TOʻQLIKKA ShOʻXLIK QILSANGIZ, ISNODGA QOLASIZ

Xalqimiz mustaqillik sharofati bilan farovon hayot kechirmoqda. Buni biz dasturxonimiz toʻkinligidan, yurtdoshlarimiz tomonidan bunyod etilayotgan uy-joylar va boshqa imoratlardan, ularning ixtiyorlarida boʻlgan qoʻsha-qoʻsha avtoulovlardan va boshqada turmush sharoitlaridan yaqqol koʻrib turibmiz. Buning uchun, albatta, biz Yaratganga qayta va qayta shukronalar aytamiz.

Shunday boʻlishiga qaramasdan, oramizda ayrim yurtdoshlarimiz ham borki, ular shunday zamondan rozi boʻlib yashash oʻrniga qildan qiyiq axtarishga, arzimas narsa uchun bir-birovlari bilan har xil nizolar, urush-janjallar chiqarishga, shu tariqa eldoshlariga “tomosha” koʻrsatishga harakat qiladilar.

Erta tongda tumanimizdagi xonadonlardan birida toʻpo-lon koʻtarildi.

Arzimagan masalada bosh-langan kelishmovchilik katta janjalga aylandi – shu xonadonning kelini Dilbar Shomurodova jahl ustida qaynonasi Hanifa Norimbetovaga tashlandi (ism-familiyalari oʻzgarti-rilgan). Kelin yosh, kuchga toʻla emasmi, bir zumda qaynonasini urib, uni behush holatga keltirdi. Ularni ajratishga va kelinini murosaga chaqirishga intilgan qaynota Qudrat Farhodov ham oʻz “nasiba”sini oldi. Ojiza deya eʼtirof etiluvchi ayol zotining bunday “hunar”larini koʻrmagan qaynota kelinining bir necha zarbasidan keyin “chekinishga” majbur boʻldi.

Oradan ozgina vaqt oʻtib, oilaviy “oʻyin”ning ikkinchi qismi boshlandi. Bu safar qaynona Hanifa Norimbetova turmush oʻrtogʻi Qudrat Farhodov bilan birgalikda kelini Dilbar Shomurodovaning yaxshilab taʼzirini berdi. Shu tariqa janjal ishtirokchilarning barchasi tan jarohati oldi.

Bu oilaviy janjalning “natijalari” yaqinda Amudaryo tumani Maʼmuriy sudida koʻrib chiqildi.

Sud huquqbuzar Shomurodova Dilbar Hamidovnaga jazo tayinlashda uning oʻz harakatiga iqrorligini, sodir etgan qilmishidan pushaymonligini, bu kabi harakatlarni boshqa sodir etmasligini, yashash joyidan ijobiy tavsiflanganligini, muqaddam maʼmuriy javobgarlikka tortilmaganligini, jabrlanuvchi bilan yarashganligini inobatga olib, unga Oʻzbekiston Respublikasi Maʼmuriy javobgarlik toʻgʻrisidagi Kodeksning 21-moddasini qoʻllab, maʼmuriy javobgarlikdan ozod etdi va ogohlantirish bilan kifoyalanishni lozim topdi.

Huquqbuzarlar Hanifa Norimbetova va Qudrat Farhodovlarga jazo tayinlashda ham ularning oʻz harakatlariga iqrorligi, sodir etgan qilmishlaridan pushaymonliklari, bu kabi harakatlarni boshqa sodir etmasliklari, yashash joyidan ijobiy tavsiflanganliklari, muqaddam maʼmuriy javobgarlikka tortilmaganliklari, jabrlanuvchi bilan yarashganliklari inobatga olindi. Ular ham maʼmuriy javobgarlikdan ozod etilib, ogohlantirish bilan kifoyalanildi.

Biz ushbu maqolamizda arzimas bir sabablarga koʻra yuzaga kelgan oilaviy mojaro haqida soʻz yuritdik. Bu arzimas deb hisoblangan mojaro sudgacha bordi. Yaxshiyamki, sud ularning tavbayu-tazarrularini hisobga olib, kechirim berdi. Ammo bu voqeani qoʻni-qoʻshni, xalq koʻrdi-ku!

Bu voqea ming bora kechirilgani bilan ham unda ishtirok etgan insonlar uchun ogʻir nomus hisoblanadi. Toʻqlikka shoʻxlik qilib, arzimagan gap-soʻzlar uchun gʻavgʻo-janjal chiqarib, isnodga qolish inson shaʼniga dogʻ boʻlib tushadi va obroʻsiga putur yetkazadi.

Nazar SAPARNIYaZOV, tuman prokurori oʻrinbosari.