Nogironligi bor boʻlishiga qaramay baʼzi sogʻlom insonlar uchun oʻrnak boʻlayotgan hamyurtlarimiz

Muhtaram Prezidentimiz tashabbusi bilan bugungi kunda mamlakatimizda ijtimoiy himoyaga muhtoj, nogironligi boʻlgan insonlarni har tomonlama qoʻllab-quvvatlash, ularning hayot tarzi, yashash sharoitlarini yaxshilash borasida tizimli ishlar olib borilmoqda.

Amudaryo tumanida ijtimoiy himoyaga muhtoj, nogironligi boʻlishiga qaramay, hayotda sogʻlom insonlar singari oldinga intilayotgan, oʻz oilasini, ota-onasi va farzandlarini moddiy taʼminlashga harakat qilayotgan, bugungi kuniga shukronalik keltirib, yaratilayotgan imkoniyatlardan unumli foydalanayotgan hamda oʻzgalarga namuna boʻlayotgan hamyurtlarimiz talaygina.

Tumanimizning Chordara mahallasida yashovchi Shokir Nurullayev 2014-yilda baxtsiz hodisa tufayli bir oyogʻidan ajralgan hamda II guruh nogironi boʻlib qolgan. Hozirgi kunda 2 nafar farzand – bir oʻgʻil, bir qizning otasi. Yoshi ulugʻ onasi Gulara Salayevaning duosini olib, oilasini boqish, turmush oʻrtogʻi hamda farzandlarini oʻzgalardan kam qilmay tarbiyalashga harakat qilib kelmoqda.

Shokir Nurullayev kredit mablagʻi hisobiga elektr mototsikl sotib olgan hamda ushbu mototsikl orqali ogʻir yuklarni, qishloq xoʻjaligi mahsulotlarini tashib berish orqali xalqimizga xizmat koʻrsatib, oilasiga daromad keltirmoqda.

Nogironligi boʻlishiga qaramay, oʻzi, oilasi va farzandlari uchun yaxshi hayot tarzini yaratishga, farzandlarining orzu-havaslarini roʻyobga chiqarishga intilib, harakatdan toʻxtamayotgan yana bir hamyurtimiz Ravshanbek Matmuratov 2002-yilda baxtsiz hodisa sababli oʻng qoʻlidan ajralgan. U II guruh nogironi boʻlishiga qaramay, hayotidan norozi boʻlib yashayotgan baʼzi sogʻlom insonlarga oʻrnak, namuna boʻla oladi.

II guruh nogironi Ravshanbek Matmuratov bilan suhbatlashar ekanmiz, oʻzini aslo nogiron ekanligini his qilmasdan, oilaboshi sifatida tadbirkorlik orqali yaxshi daromad topayotganining, roʻzgʻorini tebratib, halol mehnat qilayotganining guvohi boʻldik.

Ravshanbek Matmuratov Mangʻit dehqon bozorida yoz oylarida qovun, tarvuz kabi poliz ekinlarini, qish oylarida esa kartoshka, piyoz, sabzi, karam kabi sabzavotlarni sotib kelmoqda. Hamyurtimiz bugungi kunidan rozi, turmush oʻrtogʻi, 2 nafar oʻgʻli hamda qizi doimo unga qoʻl-qanot boʻlib, qoʻllab-quvvatlab kelishayotganini, oʻzini bu hayotda baxtli insonlar qatorida ekanini taʼkidlaydi.

Mangʻit shahri Olmazor mahallasida yashovchi Otabek Bobojonov oʻz sevgan kasbi mobil telefonlarni taʼmirlash faoliyati bilan shugʻullanib kelmoqda. Uning hayotda oʻz oʻrnini topishiga nogironligi aslo toʻsqinlik qilmagan. Doimo oʻz ustida ishlovchi, izlanuvchan Otabek Bobojonov bugungi kunga qadar 6 nafar shogirdlar tayyorlab, ularning ham ustachilik faoliyatlarini boshlab yuborishlariga yordam bergan.

Oilali, bir nafar farzandning otasi boʻlgan Otabek Bobojonov mohir usta boʻlib yetishishida ota-onasi hamda turmush oʻrtogʻi doimo qoʻllab-quvvatlab kelganlarini taʼkidlaydi. U oʻz kasbiga boʻlgan mehri, qiziqishi, doimo harakatdan toʻxtamasligi tufayli Toshkent shahrida mobil telefonlarni taʼmirlovchi tajribali ustalar qoʻlida oʻqib, ulardan yangi bilimlar hamda koʻnikmalar olib kelgan. Ayni paytda Otabek Bobojonov oʻz kasbining mohir ustasi, uning doimiy mijozlari soni juda koʻp va har bir mijoz uning ishlaridan mamnun.

Oramizda ana shunday – imkoniyati cheklangan boʻlishiga qaramasdan oʻzini aslo ijtimoiy himoyaga muhtoj deya his etmaydigan, hayotni sevuvchi, har bir kuniga, hatto har bir soʻzida shukronalik keltiruvchi insonlarni koʻrib kishining shukronaligi, gʻayrati, shijoati, hayotga muhabbati, ertangi kunga ishonchi yanada ortadi.

Charos Arslonova, tuman hokimligining Axborot xizmati rahbari.