воқеалар, хабарлар

Душанба - нуронийлар куни

Душанба - "Олмазор" маҳалласида фаолият юритаётган "Саломатлик" сектори иш режасида "Нуронийлар куни" дея белгиланганлигига кўра, мазкур сектор раҳбари, ҳудуд шифокори Наргиза Йўлдошева ва диний маърифат, маънавий-аҳлоқий тарбия масалалари бўйича маслаҳатчи Гулнора Ўрозбоевалар кекса отахон Ўтамурод Мамутов, онахонлар Холбика Авазбоева, Малика Бозорбоеваларнинг хонадонларида бўлиб, соғлигини назоратдан ўтказишди. Саломатлигини асраш, дори-дармонларни қандай қабул қилиш кераклиги тўғрисида тавсиялар бердилар.

Шўр ювиш қизғин

Қипчоқ овулидаги фермер хўжаликлари 2013 йилни барча соҳалар бўйича муваффақиятли якунладилар. Айни кунларда ҳосилдан бўшаган, сифатли шудгор қилинган далаларда шўр ювиш ишлари жадал суръатларда олиб борилмоқда. 1136 гектар ер бир марта сифатли суғорилган бўлса, 600 гектардан зиёд майдон иккинчи марта суғорилди.

Ижодкорлар учрашуви

Шу йилнинг 27 декабрида Қорақалпоғистонда хизмат кўрсатган фахрийжурналист Саъдулла Хўжаниёзов ташаббуси билан туманимизда яшаб, ижод қилаётган шеърият ихлосмандларининг учрашуви бўлиб ўтди.

Учрашувда ижодкорлар ўз ижодларидан намуналар ўқидилар, фикрлашдилар.

Учрашув ҳаваскор-ижодкорларга кўтаринки кайфият улашди.

Ёш қаламкашлар тақдирланди

Ёш ижодкорларни қўллаб-қувватлаш, уларнинг ижодий қобилиятларини ўстириш, "Обод турмуш йили" Давлат Дастурини амалга ошириш жараёнидаги халқимизнинг фидойи меҳнатларини кенг тарғиб қилиш мақсадида 2013 йил бошида "Тараққиёт кўзгуси" газетаси таҳририяти томонидан "Обод турмуш - эзгу мақсадимиз" танлови эълон қилинган эди.

Шу йилнинг 7 январь куни "Тараққиёт кўзгуси" газетаси таҳририятида танловда фаол иштирок этган ёш ижодкорларни тақдирлаш маросими бўлиб ўтди.

Нукус Давлат педагогика институтининг 4-босқич талабаси Феруза Раззоқова танлов ғолиби деб топилди ва 1-даражали диплом билан тақдирланди. Манғит иқтисодиёт касб-ҳунар коллежи талабаси Азиза Мадраҳимова иккинчи, Нукус Давлат педагогика институти талабаси Муҳаббат Собирова учинчи даражали дипломлар ва эсдалик совғалари билан тақдирландилар.

Ғолибларни тақдирлаш маросимида газета муҳаррири Ғ.Ешниёзов, журналистлардан А.Жуманиёзов, О.Ражабова, Р.Йўлдошева, О.Худойберганова ва "Баркамол авлод" болалар маркази мутахассиси З.Оллоёровалар сўзга чиқишиб, ёш ижодкорларга мувоффақиятлар тиладилар. Ўз навбатида ёш қаламкашлар ўз ижод намуналаридан ўқиб бердилар.

Билимлар беллашуви

7 январь куни туманимиздаги умумтаълим мактабларининг 9-синф ўқувчилари орасида фанлар олимпиадасининг туман босқичи бўлиб ўтди. Олимпиадада 76 та мактабдан, ҳудуд босқичида ғолибликни қўлга киритган 256 нафар ўқувчи қатнашди. 8-9 январь кунлари эса 5-8 синфлар ўртасида "Билимлар беллашуви" туман босқичи бўлиб ўтди. Унда олдинги босқичда ғолиб бўлган 511 нафар ўқувчи иштирок этиб, билимларини синовдан ўтказдилар.

"Ҳаракат хавфсизлиги ойлиги” давом этмоқда

Ўзбекистон Республикаси Вазирлар Маҳкамасининг 2013 йил 4 декабрдаги 825-ф-сонли фармойишига асосан Мамлакатимизнинг барча жойларидаги каби бизнинг туманимизда ҳам "Ҳаракат хавфсизлиги ойлиги" тадбирлари ўтказилмоқда.

2013 йилнинг 15 декабридан шу кунгача туман ИИБАМТВТХУФМКАКНЭ бўлинмаси томонидан туман давлат солиқ инспекцияси билан ҳамкорликда 6 та махсус рейдлар ўтказилди, бир қанча йўловчи ташиш билан шуғулланувчи уюшмаларда ҳайдовчилар ўртасида тушунтириш - тарғибот ишлари олиб борилди.

Бундай тадбирлар меҳнат жамоаларида ва барча таълим муассасаларида ҳам ўтказилмоқда.