Она замин муқаддас, уни авайлаш - бурчимиз

"Хитой” овул фуқаролар йиғинида айни кунда 3200 нафардан ортиқ ўзбек, қозоқ, қорақалпоқ, туркман, рус, татар каби турли миллат вакиллари аҳил-иноқ яшашмоқда. Меҳнатга лаёқатли 1820 нафардан зиёд аҳолининг 275 нафари иқтисодиёт тармоқларида, 14 нафари ММТПда, 168 нафари фермер хўжаликларида, 119 нафари таълим муассасаларида 42 нафари соғлиқни сақлаш муассасаларида, 5 нафари маданият муассасаларида, 25 нафари қурилишда, 35 нафари бошқада ишларда, 10 нафари уй меҳнати билан шуғулланишмоқда.

Овул ёшлари 1 та умумтаълим мактабида бугунги кун талаблари даражасида таълим-тарбия олишмоқда. 1 та маданият уйи, 1 та маданият клуби, 1 та дорихона, 1 та қишлоқ врачлик пункти, 9 та хусусий дўконлар, 1 та гўшт дўкони, 12 та маиший хизмат кўрсатиш шохобчалари аҳоли хизматида.

Жорий йилда овулда фаолият кўрсатаётган пахтачилик ва ғаллачиликка ихтисослашган 4 та фермер хўжаликларида пахта, буғдой ва бошқа қишлоқ хўжалик маҳсулотлари етиштириш режаси ортиғи билан адо этилди.

Бундан ташқари, хонадонларда боқилаётган 900 бошдан зиёд қорамоллар, 50 бошдан зиёд қўй-эчкилар, шунингдек, паррандалар овул аҳолиси дастурхонининг тўкин бўлишига ҳисса қўшаётир.

Кейинги йилларда томорқа ерлардан унумли фойдаланиш ҳисобига аҳоли турмуши фаровонлигини оширишга алоҳида эътибор берилмоқда. Чунки ҳар ким ҳовлиси олдидаги томорқа еридан кўзланганидай ҳосил олса, аввало шу маҳсулотларга ажратиладиган харажати тежалади. Қолаверса, ҳар ким ўз томорқасида маҳаллий ўғит ва яхши ишлов бериш ҳисобига мўл ҳосил олса, оила аъзоларини экологик тоза, янги мева, сабзавотлар билан таъминлайди. Ва шу баробарида соғлигини муҳофаза қилишга ҳисса қўшган бўлади. Ахир ёз, куз кунларида бозорларда туриб қолган мева ва полиз маҳсулотларини истеъмол қилиш оқибатида кўнгилсизликлар содир бўлаётгани ҳеч кимга сир эмас.

Табиат – онамиз. Наинки инсон, балки жамики мавжудотларнинг тириклик манбаи атрофимизни ўраб турган олам туфайлидир. Шундай экан, чор-атрофимизни озода ва кўкаламзор гўшага айлантириш, мевали, манзарали дарахтлар, гуллар экиш, мавжуд дарахтларни етарлича парваришлаш ҳар биримизнинг бурчимиз эканлигини овул одамларига кенг тушунтираяпмиз. Ҳаракатларимиз эса самара бераётир. Уларнинг бу борадаги интилишларини рағбатлантириш мақсадида "Энг яхши боғли ҳовли”, "Энг обод хонадон” каби танловлар ўтказиб, ғолибларни рағбатлантириб бораяпмиз.

Табиатни асраш, мевали, манзарали дарахтларни кўпайтириб, чор-атрофимизнинг гўзал ва обод бўлишига ҳисса қўшиш ҳар биримизнинг бурчимиз.

Тозагул ЭШЧОНОВА,