ТАЪЗИМ СИЗГА, АЗИЗ УСТОЗЛАР!

Устоз, ўқитувчи, муаллим, мураббий. Бу сўзлар мазмун-моҳияти бир-бирига яқин, бир-бирининг такрори. Замирида эса олам-олам маъно мужассам.

Энг аввало, ёзишни ва ўқишни ўргатган инсон, болажон учун устоз, мураббий эмасми?

Ўқиш, ёзишни билгач, китобга ихлос уйғотган шу муаллим эмасми? Яхши ўқисак, шод бўлиб, “5” баҳо қўйган, “аъло”дан паст билсак, дарҳол енг шимариб бизни назорат қилган, кўнглимизга йўл топиб яна илм сари йўналтирган шу ўқитувчилар эмасми?

Таълим жараёнининг энг масъулиятли ва машаққатлиси бошланғич таълимдир. Бизга илк маротаба қоғоз-қалам ушлатган ва ёзишни, ўқишни ўргатган биринчи устозимиздир.

Мактабга биринчи келган кунимни тез-тез эслайман. Биринчи устозим бизни оталарча меҳр билан, кулиб қарши олганлар. Ўша кундан бошлаб устозимиз бизнинг иккинчи отамизга айландилар. Устоз сабр билан бизга сабоқ берганлар.

Мен таърифлаётган инсон тумандаги 35-сонли мактабда бошланғич синф ўқитувчиси бўлиб ишлаган Зарифбой ака Асқаровдир.

У 1966 йили ўрта мактабни тугатиб, Нукус Давлат Педагогика институти бошланғич таълим факультетига ўқишга кирди, ўқишини 1968 йилда сиртқи бўлимга айлантириб, ҳозирги 35-сонли мактабга ишга киради. 1996 йилдан 2005 йилгача бошланғич синфларда ўқув ишлари бўйича директор ўринбосари вазифасида ишлаган. 37 йиллик меҳнат фаолияти давомида қанчадан-қанча ёшларга таълим-тарбия бериб, 2005 йилдан бери фарзандлари ва набиралари ардоғида кексалик гаштини суриб келмоқда.

Зарифбой ака турмуш ўртоғи, бошланғич синф ўқитувчиси Клара опа билан беш қиз ва тўрт ўғилни тарбиялаб вояга етказдилар. Ҳозирги кунда фарзандлари ўзлари танлаган касбни эгаллаб, юртимиз равнақига ўз ҳиссаларини қўшмоқдалар. Қизи Замира опа эса ота-онаси касбини танлаб, 69-мактабда ёш авлодга она тили ва адабиёт фанидан дарс бермоқда. Мен мана шундай инсоннинг, ардоқли устознинг шогирди эканлигимдан ҳар доим фахрланиб юраман.

Устоз! Мана шу мактаб партаси сен учун Ватан, деган ўгитингиз учун, “Алифбо”нинг илк ҳарфи –“А” дан бошлаб берган сабоғингиз, саводхонлик мулкига етаклаб кириб, ундан тўла-тўкис баҳраманд этганингиз, ҳисоб майдонида жавлон уришга ўргатганингиз, инсон қалбини, унинг дардини тушуниш сирларидан огоҳ этганингиз ва бошқа барча сабоқларингиз учун сизга минг бора таъзим, деймиз.

Боғбон ўз ниҳолининг мевасини уч йилда кўрса, машаққатли ва шарафли касб эгаси бўлган устоз-мураббийлар ўз меҳнати самарасини ўн бир йилда кўради. Мана шу узоқ масофа оралиғида устозларнинг машаққатли меҳнатлари мужассам. Зарифбой ака бизга “Алифбо” билан бирга ҳаёт дарсидан ҳам сабоқ берганлар.

Ҳозирги кунда синфдошларим турли жабҳаларда, турли ишда, кимдир ўқитувчи, бири шифокор, тикувчи, ҳайдовчи ва ҳоказо, ҳаётда ўз ўрнини топган инсонлардир. Бунда, албатта, устозимиз Зарифбой ака ҳамда бошқа ўқитувчиларнинг ҳиссаси каттадир.

Мен бошланғич синф ўқитувчимиз Зарифбой ака Асқаровни ва 35-сонли мактабда бизга илм берган барча устозларимизни, шунингдек, ҳозирда ўзим фаолият кўрсатаётган 17-сонли мактаб жамоасини 1 октябрь – Ўқитувчи ва мураббийлар куни байрами билан чин қалбимдан табриклайман. Уларнинг машаққатли, аммо шарафли ишларида зафарлар тилайман. Сизнинг олдингизда ҳамиша таъзимдаман, азиз устозлар!

Инобат РАЖАБОВА, 17-сонли мактабнинг

она тили ва адабиёт фани ўқитувчиси.