Ona zamin muqaddas, uni avaylash - burchimiz

"Xitoy” ovul fuqarolar yigʻinida ayni kunda 3200 nafardan ortiq oʻzbek, qozoq, qoraqalpoq, turkman, rus, tatar kabi turli millat vakillari ahil-inoq yashashmoqda. Mehnatga layoqatli 1820 nafardan ziyod aholining 275 nafari iqtisodiyot tarmoqlarida, 14 nafari MMTPda, 168 nafari fermer xoʻjaliklarida, 119 nafari taʼlim muassasalarida 42 nafari sogʻliqni saqlash muassasalarida, 5 nafari madaniyat muassasalarida, 25 nafari qurilishda, 35 nafari boshqada ishlarda, 10 nafari uy mehnati bilan shugʻullanishmoqda.

Ovul yoshlari 1 ta umumtaʼlim maktabida bugungi kun talablari darajasida taʼlim-tarbiya olishmoqda. 1 ta madaniyat uyi, 1 ta madaniyat klubi, 1 ta dorixona, 1 ta qishloq vrachlik punkti, 9 ta xususiy doʻkonlar, 1 ta goʻsht doʻkoni, 12 ta maishiy xizmat koʻrsatish shoxobchalari aholi xizmatida.

Joriy yilda ovulda faoliyat koʻrsatayotgan paxtachilik va gʻallachilikka ixtisoslashgan 4 ta fermer xoʻjaliklarida paxta, bugʻdoy va boshqa qishloq xoʻjalik mahsulotlari yetishtirish rejasi ortigʻi bilan ado etildi.

Bundan tashqari, xonadonlarda boqilayotgan 900 boshdan ziyod qoramollar, 50 boshdan ziyod qoʻy-echkilar, shuningdek, parrandalar ovul aholisi dasturxonining toʻkin boʻlishiga hissa qoʻshayotir.

Keyingi yillarda tomorqa yerlardan unumli foydalanish hisobiga aholi turmushi farovonligini oshirishga alohida eʼtibor berilmoqda. Chunki har kim hovlisi oldidagi tomorqa yeridan koʻzlanganiday hosil olsa, avvalo shu mahsulotlarga ajratiladigan xarajati tejaladi. Qolaversa, har kim oʻz tomorqasida mahalliy oʻgʻit va yaxshi ishlov berish hisobiga moʻl hosil olsa, oila aʼzolarini ekologik toza, yangi meva, sabzavotlar bilan taʼminlaydi. Va shu barobarida sogʻligini muhofaza qilishga hissa qoʻshgan boʻladi. Axir yoz, kuz kunlarida bozorlarda turib qolgan meva va poliz mahsulotlarini isteʼmol qilish oqibatida koʻngilsizliklar sodir boʻlayotgani hech kimga sir emas.

Tabiat – onamiz. Nainki inson, balki jamiki mavjudotlarning tiriklik manbai atrofimizni oʻrab turgan olam tufaylidir. Shunday ekan, chor-atrofimizni ozoda va koʻkalamzor goʻshaga aylantirish, mevali, manzarali daraxtlar, gullar ekish, mavjud daraxtlarni yetarlicha parvarishlash har birimizning burchimiz ekanligini ovul odamlariga keng tushuntirayapmiz. Harakatlarimiz esa samara berayotir. Ularning bu boradagi intilishlarini ragʻbatlantirish maqsadida "Eng yaxshi bogʻli hovli”, "Eng obod xonadon” kabi tanlovlar oʻtkazib, gʻoliblarni ragʻbatlantirib borayapmiz.

Tabiatni asrash, mevali, manzarali daraxtlarni koʻpaytirib, chor-atrofimizning goʻzal va obod boʻlishiga hissa qoʻshish har birimizning burchimiz.

Tozagul EShChONOVA,