ТОТУВЛИКНИНГ ТОТЛИ МЕВАЛАРИ

Мамлакатимизда 136 та, туманимизда 12 тадан ортиқ миллат вакилларининг бир-бирлари билан туғишганлардай иноқ яшаётганларини кўриб, чексиз қувончларга тўлиб тошамиз.

Агар туманимиз аҳолиси орасига чуқурроқ кириб борсангиз, улар орасида 3-4 ёки ундан ҳам кўпроқ миллатлардан ташкил топган оилаларга дуч келасиз. Булар албатта, мустақиллигимиз туфайли эришган эркинлигимизнинг, бахту саодатимизнинг натижасидир.

Манғит шаҳрининг “Фаровон” маҳалласидаги Муродбой Наримонов оиласи намунали оилалардан ҳисобланади. Қозоқ миллатига мансуб бўлган Муродбойнинг турмуш ўртоғи Моможон Аннамедова туркман қизи. Уларнинг бир келини Айнура Ўрозбоева қозоқ қизи, иккинчи келини Адолат Дармонова эса ўзбек қизи.

Ушбу кўп миллатли оила соҳиби ва соҳибаси 3 ўғил ва 3 қизни тарбиялаб вояга етказишган. Айни кунда уларнинг фарзандлари турли соҳаларда фидокорона меҳнат қилмоқдалар.

Бугунги кунда бу кўп миллатли хонадонда бири-биридан ширин неваралар – 6 ўғил ва 4 қиз камол топаяпти.

– Мен манғитликларга яхши инсон сифатида таниш бўлган туркман миллатига мансуб Ваъдабой Аннамедовнинг қизиман, – дейди Моможон Аннамедова. – Онам ўзбек қизи бўлган. Мен қозоқ йигитга турмушга чиқдим. Унинг онаси эса қорақалпоқ миллатидан.

– Қайнотам ва қайнонам бағри кенг инсонлар, – дейди оиладаги иккинчи келин Адолат Дармонова. – Шу сабабдан ҳам биз қайси миллатга мансуб бўлсак, шу миллатнинг удумларига, урф-одатларига амал қиламиз. Масалан, қайнотамнинг қариндошлари тўй-маъракаларига борсак–қозоқча, қайнонамнинг қариндошлариникига борсак–туркманча, менинг яқинларимникига борсак – албатта, ўзбекча урф-одатларга риоя қиламиз. Биз оилада турли миллатдан бўлишимизга қарамай, бир мақсад йўлида ҳаракат қиламиз.

Биз бу оилада тотувлик туфайли юзага келган ҳамжиҳатликни, бахтли ҳаётни кўриб ҳавасимиз келди.

Алламберган ЖУМАНИЁЗОВ.