TOTUVLIKNING TOTLI MEVALARI

Mamlakatimizda 136 ta, tumanimizda 12 tadan ortiq millat vakillarining bir-birlari bilan tugʻishganlarday inoq yashayotganlarini koʻrib, cheksiz quvonchlarga toʻlib toshamiz.

Agar tumanimiz aholisi orasiga chuqurroq kirib borsangiz, ular orasida 3-4 yoki undan ham koʻproq millatlardan tashkil topgan oilalarga duch kelasiz. Bular albatta, mustaqilligimiz tufayli erishgan erkinligimizning, baxtu saodatimizning natijasidir.

Mangʻit shahrining “Farovon” mahallasidagi Murodboy Narimonov oilasi namunali oilalardan hisoblanadi. Qozoq millatiga mansub boʻlgan Murodboyning turmush oʻrtogʻi Momojon Annamedova turkman qizi. Ularning bir kelini Aynura Oʻrozboyeva qozoq qizi, ikkinchi kelini Adolat Darmonova esa oʻzbek qizi.

Ushbu koʻp millatli oila sohibi va sohibasi 3 oʻgʻil va 3 qizni tarbiyalab voyaga yetkazishgan. Ayni kunda ularning farzandlari turli sohalarda fidokorona mehnat qilmoqdalar.

Bugungi kunda bu koʻp millatli xonadonda biri-biridan shirin nevaralar – 6 oʻgʻil va 4 qiz kamol topayapti.

– Men mangʻitliklarga yaxshi inson sifatida tanish boʻlgan turkman millatiga mansub Vaʼdaboy Annamedovning qiziman, – deydi Momojon Annamedova. – Onam oʻzbek qizi boʻlgan. Men qozoq yigitga turmushga chiqdim. Uning onasi esa qoraqalpoq millatidan.

– Qaynotam va qaynonam bagʻri keng insonlar, – deydi oiladagi ikkinchi kelin Adolat Darmonova. – Shu sababdan ham biz qaysi millatga mansub boʻlsak, shu millatning udumlariga, urf-odatlariga amal qilamiz. Masalan, qaynotamning qarindoshlari toʻy-maʼrakalariga borsak–qozoqcha, qaynonamning qarindoshlarinikiga borsak–turkmancha, mening yaqinlarimnikiga borsak – albatta, oʻzbekcha urf-odatlarga rioya qilamiz. Biz oilada turli millatdan boʻlishimizga qaramay, bir maqsad yoʻlida harakat qilamiz.

Biz bu oilada totuvlik tufayli yuzaga kelgan hamjihatlikni, baxtli hayotni koʻrib havasimiz keldi.

Allambergan JUMANIYoZOV.