8-may – Qizil Xoch va Qizil Yarim Oy Xalqaro harakati kuni “Sanitar postlar” musobaqasi – insonparvarlikka davʼat etadi

Oʻzbekiston Qizil Yarim Oy jamiyati mamlakatimiz hayotida oʻziga xos oʻringa ega. Jamiyat yolgʻiz qariyalar, ikkinchi jahon urushi faxriylari, ota-onasiz qolgan yetim bolalarga gumanitar, tibbiy yordam koʻrsatish, ularni parvarishlash, ijtimoiy-gumanitar xizmatlar koʻrsatish borasida koʻpgina savobli ishlarni amalga oshirib kelmoqda. Shu bois ham mamlakatimiz boʻylab har yili noyabr oyining ikkinchi oʻn kunligi Oʻzbekiston Qizil Yarim Oy jamiyati hisob raqamiga mablagʻ toʻplash xayriya kuni deb eʼlon qilingan. Ushbu xayriya tadbirida Tuman tibbiyot birlashmasi, DSENM, №39, -11, -17, -61,-35-,73,-15- va 40- sonli maktablar hamda №40-MTM, Amudaryo melioratsiya va suv xoʻjaligi, Amudaryo maishiy xizmat koʻrsatish kasb-hunar kolleji, 9-sonli bolalar va musiqa maktablari jamoalari faol ishtirok etishadi.

Har yili 8-may - Qizil Xoch va Qizil Yarim Oy jamiyati xalqaro harakati kuni butun dunyoda, shu jumladan tumanimizda ham keng nishonlanadi. Har galgidek bu yil ham ushbu sanani munosib nishonlash maqsadida Qizil Yarim Oy jamiyati tuman boʻlimi tomonidan tadbir ishlab chiqilib, Yoshlar Ittifoqi tuman boʻlimi, tuman Tibbiyot birlashmasi va oʻquv muassasalari bilan hamkorlikda “Sanitar postlar” musobaqasi oʻtkazildi. Musobaqa oʻquvchi-yoshlarni erkin fikrlash va mustaqil harakat qilishga oʻrgatish, favqulodda vaziyatlarda oʻzini muhofaza etish, atrofidagilarga birinchi yordam koʻrsatish, ularni gumanitar (insonparvarlik) faoliyatiga qiziqtirish, bemorlarni uyda parvarish qilishda shaxsiy va jamoat gigenasi qoidalariga amal qilishga oʻrgatish maqsadida tashkil etildi.

Joriy yilning 28-aprel kuni boʻlib oʻtgan “Sanitar postlar” musobaqasining yakuniy bosqichida 76-sonli maktab oʻquvchilari 1-oʻrinni, 20-sonli maktab jamoasi 2-oʻrinni, 69-maktabning yosh sanitarlari 3-oʻrinni egallashdi.

“Sanitar postlar” musobaqasining 1-,2-,3-oʻrin sohiblariga musobaqa homiysi – Qizil Yarim Oy jamiyati tuman boʻlimining faxriy yorliqlari hamda sovgʻalari topshirildi.

Shuningdek, musobaqada faol ishtirok etgan 42-sonli va 16-sonli maktablar jamoalariga musobqada faol ishtirok etgan 42-sonli va 16-sonli maktablar jamoalariga ragʻbatlantiruvchi mukofotlar taqdim etildi. Qizil Xoch va Qizil Yarim Oy Xalqaro harakati kuni oldidan oʻtkazilgan ushbu musobaqa oʻsib kelayotgan yosh avlod qalbida insonparvarlik, har qanday vaziyatda bir-birovni qoʻllab-quvvatlash, zarur paytda tibbiy va insoniy koʻmak berish tuygʻularini shakllantirishda muhim ahamiyat kasb etadi.

J.YaVKAShEV, tuman Qizil Yarim Oy Jamiyati

tuman boʻlimi ijrochi direktori.