Давлат рамзларига эҳтиром — муқаддас қадрият

Амударё туманида 18 ноябрь — Ўзбекистон Республикаси Давлат байроғи қабул қилинган кун муносабати билан байрам тадбири ташкил этилди. Тадбир туман Маданият бўлимида бўлиб ўтди ва унда давлат рамзларига бўлган чуқур ҳурмат, ёш авлодни ватанпарварлик руҳида тарбиялаш масалалари бош мавзуга айланди.

Тадбир аввалида Амударё тумани прокурори Баҳрам Машарипов, туман ҳокими ўринбосари Нодирбек Камолов сўзга чиқиб, йиғилганларни мамлакатимиз суверенитети ва давлат рамзлари шарафини улуғлайдиган ушбу сана билан самимий муборакбод этишди.

“Давлат байроғи — халқнинг шаъни, давлатнинг обрўси” – дея таъкидлади туман прокурори Баҳрам Машарипов ўз нутқида. Шунингдек, у давлат рамзларининг нафақат ҳуқуқий, балки маънавий ҳаётимиздаги ўрнига алоҳида тўхталиб ўтди. У давлат байроғи мамлакат мустақиллигининг энг муҳим белгилардан бири экани, байроғимиз тасдиқланган 1991 йил 18 ноябрда санаси тарихий аҳамиятга эга кун эканини алоҳида таъкидлади.

Дарҳақиқат, Ўзбекистон байроғи бугун жаҳон ареналарида фахр билан ҳилпирамоқда, халқаро спорт мусобақаларида спортчиларимиз ютуқлари шарофати билан байроғимиз баланд кўтарилмоқда. Байроғимизнинг нуфузли маросимлар, саммит ва халқаро учрашувларда ҳилпираши халқимизнинг шаъни ва обрўсини дунёга кўрсатмоқда. Давлат рамзларига ҳурмат — бу, аввало, Ватанга садоқат, миллий ғурур ва фуқаролик масъулиятининг ёрқин ифодасидир.

Туман ҳокими ўринбосари Нодирбек Камолов ўз нутқида давлат байроғининг халқимиз учун улкан ғурур ва фахр тимсоли эканини қайд этди. У давлат байроғи қабул қилинганига 34 йил тўлгани муносабати билан барча ҳамюртларимизни самимий табриклади.

Ҳоким ўринбосари ўз нутқида байроқдаги ранглар ва рамзларнинг маъноси — тинчлик, поклик, умид, жасорат ва умумбашарий қадриятларни ифода этиши ҳақида ҳам алоҳида тўхталиб ўтилди. Байроғимизни эъзозлаш, уни ҳурмат қилиш ва ёш авлодга шу қадриятни сингдириш барчамизнинг муқаддас бурчимиз экани алоҳида таъкидланди.

Тадбир туман Маданият бўлими ижодкорлари томонидан тайёрланган байрамона концерт дастури билан давом этди. Хонандалар томонидан Ватан муҳаббати, дўстлик, тинчлик ва бирликни тараннум этувчи куй-қўшиқлар ижро этилиб, йиғилганларга кўтаринки кайфият улашилди.

18 ноябрь — Давлат байроғи қабул қилинган сана нафақат тарихий кун, балки авлод-авлодга ўтадиган миллий қадрият, суверенитетимиз рамзи, мустақиллигимизнинг ёрқин ифодасидир. Амударё туманида ўтказилган байрам тадбири ҳам бу куннинг нақадар улуғ ва аҳамиятли эканини яна бир бор намоён этди.

Бу каби тадбирлар ёшларимиз қалбида Ватанга муҳаббат, давлат рамзларига ҳурмат туйғусини янада мустаҳкамлаши шубҳасиз.

Чарос Арслонова, туман ҳокимлигининг Ахборот хизмати раҳбари.