ТЎҚЛИККА ШЎХЛИК ҚИЛСАНГИЗ, ИСНОДГА ҚОЛАСИЗ

Халқимиз мустақиллик шарофати билан фаровон ҳаёт кечирмоқда. Буни биз дастурхонимиз тўкинлигидан, юртдошларимиз томонидан бунёд этилаётган уй-жойлар ва бошқа иморатлардан, уларнинг ихтиёрларида бўлган қўша-қўша автоуловлардан ва бошқада турмуш шароитларидан яққол кўриб турибмиз. Бунинг учун, албатта, биз Яратганга қайта ва қайта шукроналар айтамиз.

Шундай бўлишига қарамасдан, орамизда айрим юртдошларимиз ҳам борки, улар шундай замондан рози бўлиб яшаш ўрнига қилдан қийиқ ахтаришга, арзимас нарса учун бир-бировлари билан ҳар хил низолар, уруш-жанжаллар чиқаришга, шу тариқа элдошларига “томоша” кўрсатишга ҳаракат қиладилар.

Эрта тонгда туманимиздаги хонадонлардан бирида тўпо-лон кўтарилди.

Арзимаган масалада бош-ланган келишмовчилик катта жанжалга айланди – шу хонадоннинг келини Дилбар Шомуродова жаҳл устида қайнонаси Ҳанифа Норимбетовага ташланди (исм-фамилиялари ўзгарти-рилган). Келин ёш, кучга тўла эмасми, бир зумда қайнонасини уриб, уни беҳуш ҳолатга келтирди. Уларни ажратишга ва келинини муросага чақиришга интилган қайнота Қудрат Фарҳодов ҳам ўз “насиба”сини олди. Ожиза дея эътироф этилувчи аёл зотининг бундай “ҳунар”ларини кўрмаган қайнота келинининг бир неча зарбасидан кейин “чекинишга” мажбур бўлди.

Орадан озгина вақт ўтиб, оилавий “ўйин”нинг иккинчи қисми бошланди. Бу сафар қайнона Ҳанифа Норимбетова турмуш ўртоғи Қудрат Фарҳодов билан биргаликда келини Дилбар Шомуродованинг яхшилаб таъзирини берди. Шу тариқа жанжал иштирокчиларнинг барчаси тан жароҳати олди.

Бу оилавий жанжалнинг “натижалари” яқинда Амударё тумани Маъмурий судида кўриб чиқилди.

Суд ҳуқуқбузар Шомуродова Дилбар Ҳамидовнага жазо тайинлашда унинг ўз ҳаракатига иқрорлигини, содир этган қилмишидан пушаймонлигини, бу каби ҳаракатларни бошқа содир этмаслигини, яшаш жойидан ижобий тавсифланганлигини, муқаддам маъмурий жавобгарликка тортилмаганлигини, жабрланувчи билан ярашганлигини инобатга олиб, унга Ўзбекистон Республикаси Маъмурий жавобгарлик тўғрисидаги Кодекснинг 21-моддасини қўллаб, маъмурий жавобгарликдан озод этди ва огоҳлантириш билан кифояланишни лозим топди.

Ҳуқуқбузарлар Ҳанифа Норимбетова ва Қудрат Фарҳодовларга жазо тайинлашда ҳам уларнинг ўз ҳаракатларига иқрорлиги, содир этган қилмишларидан пушаймонликлари, бу каби ҳаракатларни бошқа содир этмасликлари, яшаш жойидан ижобий тавсифланганликлари, муқаддам маъмурий жавобгарликка тортилмаганликлари, жабрланувчи билан ярашганликлари инобатга олинди. Улар ҳам маъмурий жавобгарликдан озод этилиб, огоҳлантириш билан кифояланилди.

Биз ушбу мақоламизда арзимас бир сабабларга кўра юзага келган оилавий можаро ҳақида сўз юритдик. Бу арзимас деб ҳисобланган можаро судгача борди. Яхшиямки, суд уларнинг тавбаю-тазарруларини ҳисобга олиб, кечирим берди. Аммо бу воқеани қўни-қўшни, халқ кўрди-ку!

Бу воқеа минг бора кечирилгани билан ҳам унда иштирок этган инсонлар учун оғир номус ҳисобланади. Тўқликка шўхлик қилиб, арзимаган гап-сўзлар учун ғавғо-жанжал чиқариб, иснодга қолиш инсон шаънига доғ бўлиб тушади ва обрўсига путур етказади.

Назар САПАРНИЯЗОВ, туман прокурори ўринбосари.