БИРИ-БИРИГА ЕЛКАДОШ ИНСОНЛАР

Ватан тараққиётида оиланинг, маҳалланинг роли муҳим аҳамиятга эга эканлиги барчамизга маълум. Томчида қуёш акс этади. Томчи қандай дарёдан эканлиги ҳақида тасаввур уйғотади кишида. Оилаларнинг мамлакатимиз ва туманимиз тараққиётига қўшаётган ҳиссаларидан қувонамиз.

“Дурунки” маҳалласида яшовчи Мақсуд Йўлдошев ва Гулнора Худойбергановаларнинг оиласи ана шундай эътирофга лойиқ. Мақсуд ака Йўлдошев 1972 йилда Манғит шаҳрида, нафақадаги монтёр Мамбат Йўлдошев оиласида туғилган. Оталари Мамбат бобо Йўлдошев фарзандларини илмли қилган ва доим эл хизматида бўлган ҳурматли инсондир. Бугун ҳам “Қорақалпоғистонда хизмат кўрсатган энергетик” фахрий унвони соҳиби Мамбат бобони катта-ю кичик бирдек танийди, яхши кўриб, дуосини олишга ошиқади.

Мақсуд ака ёшлигидан физика қонунларига ниҳоятда қизиқувчанлигидан кўнглида ота касбига ҳурмат ва меҳр уйғонди. 1990-1995 йиллар давомида Тошкент Давлат темир йўллари институтининг электромеханика факультетида таҳсил олди. Ўқишни тугатиб, иш фаолиятини туман электр тармоқлари корхонасида оддий монтёрликдан бошлаган Мақсуд ака айни пайтда масъулиятли вазифада хизмат қилмоқда.

Мақсуд ака кўчат экиб, боғ яратишни яхши кўради. Айниқса, узумчиликка алоҳида меҳр қўйган. Томорқасидан унумли фойдаланиб, ҳар йили мўл ҳосил олмоқда. Чорва молларини боқиш эса энг севимли машғулотларидан бири. Мақсуд ака Йўлдошев ниҳоятда самимий ва оқ кўнгиллиги учунми, кўнгли тоза, мард инсонларни ҳурмат қилади. Қўлидан келганича эҳтиёжманд оилаларга ёрдам беради.

Илмга, маънавиятга талпингувчи, зиёли инсонларни кўнглига яқин билгувчи Мақсуд ака Йўлдошев бу йил муборак Ҳаж зиёратини адо этдилар. Оила бекаси Гулнора опа Худойберганова ҳар бир ишда Мақсуд акага кўмакдош.

Болалигидан математика фанига, ҳисоб-китоб ишлари-га меҳр қўйган Гулнора опа 1989-1994 йиллар давомида Тошкент Молия институтининг молия ва кредит факультетида ўқиб, молия соҳасининг сирларини қунт билан ўрганди.

Иш фаолиятини 2004 йил 30-сонли мактабда математика фани ўқитувчиси сифатида бошлаган опа 2007 йилдан буён Амударё қишлоқ хўжалик касб-ҳунар коллежида ўқувчиларга махсус фанлардан дарс бериб келмоқда. Кўплаб шогирдлари жамиятимизнинг турли қатламларида меҳнат қилмоқда.

– Мактаб чоғида устозимиз Гулора опа Эшимбетованинг дарсларини бутун борлиғимиз билан тинглардик, – эслайди у 16-сонли мактабда ўтган ўқувчилик йиллари ҳақида. – Талабалик давримизда эса технология фанидан дарс берувчи домламиз анча талабчан бўлиб, яхши баҳо олиш қийин эди. Дарсларига қаттиқ тайёргарлик кўрардик. Ана шундай талабчан устозларим туфайли мен ҳаётда ва оиламда бахтлиман.

Гулнора опа ниҳоятда иродали аёл. Муаммолардан қочиш эмас, ечим топишга ҳаракат қилади. Ўқувчиларига ҳам шундай таълим беради. Китоб мутолаасида бу оила жуда пешқадам.

Ишдан бўш пайтларида гуллар парвариш қилишни, кўчат экишни яхши кўрадиган Гулнора опа умр йўлдошининг ҳар бир фикрини ҳурмат қилади, қўшниларининг тўй-у ҳашамларида ҳамиша маҳалла-кўй билан бирга.

Мақсуд ака билан Гулнора опа ҳаётда бири-бирига елкадош бўлиб яшаб келишмоқда. Оиладаги соғлом муҳит фарзандлари камолида намоён. Катта қизлари Шоира 40-сонли мактабда бошланғич синф ўқитувчиси. Ўғли Отабек туман Давлат Солиқ инспекцияси ходими. Келини Моҳигул ва қизи Шоҳиста Қорақалпоқ Давлат университети талабалари. Кенжа ўғли Жасурбек эса 36-сонли мактабнинг аълочи ўқувчиси.

Мақсуд ака билан Гулнора опа уч нафар неваранинг севимли бобо ва бувиларидир.

–Ишдан чарчаб келганимизда невараларимизнинг шодон табассумига қараб, барча ташвишларни унутамиз. Болаларнинг кўнгли катталарникидан кенг бўлади, улар билан мириқиб дам оламиз, – дейди Гулнора опа.

Шаҳзод Анвар.