KAMALAKNING YeTTI JILOSI
Maktabgacha yoshdagi bolalarni har tomonlama sogʻlom, estetik va jismoniy rivojlantirish hamda maktab taʼlimiga sifatli tayyorlashda maktabgacha taʼlim muassasasi – oila – maktab – mahalla hamkorligini kuchaytirish maqsadida Jahon bankining "Taʼlimdagi global hamkorlik” loyihasi doirasida 7 nomdagi kitob va qutidan iborat kitoblar toʻplami tumanimizning qishloq hududlarida yashaydigan hamda 3-6 yoshdagi farzandlari maktabgacha taʼlim muassasalari (MTM)ga qatnamaydigan jami 2957 ta oilaga bepul tarqatildi.
Kitob oʻzbek, qoraqalpoq va rus tilida boʻlib, ertak va sheʼrlardan iborat badiiy adabiyotlar va ota-onalar uchun farzandlarini maktabga tayyorlashga moʻljallangan qoʻllanmalardan iborat:
"Oilada mutolaa qilamiz” deb nomlangan 1-kitobda bolalarga kitob oʻqib berishni nimadan boshlash kerakligi, kitob oʻqishni qanday tashkil etish lozimligi, bolalarni badiiy adabiyot bilan tanishtirishga qoʻyilgan minimal talablar oʻzbek va rus tilida berilgan.
"Kitoblar olamiga ilk sayohatim” nomli 2-kitob oilada ota-onalar va bolalar birgalikda oʻqishlari uchun moʻljallangan boʻlib, oʻzbek xalq ertaklari va sheʼrlardan tashkil topgan.
"Mening sevimli kitobim” deb nomlangan 3-kitob avvalgi kitobning mantiqiy davomi boʻlib, undan oilada ota-onalar va bolalarning birgalikda oʻqishlari uchun oʻzbek va rus xalq ertaklari va sheʼrlari oʻrin olgan.
4-kitob "Kitoblar – mening doʻstlarim” deb nomlanadi. Unda oilada ota-onalar va bolalarning birgalikda oʻqishlari uchun doʻstlik, mehr-oqibat, millatlararo totuvlik haqidagi oʻzbek va rus xalq ertaklari, sheʼrlari oʻzbek va rus tillarida oʻrin olgan.
"Salom, maktabim” deb nomlangan 5-kitobdagi ertak va sheʼrlar bolaga hayot haqida muayyan tasavvur berishi bilan birga mustaqil fikrlashga, tanishgan asarlari boʻyicha xulosa chiqarishga oʻrgatishga moʻljallangan.
"Olamni oʻrganamiz” nomli 6-kitobdan tevarak-atrof va tabiat bilan tanishtiradigan, bolaning ilk matematik tasavvurlarini rivojlantiruvchi qiziqarli asarlar, diqqatni va mantiqiy tafakkurni rivojlantirishga qaratilgan oʻyinlar oʻrin olgan.
"Jahon xalqlari ertaklari” nomli 7-kitobga 3-7 yoshli bolalarga moʻljallangan dunyo xalqlari hayotiga oid 29 ta eng sara ertaklar kiritilgan. Bu kitob turli xalqlarning madaniyati, turmush tarzi va urf-odatlari haqida hikoya qiladi.
Bolalarni maktabga tayyorlash uchun yaratilgan qoʻllanmalar ota-onalarga yetkazib berilgandan keyin ularning farzandlari bilan qanday ishlashi kerakligini oʻrgatish, ularga maslahatlar berib turish orqali koʻpdan-koʻp natijalarga erishishimiz mumkin boʻladi. Chunki kamalakning yetti xil rangi boʻlgani kabi 7 xil nomdagi bu qoʻllanmalar ham bolalar dunyosining shakllanishida juda katta ahamiyat kasb etadi.
Soliya BOBOJONOVA,
tuman XTMFMTTEB maktabgacha taʼlim muassasalari boʻyicha uslubchisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
