Қипчоқда “Оила қадрияти – жамият таянчи” мавзусидаги учрашув ўтказилди

Оила – ҳар бир инсон учун азиз ва қадрдон гўша. Дунёнинг энг машҳур шаҳарлари бўйлаб саёҳатлардан инсон зерикиши мумкин, лекин ўзининг мўъжзагина макони – оиласи бағрида ҳеч қачон зерикмайди. Ана шу макондагина у ҳузур-ҳаловат топади, орзулар оғушада хотиржам яшайди.

Амударё телевидениеси таҳририятининг Ўзбекистон Республикаси Олий Мажлиси ҳузуридаги нодавлат нотижорат ташкилотлари ва фуқаролик жамиятининг бошқа институтларини қўллаб-қувватлаш жамоат фонди томонидан молиялаштирилган “Одобли бола – эр кўрки” лойиҳаси доирасида Қипчоқ овулидаги Амударё агробизнес касб-ҳунар коллежида овул фаоллари бўлган ўқитувчи-мураббийлар ҳамда ўқувчи-ёшлар иштирокида ўтказилган “Оила қадрияти – жамият таянчи” мавзусидаги учрашувда оиланинг инсон ҳаётида нақадар катта аҳамият касб этиши, оила тутумлари ва оила қадриятлари ҳақида иштирокчилар томонидан қизиқарли ва фойдали фикр-мулоҳазалар билдирилди.

Учрашувда Амударё агробизнес касб-ҳунар коллежи директорининг маънавий-маърифий масалалар бўйича ўринбосари Аллаёр Болтабоев кекса авлод вакилларининг оила мустаҳкамлиги, ёш оилаларни қўллаб-қувватлаш борасидаги маҳаллий ва миллий менталитетимизга хос урф-одатлар ҳамда оилалардаги маънавий-маърифий тарбия ҳақида қисқача тўхталиб ўтди.

Шундан сўнг Амударё телевидениеси таҳририятит томонидан амалга оширилаётган “Одобли бола – эл кўрки” лойиҳаси ҳамкори, “Тараққиёт кўзгуси” газетаси махсус мухбири Робия Йўлдошева “Оила қадрияти – жамият кўзгуси” мавзусида маъруза қилди. У ўз маърузасида намунали оилаларнинг, нуроний отахон ва онахонларнинг катта ҳаёт тажрибалари асосида ёш оилаларни, уларда вояга етаётган ёш авлодни миллий урф-одат ва қадриятлар, анъаналарга садоқат руҳида тарбиялаш, ёшларни оилавий ҳаётга тайёрлаш ҳақида, шунингдек эрта турмуш қуриш, қариндошлар никоҳининг  салбий оқибатлари, шунингдек ёшларнинг муомала маданияти, жамоат жойларида, оилада, тўй-маросимларда ўзини тутиши кийиниш маданияти хусусида батафсил тўхталиб, ўз фикрларини ҳаётий мисоллар орқали ифодалаб берди.

- Ҳаётга енгил-елпи қараш кўплаб бахтсизликларга сабаб бўлади, - деди фаол онахонлардан Гулистон Холмуродова. – Мен ҳаёт синовларига дош беролмай, эрта турмуш туфайли ўзини ва чақалоғини эплай олмай қийналган қизларни кўп кўрганман. Ҳатто ўз жонига қасд қилишгача борган қизларимизни биламан. Демак, турмушнинг бемаврид зарбаларига чидаш илмини билмай туриб турмуш қуриш – бу оиладек муқаддас тушунчага ҳурматсизликдир.

-Кўпинча  келинларимиз янги тушган уйда ўзи туғилиб-ўсган оиланинг тартибларини ўрнатишга ҳаракат қилишади, - Амударё агробизнес коллежи кадрлар бўлими бошлиғи Гулора Сафарниёзова ҳам ўз фикрини билдирди. – Бу нотўғри. Келин янги оила тутумларига сабр-тоқат билан мослашиши керак. Агар сабр қилса, янги оила тутумлари унинг учун олтин қоидага айланади. Ана шунда оиласи мустаҳкам заминга эга бўлади.

Учрашувда Қипчоқ овули фаолларидан Нодира Давлатбоева, Амударё агробизнес касб-ҳунар коллежи ўқувчи-ёшларидан Шоирахон Болтабоева ва Шаҳнозахон Янгибоевалар ҳам оила қадриятлари ҳар бир оила аъзоси учун муқаддаслиги ҳақидаги фикр-мулоҳазаларини билдирдилар.

Бўлиб ўтган учрашувда ҳар бир иштирокчи ўзи ва оиласи аъзолари учун ниҳоятда азиз ва муқаддас бўлган ўзбекона тутумлар, ота-оналик ва фарзандлик бурчлари, келинлик, ҳатто куёвлик масъулияти хусусида ўз фикр-мулоҳазаларини билдирдилар.
Учрашув яхши таассуротларга, мунозараларга бой, қизиқарли ўтди.

Робия ЙЎЛДОШЕВА.

(Фото - http://milliytiklanish.uz)