85 та объект ва 135 хонадон ИИБ Қўриқлаш бўлимининг техник қўриқлаш пункти томонидан ишончли қўриқланмоқда

Туман ИИБ Қўриқлаш бўлими ходимлари корхона ва ташкилотларда, мактабларда, мактабгача таълим муассасалари ва маҳаллаларда қўриқлаш хизмати бўйича тарғибот-ташвиқот ишларини самарали ўтказиб келишмоқда. Қўриққа олинган объект ва хонадонлар сонини кўпайтириш, хизмат самарадорлигини ошириб бориш мақсадида аҳолига қўриқлаш хизматининг турлари, афзалликлари ва ундан фойдаланиш қулайликлари тўғрисида кенг тушунча берилмоқда. Таъкидлаш керакки, янгидан аҳоли хонадонлари ва тадбиркорлик объектларини қўриққа олиш жараёнида ушбу жойларга ўрнатиладиган сигнализация воситалари бепул ўрнатилиб берилаётгани ҳамда хонадон соҳибларидан ойлик хизмат ҳақидан бошқа ҳеч қандай тўлов талаб этилмаслиги фойдаланувчиларга жуда қулай бўлмоқда. Шахсий иморатлар, мол-мулклар, моддий бойликлар қаторида фуқароларнинг хавфсизлиги ҳам таъминланиб, жиноятчилик ва кўнгилсиз ҳодисалар юз беришининг олди олинмоқда.

Қўриқлаш нарядлари томонидан олиб борилаётган ишлар натижасида бугунги кунга қадар қўриқдаги объект ва хонадонларнинг биронтасида ўғирлик ва бошқа кўнгилсиз ҳодисалар юз бермади. Ишончли қўриқланишни таъминлаш мақсадида техник қўриқлаш пункти тезкор ҳаракатланувчи гуруҳи нарядлари томонидан тунда ҳам қўриқдаги объектлар жойлашган ҳудудлар хизмат автотранспортида мунтазам назорат қилинмоқда. Ундан ташқари, қўриқдаги объектларга видеокузатув, қўриқлаш ҳамда ёнғиндан хабар берувчи сигнализация, “ташвиш” тугмаларини ўрнатиш бўйича комплекс чора-тадбирлар амалга оширилмоқда.

Овул ва маҳаллаларда аҳоли ўртасида ўтказилаётган учрашувларда ҳам қўриқлаш хизматидан фойдаланишнинг афзалликлари, қулайликлари кенг тушунтирилаётганлиги натижасида қўриқдаги объектлар сони кўпайди ва бугунги кунда жами 85 та объект ва 135 хонадон ИИБ Қўриқлаш бўлимининг техник қўриқлаш пункти ва ходимлари томонидан ишончли қўриқланиб келинмоқда. Янгидан қўриққа олинган объектларга ички ва ташқи томонида содир этилаётган ҳар хил ҳаракатларни кузатиб турувчи видеокузатув камералари ўрнатилди. Мазкур объектларда содир бўлиши мумкин бўлган фавқулодда вазиятларнинг олдини олиш ва уларнинг техник жиҳатдан мустаҳкамлигини ўз вақтида назорат қилиб бориш ва бўлим шахсий таркибининг жанговар тайёргарлигини ошириш мақсадида бугунги кунгача 55 маротаба “Ташвиш” амалий-тактик ўқув машғулотлари ўтказилди.

Мақсадимиз – бизга ишониб топширилган давлат, жамоат ҳамда фуқароларнинг шахсий мулкини ишончли қўриқлаш ва турли кўнгилсиз ҳодисаларнинг олдини олиб, аҳоли тинчлиги, хавфсизлигини таъминлашдир.

Матназар Дуйсенбоев,

туман ИИБ Қўриқлаш бўлимининг

техник қўриқлаш пункти бошлиғи.