Ezgu maqsadlar bilan

Obodlik - koʻngildan boshlanadi. Qalbimizdagi pok niyatlar bizni ezgu maqsadlarimiz sari yetaklaydi. Maqsadga erishish uchun esa xohish-istak, fidoyilik, sabr-qanoat, qatʼiyat, iroda ham zarurdir.

Oramizda shunday insonlar borki, ular bilan suhbatlashib, hayotiy  fikr-mulohazalari bilan oʻrtoqlashib, maʼnaviy ozuqa olasan. Umri davomida qizgʻin mehnat faoliyati, erishgan va erishayotgan yutuqlari haqida eshitib, havas qilasan kishi.

Tumanimizning "Xizr eli” mahallasidagi 46-sonli umumtaʼlim maktabi  direktori Aminboy aka Yoʻldoshev ham ana shunday dilkash, samimiy, halol mehnati ortidan rohatu farogʻat koʻrib yashayotgan insonlardan biri. Uning oilasi bilan tanishar ekanmiz, xonadon egalarining samimiy dil soʻzlari, ochiq chehrasi, totuv hayot kechirishidan diyorimizning ibratli xonadonlaridan biri ekanidan faxr hissini tuydik. Zotan, ahillik, totuv hayot qalbimiz gulshanidir.

Oila tinch boʻlsa, u mustahkam boʻladi. Oilaning tinchligi – shu oiladagi oʻzaro hurmat, hamkorlikda ishlash, ijtimoiy va maʼnaviy omillarga ham bogʻliq.

Aminboy aka ham umr yoʻldoshi bilan bir maktabda ishlab, farzandlarini el-yurt ishiga kamarbasta boʻlishga davʼat etib kelmoqda. Mahallada ham oʻqituvchilar oilasi degan obroʻ-eʼtiborga ega.

Uning umr yoʻldoshi Gulora opa Toʻliyevaning fikricha, farzand tarbiyasida milliy qadriyatlarning oʻrni alohida ahamiyatga ega.

- Bundan tashqari, xalq farzandlarini oʻz farzandingdek sevish, oʻquvchilarga nisbatan talabchan va mehribon boʻlish oʻqituvchilar zimmasiga yuklangan masʼuliyat, - deydi u.

Odamzod dunyoga kelibdiki, yaxshi yashashga, hayot lazzatlaridan imkon boricha toʻlaroq foydalanishga intilib kelgan. Har kim qayerda va qanday yashashi, qayerda ishlashidan  qatʼiy nazar, birinchi navbatda oʻz turmushidan, oʻz ishidan, oʻz yurish-turishidan xursand boʻlishi kerak. Baxtli boʻlishning birinchi sharti ham mana shu.

Obod turmush tushunchasi azaldan tinchlik, osoyishtalik, farovonlik, qut-baraka degan maʼnoni anglatadi. Istiqlol yillarida bu tushunchalar yanada chuqur maʼno-mazmun bilan boyib, Vatan ravnaqi, yurt-tinchligi, biz uchun eng aziz hamda muqaddas boʻlgan qadriyatlarni asrab-avaylashni ham oʻzida mujassam etmoqda.

Aminboy aka Yoʻldoshevlar oilasining har bir aʼzosi ana shunday ezgu maqsad bilan yashaydi.

Sharifa RAJABOVA.

Suratda: A.Yoʻldoshev.