BIRI-BIRIGA YeLKADOSh INSONLAR

Vatan taraqqiyotida oilaning, mahallaning roli muhim ahamiyatga ega ekanligi barchamizga maʼlum. Tomchida quyosh aks etadi. Tomchi qanday daryodan ekanligi haqida tasavvur uygʻotadi kishida. Oilalarning mamlakatimiz va tumanimiz taraqqiyotiga qoʻshayotgan hissalaridan quvonamiz.

“Durunki” mahallasida yashovchi Maqsud Yoʻldoshev va Gulnora Xudoyberganovalarning oilasi ana shunday eʼtirofga loyiq. Maqsud aka Yoʻldoshev 1972-yilda Mangʻit shahrida, nafaqadagi montyor Mambat Yoʻldoshev oilasida tugʻilgan. Otalari Mambat bobo Yoʻldoshev farzandlarini ilmli qilgan va doim el xizmatida boʻlgan hurmatli insondir. Bugun ham “Qoraqalpogʻistonda xizmat koʻrsatgan energetik” faxriy unvoni sohibi Mambat boboni katta-yu kichik birdek taniydi, yaxshi koʻrib, duosini olishga oshiqadi.

Maqsud aka yoshligidan fizika qonunlariga nihoyatda qiziquvchanligidan koʻnglida ota kasbiga hurmat va mehr uygʻondi. 1990-1995-yillar davomida Toshkent Davlat temir yoʻllari institutining elektromexanika fakultetida tahsil oldi. Oʻqishni tugatib, ish faoliyatini tuman elektr tarmoqlari korxonasida oddiy montyorlikdan boshlagan Maqsud aka ayni paytda masʼuliyatli vazifada xizmat qilmoqda.

Maqsud aka koʻchat ekib, bogʻ yaratishni yaxshi koʻradi. Ayniqsa, uzumchilikka alohida mehr qoʻygan. Tomorqasidan unumli foydalanib, har yili moʻl hosil olmoqda. Chorva mollarini boqish esa eng sevimli mashgʻulotlaridan biri. Maqsud aka Yoʻldoshev nihoyatda samimiy va oq koʻngilligi uchunmi, koʻngli toza, mard insonlarni hurmat qiladi. Qoʻlidan kelganicha ehtiyojmand oilalarga yordam beradi.

Ilmga, maʼnaviyatga talpinguvchi, ziyoli insonlarni koʻngliga yaqin bilguvchi Maqsud aka Yoʻldoshev bu yil muborak Haj ziyoratini ado etdilar. Oila bekasi Gulnora opa Xudoyberganova har bir ishda Maqsud akaga koʻmakdosh.

Bolaligidan matematika faniga, hisob-kitob ishlari-ga mehr qoʻygan Gulnora opa 1989-1994-yillar davomida Toshkent Moliya institutining moliya va kredit fakultetida oʻqib, moliya sohasining sirlarini qunt bilan oʻrgandi.

Ish faoliyatini 2004-yil 30-sonli maktabda matematika fani oʻqituvchisi sifatida boshlagan opa 2007-yildan buyon Amudaryo qishloq xoʻjalik kasb-hunar kollejida oʻquvchilarga maxsus fanlardan dars berib kelmoqda. Koʻplab shogirdlari jamiyatimizning turli qatlamlarida mehnat qilmoqda.

– Maktab chogʻida ustozimiz Gulora opa Eshimbetovaning darslarini butun borligʻimiz bilan tinglardik, – eslaydi u 16-sonli maktabda oʻtgan oʻquvchilik yillari haqida. – Talabalik davrimizda esa texnologiya fanidan dars beruvchi domlamiz ancha talabchan boʻlib, yaxshi baho olish qiyin edi. Darslariga qattiq tayyorgarlik koʻrardik. Ana shunday talabchan ustozlarim tufayli men hayotda va oilamda baxtliman.

Gulnora opa nihoyatda irodali ayol. Muammolardan qochish emas, yechim topishga harakat qiladi. Oʻquvchilariga ham shunday taʼlim beradi. Kitob mutolaasida bu oila juda peshqadam.

Ishdan boʻsh paytlarida gullar parvarish qilishni, koʻchat ekishni yaxshi koʻradigan Gulnora opa umr yoʻldoshining har bir fikrini hurmat qiladi, qoʻshnilarining toʻy-u hashamlarida hamisha mahalla-koʻy bilan birga.

Maqsud aka bilan Gulnora opa hayotda biri-biriga yelkadosh boʻlib yashab kelishmoqda. Oiladagi sogʻlom muhit farzandlari kamolida namoyon. Katta qizlari Shoira 40-sonli maktabda boshlangʻich sinf oʻqituvchisi. Oʻgʻli Otabek tuman Davlat Soliq inspektsiyasi xodimi. Kelini Mohigul va qizi Shohista Qoraqalpoq Davlat universiteti talabalari. Kenja oʻgʻli Jasurbek esa 36-sonli maktabning aʼlochi oʻquvchisi.

Maqsud aka bilan Gulnora opa uch nafar nevaraning sevimli bobo va buvilaridir.

–Ishdan charchab kelganimizda nevaralarimizning shodon tabassumiga qarab, barcha tashvishlarni unutamiz. Bolalarning koʻngli kattalarnikidan keng boʻladi, ular bilan miriqib dam olamiz, – deydi Gulnora opa.

Shahzod Anvar.