Эзгу мақсадлар билан

Ободлик - кўнгилдан бошланади. Қалбимиздаги пок ниятлар бизни эзгу мақсадларимиз сари етаклайди. Мақсадга эришиш учун эса хоҳиш-истак, фидойилик, сабр-қаноат, қатъият, ирода ҳам зарурдир.

Орамизда шундай инсонлар борки, улар билан суҳбатлашиб, ҳаётий  фикр-мулоҳазалари билан ўртоқлашиб, маънавий озуқа оласан. Умри давомида қизғин меҳнат фаолияти, эришган ва эришаётган ютуқлари ҳақида эшитиб, ҳавас қиласан киши.

Туманимизнинг "Хизр эли” маҳалласидаги 46-сонли умумтаълим мактаби  директори Аминбой ака Йўлдошев ҳам ана шундай дилкаш, самимий, ҳалол меҳнати ортидан роҳату фароғат кўриб яшаётган инсонлардан бири. Унинг оиласи билан танишар эканмиз, хонадон эгаларининг самимий дил сўзлари, очиқ чеҳраси, тотув ҳаёт кечиришидан диёримизнинг ибратли хонадонларидан бири эканидан фахр ҳиссини туйдик. Зотан, аҳиллик, тотув ҳаёт қалбимиз гулшанидир.

Оила тинч бўлса, у мустаҳкам бўлади. Оиланинг тинчлиги – шу оиладаги ўзаро ҳурмат, ҳамкорликда ишлаш, ижтимоий ва маънавий омилларга ҳам боғлиқ.

Аминбой ака ҳам умр йўлдоши билан бир мактабда ишлаб, фарзандларини эл-юрт ишига камарбаста бўлишга давъат этиб келмоқда. Маҳаллада ҳам ўқитувчилар оиласи деган обрў-эътиборга эга.

Унинг умр йўлдоши Гулора опа Тўлиеванинг фикрича, фарзанд тарбиясида миллий қадриятларнинг ўрни алоҳида аҳамиятга эга.

- Бундан ташқари, халқ фарзандларини ўз фарзандингдек севиш, ўқувчиларга нисбатан талабчан ва меҳрибон бўлиш ўқитувчилар зиммасига юкланган масъулият, - дейди у.

Одамзод дунёга келибдики, яхши яшашга, ҳаёт лаззатларидан имкон борича тўлароқ фойдаланишга интилиб келган. Ҳар ким қаерда ва қандай яшаши, қаерда ишлашидан  қатъий назар, биринчи навбатда ўз турмушидан, ўз ишидан, ўз юриш-туришидан хурсанд бўлиши керак. Бахтли бўлишнинг биринчи шарти ҳам мана шу.

Обод турмуш тушунчаси азалдан тинчлик, осойишталик, фаровонлик, қут-барака деган маънони англатади. Истиқлол йилларида бу тушунчалар янада чуқур маъно-мазмун билан бойиб, Ватан равнақи, юрт-тинчлиги, биз учун энг азиз ҳамда муқаддас бўлган қадриятларни асраб-авайлашни ҳам ўзида мужассам этмоқда.

Аминбой ака Йўлдошевлар оиласининг ҳар бир аъзоси ана шундай эзгу мақсад билан яшайди.

Шарифа РАЖАБОВА.

Суратда: А.Йўлдошев.