ДЕҲҚОНЧИЛИКНИНГ МЕҲНАТИ ОҒИР, НОНИ ШИРИН

Деҳқончилик машаққатини тилсиз замин бағрида халқимизнинг ризқ-рўзини яратаётган, кўнгиллари ўзлари бунёд этган пахтасидай оқ, ниятлари улуғ дала меҳнаткашларичалик ҳеч ким тасаввур қилолмайди. Айниқса пахта жуда парваришталаб. Бироқ меҳнатлари самара бериб, ҳосил хирмонга уюлган даврда буларнинг бари унутилиб кетади.

Айни кунларда туманимиз пахта далаларини кезсангиз – ўзларининг фидойи меҳнатлари эвазига етиштирилган оппоқ пахталарни завқ билан йиғиб-териб олаётган одамларни учратасиз. Уларнинг нияти – чаноқларда очилиб турган момиқдай пахталарни ёғин-сочинли кунларга қолдирмай йиғиштириб олиб, давлатга топшириш, қимматбаҳо хомашёнинг бир мисқолини ҳам зоя қилмаслик.

Фермер хўжалигимизда жорий йилда пахтадан мўл ҳосил етиштиришга эришдик. Сентабрь ойи бошида теримни бошлаб 28 сентабрь кунига мавжуд 25 гектар пахта майдонимиздан 54 тонна юқори сифатли ҳосил териб олиб, йиллик шартномавий режамизни ортиғи билан адо этдик.

Мавсум давомида 12 нафар пудратчиларимизга ҳудудимиздаги ишга яроқли вақтинча ишсиз аҳоли ҳам яқиндан кўмакчи бўлишди. Теримда қатнашаётганлар ҳар куни тушликда иссиқ овқат, чой билан таъминланди ва унумли ишлашларига шароит яратилди, терим пуллари ўз вақтида бериб борилди. Терилган пахталар пешма-пеш қабул пунктига топширилди. Натижада 28 октябрда йиллик шартномавий режамизни ортиғи билан адо этишга эришдик. 54 тонна ҳосилимизнинг ҳаммаси биринчи навга қабул қилинди.

Бу хўжалигимиз пахтачиликда юқори даромад олишини таъминлайди.

Хўжалигимизда пахтадан ташқари 2 гектар майдондаги соя, шоли, сабзи, пиёз, саримсоқпиёз каби экинлардан, шунингдек 17 гектар ғалла майдонидан ҳам юқори ҳосил етиштиришга эришдик. Бунда қишлоқ хўжалик корхоналарига хизмат кўрсатувчи ташкилотларнинг ҳам ҳиссаси улкан.

Суҳроб БОБОЖОНОВ, “Оқ олтин” овулидаги

“Суҳроб-Ҳожиакбар” фермер хўжалиги раиси.