ЎҚУВЧИ КАМОЛИДА ҲАР БИР ФАННИНГ ЎЗ ЎРНИ БОР

Таълим муассасалари ўқитувчилари зиммасига ёш авлодга илм-ирфон ўргатиш, тарбиялаш, комил инсонлар қилиб вояга етказишдек масъулиятли вазифалар юкланган. Ҳар бир ўқитувчи мактаб остонасига қадам қўйган мурғак болага ўз фарзандидек дўстона муносабатда бўлмоғи ва таълим-тарбия бермоғи, дарс жараёнида болаларнинг ўзлаштиришини муносиб баҳолаб, яхши сўзлар билан рағбатлантириб бормоғи лозим. Уларга қўйилган нохолис баҳо ё ноўрин танбеҳ боланинг кўнглидаги ўрганишга бўлган иштиёқни сўндириши, устозларига ишончсизликни пайдо қилиши мумкинлигини унутмаслик керак.

Мен 7 йилдан бери 31 сонли мактабда ўқувчиларга география фанидан дарс бериб келаман. Ўз меҳнат фаолиятим давомида аввало ўқувчиларнинг кўнглига йўл топиш – дарс самарадорлигига эришишнинг муҳим шарти эканлигини англаб етдим.

Шунингдек, таълимга жорий этилаётган ислоҳотлар, янгича услублар ҳар бир ўқитувчини эски, қотиб қолган иш услубидан воз кечиб, ижодий изланиб, машғулотларни таъсирчан ва самарали ўтишини тақозо этмоқда.

География – ҳар бир ўқувчига ўзи яшаб турган ҳудуди, Ватанини танишга, дунё мамлакатлари ҳақида билимларни ўрганишга хизмат қилувчи муҳим фанлардан бири бўлганлигидан уни ўқувчиларнинг нечоғлик пухта, яхши ўзлаштиришлари ҳам улкан аҳамиятга эга. Шу фан орқали юртимизнинг жаннатмакон ўлка эканлигини, бундай иқлим, яшаш учун қулай табиий шароит, ерости ва ерусти бойликлари ер куррасининг ҳамма ҳудудларида ҳам мавжуд эмаслигини, дунёнинг кўпгина давлатларида одамлар сувсизликдан, қашшоқликдан қийналиб яшаётганини тушунтириш ўқувчиларда ўз Ватанига муҳаббат ҳиссини кучайтиришга хизмат қилади.

Хулоса қилиб айтганда, умумтаълим мактабларида ўқитилаётган ҳар бир фаннинг, фаолият юритаётган тўгаракларнинг ўқувчиларнинг баркамол бўлиб улғайшиларида муҳим ўрни бор.

Нафиса САФАРБОЕВА, 31-сонли мактаб ўқитувчиси.