КАМАЛАКНИНГ ЕТТИ ЖИЛОСИ
Мактабгача ёшдаги болаларни ҳар томонлама соғлом, эстетик ва жисмоний ривожлантириш ҳамда мактаб таълимига сифатли тайёрлашда мактабгача таълим муассасаси – оила – мактаб – маҳалла ҳамкорлигини кучайтириш мақсадида Жаҳон банкининг "Таълимдаги глобал ҳамкорлик” лойиҳаси доирасида 7 номдаги китоб ва қутидан иборат китоблар тўплами туманимизнинг қишлоқ ҳудудларида яшайдиган ҳамда 3-6 ёшдаги фарзандлари мактабгача таълим муассасалари (МТМ)га қатнамайдиган жами 2957 та оилага бепул тарқатилди.
Китоб ўзбек, қорақалпоқ ва рус тилида бўлиб, эртак ва шеърлардан иборат бадиий адабиётлар ва ота-оналар учун фарзандларини мактабга тайёрлашга мўлжалланган қўлланмалардан иборат:
"Оилада мутолаа қиламиз” деб номланган 1-китобда болаларга китоб ўқиб беришни нимадан бошлаш кераклиги, китоб ўқишни қандай ташкил этиш лозимлиги, болаларни бадиий адабиёт билан таништиришга қўйилган минимал талаблар ўзбек ва рус тилида берилган.
"Китоблар оламига илк саёҳатим” номли 2-китоб оилада ота-оналар ва болалар биргаликда ўқишлари учун мўлжалланган бўлиб, ўзбек халқ эртаклари ва шеърлардан ташкил топган.
"Менинг севимли китобим” деб номланган 3-китоб аввалги китобнинг мантиқий давоми бўлиб, ундан оилада ота-оналар ва болаларнинг биргаликда ўқишлари учун ўзбек ва рус халқ эртаклари ва шеърлари ўрин олган.
4-китоб "Китоблар – менинг дўстларим” деб номланади. Унда оилада ота-оналар ва болаларнинг биргаликда ўқишлари учун дўстлик, меҳр-оқибат, миллатлараро тотувлик ҳақидаги ўзбек ва рус халқ эртаклари, шеърлари ўзбек ва рус тилларида ўрин олган.
"Салом, мактабим” деб номланган 5-китобдаги эртак ва шеърлар болага ҳаёт ҳақида муайян тасаввур бериши билан бирга мустақил фикрлашга, танишган асарлари бўйича хулоса чиқаришга ўргатишга мўлжалланган.
"Оламни ўрганамиз” номли 6-китобдан теварак-атроф ва табиат билан таништирадиган, боланинг илк математик тасаввурларини ривожлантирувчи қизиқарли асарлар, диққатни ва мантиқий тафаккурни ривожлантиришга қаратилган ўйинлар ўрин олган.
"Жаҳон халқлари эртаклари” номли 7-китобга 3-7 ёшли болаларга мўлжалланган дунё халқлари ҳаётига оид 29 та энг сара эртаклар киритилган. Бу китоб турли халқларнинг маданияти, турмуш тарзи ва урф-одатлари ҳақида ҳикоя қилади.
Болаларни мактабга тайёрлаш учун яратилган қўлланмалар ота-оналарга етказиб берилгандан кейин уларнинг фарзандлари билан қандай ишлаши кераклигини ўргатиш, уларга маслаҳатлар бериб туриш орқали кўпдан-кўп натижаларга эришишимиз мумкин бўлади. Чунки камалакнинг етти хил ранги бўлгани каби 7 хил номдаги бу қўлланмалар ҳам болалар дунёсининг шаклланишида жуда катта аҳамият касб этади.
Солия БОБОЖОНОВА,
туман ХТМФМТТЭБ мактабгача таълим муассасалари бўйича услубчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
