8 май – Қизил Хоч ва Қизил Ярим Ой Халқаро ҳаракати куни “Санитар постлар” мусобақаси – инсонпарварликка давъат этади

Ўзбекистон Қизил Ярим Ой жамияти мамлакатимиз ҳаётида ўзига хос ўринга эга. Жамият ёлғиз қариялар, иккинчи жаҳон уруши фахрийлари, ота-онасиз қолган етим болаларга гуманитар, тиббий ёрдам кўрсатиш, уларни парваришлаш, ижтимоий-гуманитар хизматлар кўрсатиш борасида кўпгина савобли ишларни амалга ошириб келмоқда. Шу боис ҳам мамлакатимиз бўйлаб ҳар йили ноябрь ойининг иккинчи ўн кунлиги Ўзбекистон Қизил Ярим Ой жамияти ҳисоб рақамига маблағ тўплаш хайрия куни деб эълон қилинган. Ушбу хайрия тадбирида Туман тиббиёт бирлашмаси, ДСЭНМ, №39, -11, -17, -61,-35-,73,-15- ва 40- сонли мактаблар ҳамда №40-МТМ, Амударё мелиорация ва сув хўжалиги, Амударё маиший хизмат кўрсатиш касб-ҳунар коллежи, 9-сонли болалар ва мусиқа мактаблари жамоалари фаол иштирок этишади.

Ҳар йили 8 май - Қизил Хоч ва Қизил Ярим Ой жамияти халқаро ҳаракати куни бутун дунёда, шу жумладан туманимизда ҳам кенг нишонланади. Ҳар галгидек бу йил ҳам ушбу санани муносиб нишонлаш мақсадида Қизил Ярим Ой жамияти туман бўлими томонидан тадбир ишлаб чиқилиб, Ёшлар Иттифоқи туман бўлими, туман Тиббиёт бирлашмаси ва ўқув муассасалари билан ҳамкорликда “Санитар постлар” мусобақаси ўтказилди. Мусобақа ўқувчи-ёшларни эркин фикрлаш ва мустақил ҳаракат қилишга ўргатиш, фавқулодда вазиятларда ўзини муҳофаза этиш, атрофидагиларга биринчи ёрдам кўрсатиш, уларни гуманитар (инсонпарварлик) фаолиятига қизиқтириш, беморларни уйда парвариш қилишда шахсий ва жамоат гигенаси қоидаларига амал қилишга ўргатиш мақсадида ташкил этилди.

Жорий йилнинг 28 апрель куни бўлиб ўтган “Санитар постлар” мусобақасининг якуний босқичида 76-сонли мактаб ўқувчилари 1-ўринни, 20-сонли мактаб жамоаси 2-ўринни, 69-мактабнинг ёш санитарлари 3-ўринни эгаллашди.

“Санитар постлар” мусобақасининг 1-,2-,3-ўрин соҳибларига мусобақа ҳомийси – Қизил Ярим Ой жамияти туман бўлимининг фахрий ёрлиқлари ҳамда совғалари топширилди.

Шунингдек, мусобақада фаол иштирок этган 42-сонли ва 16-сонли мактаблар жамоаларига мусобқада фаол иштирок этган 42-сонли ва 16-сонли мактаблар жамоаларига рағбатлантирувчи мукофотлар тақдим этилди. Қизил Хоч ва Қизил Ярим Ой Халқаро ҳаракати куни олдидан ўтказилган ушбу мусобақа ўсиб келаётган ёш авлод қалбида инсонпарварлик, ҳар қандай вазиятда бир-бировни қўллаб-қувватлаш, зарур пайтда тиббий ва инсоний кўмак бериш туйғуларини шакллантиришда муҳим аҳамият касб этади.

Ж.ЯВКАШЕВ, туман Қизил Ярим Ой Жамияти

туман бўлими ижрочи директори.