TAʼZIM SIZGA, AZIZ USTOZLAR!

Ustoz, oʻqituvchi, muallim, murabbiy. Bu soʻzlar mazmun-mohiyati bir-biriga yaqin, bir-birining takrori. Zamirida esa olam-olam maʼno mujassam.

Eng avvalo, yozishni va oʻqishni oʻrgatgan inson, bolajon uchun ustoz, murabbiy emasmi?

Oʻqish, yozishni bilgach, kitobga ixlos uygʻotgan shu muallim emasmi? Yaxshi oʻqisak, shod boʻlib, “5” baho qoʻygan, “aʼlo”dan past bilsak, darhol yeng shimarib bizni nazorat qilgan, koʻnglimizga yoʻl topib yana ilm sari yoʻnaltirgan shu oʻqituvchilar emasmi?

Taʼlim jarayonining eng masʼuliyatli va mashaqqatlisi boshlangʻich taʼlimdir. Bizga ilk marotaba qogʻoz-qalam ushlatgan va yozishni, oʻqishni oʻrgatgan birinchi ustozimizdir.

Maktabga birinchi kelgan kunimni tez-tez eslayman. Birinchi ustozim bizni otalarcha mehr bilan, kulib qarshi olganlar. Oʻsha kundan boshlab ustozimiz bizning ikkinchi otamizga aylandilar. Ustoz sabr bilan bizga saboq berganlar.

Men taʼriflayotgan inson tumandagi 35-sonli maktabda boshlangʻich sinf oʻqituvchisi boʻlib ishlagan Zarifboy aka Asqarovdir.

U 1966-yili oʻrta maktabni tugatib, Nukus Davlat Pedagogika instituti boshlangʻich taʼlim fakultetiga oʻqishga kirdi, oʻqishini 1968-yilda sirtqi boʻlimga aylantirib, hozirgi 35-sonli maktabga ishga kiradi. 1996-yildan 2005-yilgacha boshlangʻich sinflarda oʻquv ishlari boʻyicha direktor oʻrinbosari vazifasida ishlagan. 37 yillik mehnat faoliyati davomida qanchadan-qancha yoshlarga taʼlim-tarbiya berib, 2005-yildan beri farzandlari va nabiralari ardogʻida keksalik gashtini surib kelmoqda.

Zarifboy aka turmush oʻrtogʻi, boshlangʻich sinf oʻqituvchisi Klara opa bilan besh qiz va toʻrt oʻgʻilni tarbiyalab voyaga yetkazdilar. Hozirgi kunda farzandlari oʻzlari tanlagan kasbni egallab, yurtimiz ravnaqiga oʻz hissalarini qoʻshmoqdalar. Qizi Zamira opa esa ota-onasi kasbini tanlab, 69-maktabda yosh avlodga ona tili va adabiyot fanidan dars bermoqda. Men mana shunday insonning, ardoqli ustozning shogirdi ekanligimdan har doim faxrlanib yuraman.

Ustoz! Mana shu maktab partasi sen uchun Vatan, degan oʻgitingiz uchun, “Alifbo”ning ilk harfi –“A” dan boshlab bergan sabogʻingiz, savodxonlik mulkiga yetaklab kirib, undan toʻla-toʻkis bahramand etganingiz, hisob maydonida javlon urishga oʻrgatganingiz, inson qalbini, uning dardini tushunish sirlaridan ogoh etganingiz va boshqa barcha saboqlaringiz uchun sizga ming bora taʼzim, deymiz.

Bogʻbon oʻz niholining mevasini uch yilda koʻrsa, mashaqqatli va sharafli kasb egasi boʻlgan ustoz-murabbiylar oʻz mehnati samarasini oʻn bir yilda koʻradi. Mana shu uzoq masofa oraligʻida ustozlarning mashaqqatli mehnatlari mujassam. Zarifboy aka bizga “Alifbo” bilan birga hayot darsidan ham saboq berganlar.

Hozirgi kunda sinfdoshlarim turli jabhalarda, turli ishda, kimdir oʻqituvchi, biri shifokor, tikuvchi, haydovchi va hokazo, hayotda oʻz oʻrnini topgan insonlardir. Bunda, albatta, ustozimiz Zarifboy aka hamda boshqa oʻqituvchilarning hissasi kattadir.

Men boshlangʻich sinf oʻqituvchimiz Zarifboy aka Asqarovni va 35-sonli maktabda bizga ilm bergan barcha ustozlarimizni, shuningdek, hozirda oʻzim faoliyat koʻrsatayotgan 17-sonli maktab jamoasini 1-oktyabr – Oʻqituvchi va murabbiylar kuni bayrami bilan chin qalbimdan tabriklayman. Ularning mashaqqatli, ammo sharafli ishlarida zafarlar tilayman. Sizning oldingizda hamisha taʼzimdaman, aziz ustozlar!

Inobat RAJABOVA, 17-sonli maktabning

ona tili va adabiyot fani oʻqituvchisi.