ЭРТАНГИ КУНИМИЗГА ИШОНЧИМИЗ МУСТАҲКАМ

Мамлакатимиз тамаддунида буюк ва таниқли инсонлар жуда кўп бўлган. Лекин, улар орасида бутун умрини ўз халқининг келажаги, фаровон турмуши ва тинч - осойишта яшаши учун бағишлаган бир инсон борки, бугун Ўзбекистонда яшовчи ҳар бир фуқаро унинг номини ҳурмат ва эҳтиром билан тилга олади.

Биринчи Президентимиз И.Каримов раҳбарлигида давлатимиз тинчлик ва фаровонлик, дунёда ҳеч кимдан кам бўлмаслик йўлини танлади.

Ҳа, истиқлол шарофати билан амалга оширилган улкан ислоҳотлар муваққат обрў учун эмас, балки асрлар мобайнида эзилган ўзбек миллатини ҳеч кимга қарам бўлмайдиган, доимо қаддини баланд кўтариб яшайдиган, вужуди ва иймон-эътиқоди соғлом, маънавияти юксак, турмуши фаровон ва келажаги буюк халқ сифатида шакллантирди.

Биринчи Президентимиз эртадан кечгача пахта далаларида бола-чақа ва рўзғор ташвишидан бошқасини ўйламайдиган, содда, умидсиз, қашшоқ ҳолатда қолган, боши кулфатдан чиқмаган халқни «Биз ҳеч кимдан кам эмасмиз ва ҳеч қачон кам бўлмаймиз!» деб ишонтира билдилар.

Халқимиз уларга ишонди ва ўз раҳбарига эргашди, ҳар бир соҳада узоқни кўзлаб ишланган ислоҳотлар бошланди. Ўзбекистон қолоқ, иқтисодиёти бир ёқлама ривожланган, пахта якка ҳокимлиги ҳукм сурган ўлкадан саноати жадал тараққий этаётган замонавий қудратли давлатга айланди.

Юртимиз, шаҳар ва қишлоқларимиз тобора гўзал ва обод бўлиб, янги қиёфа касб этди. Аҳолининг турмуш фаровонлиги ошди, халқаро доираларда Ўзбекистоннинг нуфузи баланд бўлди. Таълим-тарбия, илм-фан, соғликни сақлаш, маданият ва санъат, спорт турларини ривожлантиришга қаратилган ислоҳотлар ўтказилди.

Жамиятимизда аёллар, кексалар ва ёшларнинг қадри юксалиб, уларга янада қулай шароит ва имкониятлар яратилди, миллий қадриятларимиз қайта тикланди.

Бутун умри давомида муаллимлик қилиб, эндиликда нафақа гаштини сураётган фахрий устозларимиз билан учрашиб қолдим. Улардан бири қўлларини очиб дуо қилдилар: «Оллоҳим, бизга олдин ҳам, ҳозир ҳам халқпарвар ва жасур Юртбоши берганингга шукурлар бўлсин!»

Олдинига мен бу дуонинг моҳиятини дарров англамадим, лекин иккинчисининг гапларидан сергак тортдим:

- Тўғри айтасиз, бугун одамлар Биринчи Президентимиз Ислом Каримов бошлаб берган бунёдкорлик, элнинг тинчлиги, эзгулик ва яратувчанлик олдингидан ҳам шиддатлироқ кечаётганлигидан, ҳар бир куни янгиликлар, ўсиш-ўзгаришлар билан тўлаётганидан хурсанд. Илоҳим, Президентимиз Шавкат Мирзиёевнинг умрлари узоқ бўлсин, юзга кирсинлар. Мартабалари бундан-да баланд бўлсин!

Қўлларимни дуога очсам, учинчиси сўраб қолдилар:

– Тавба, шу Юртбошимиз ҳеч тиним билмайдилар-да. Оллоҳ қувват берсин, шунча куч-қудратни қайдан олаяптилар-а?

Тўртинчиси унга танбеҳ берди:

– Қаердан бўларди? Сен билан менга ўхшаган оддий одамларнинг меҳри ва дуоларидан-да!

Бизнинг ҳамюртларимиз ўзи табиатан содда ва оқкўнгил, бағри саҳроларидай кенг, ишонувчан ва меҳнаткаш халқ. Улар билан хайрлашар эканман, содда, танти одамларнинг жайдари фалсафасидан кўнглим мамнунлик, шукроналик, ғурур, илиқлик ва хотиржамлик ҳисларига тўлаётганлигини сездим. Зеро, юртимизда яшаётган ҳар бир фуқаронинг бугун кўнгли тинч ва эртанги кунига ишончи мустаҳкам. Негаки, юртда тадбиркорлик, ташаббускорлик ва яратувчанликка кенг йўллар очилган. Уларнинг тафаккури уйғоқ ва руҳлари баланд, боиси ҳар бир оддий фуқаронинг фикри бугун давлат миқёсида инобатга олинмоқда. Фарзандларидан умидлари катта, чунки бизда ёшларга эртанги кунимизнинг истиқболи сифатида қаралмоқда. Санайверсам, тугамайди...

Яхшиси, буни ҳар биримиз қалбимизда, қолаверса, ўз ҳаётимиз мисолида англаб етишимиз ва юртдошларимизга қайта-қайта уқтиришимиз лозим.

Санобар ХЎЖАМУРОДОВА, 40-сонли мактаб директори,

халқ депутатлари туман Кенгаши депутати.