ТИНЧЛИК – ЭНГ УЛУҒ, ЭНГ ОЛИЙ ҚАДРИЯТ

Эл-юрт тинчлиги, оилалар ободлиги, фарзандлар соғломлиги, миллат оналарининг омонлиги ва  хотиржамлиги – буларнинг бари ҳар бир кўнгилнинг ҳаётдан, Ватандан розилигининг энг муҳим шартларидир. Ҳаётини тўкислик, бахт безаб турган халқ энг аввало, мамлакатда тинчлик ҳоким бўлишини истайди, ўз Ватани  тупроғининг топталишини, фарзандларининг  бахтли давронига четдан тош отилишини истамайди!

Минг шукурки, бизнинг халқ ана шундай бахтга мушарраф. Фарзандлар соғ-омон вояга етаётир, оналар кўнгли тинч. Ҳар куни оила аъзоларини бехавотир ўқишга, ишга кузатиб, шодон қарши олаётган оила бекаларининг кўнгиллари хотиржам.

Муҳтарам Президентимиз Ш.М.Мирзиёев раҳбарлигида мамлакатимизда халқимиз бахт-саодати ва келажагини ўзида мужассам этган Қонунларнинг ҳаётга изчил татбиқ этилаётгани, Биринчи Президентимиз И.А.Каримов асос солган тинчликпарвар ички ва ташқи сиёсатни амалга ошириш, дунёда тинчликни таъминлаш тўғрисидаги ташаббусларни дадил кўтариб чиқаётгани халқаро майдонда Ўзбекистон давлатининг нуфузини тобора оширмоқда.

Гап мамлакатимизнинг тинчликпарвар сиёсати ҳақида кетар экан, "Ўзбекистон Республикасининг ташқи сиёсий фаолияти концепциясини тасдиқлаш тўғрисида”ги Ўзбекистон Республикаси Қонуни тинчликни таъминлаш ва кафолатлашда муҳим аҳамиятга эга бўлганини таъкидлаш лозим. Ушбу Қонунга кўра, Ўзбекистон тинчликпарвар сиёсат олиб бориши, ҳеч қандай ҳарбий-сиёсий блокларда иштирок этмаслиги, ҳар қандай давлатлараро тузилма ҳарбий-сиёсий блокка айланган тақдирда ундан чиқиб кетиш ҳуқуқини ўзида сақлаб қолиши аниқ қайд этиб қўйилган.

Қонунга мувофиқ, Ўзбекистон Республикаси ўзининг қўшни давлатлар билан савдо-иқтисодий, маданий ва гуманитар алоқаларини мустаҳкамлайди. Ҳар қандай қуролли зиддиятларга ва танг вазиятларга тортилишининг олдини олиш мақсадида зарур чораларни кўради. Ўз ҳудудида хорижий давлатларнинг ҳарбий блоклари  ва объектлари жойлаштирилишига асло йўл қўймайди. Ўзбекистон Республикасининг Конституциясига, "Мудофаа тўғрисида”ги Қонунга ва мамлакатимиз Қуролли Кучлари Ҳарбий доктринасига асосан чет эллардаги тинчлик ўрнатувчи операцияларда иштирок этмайди. Бу меъёр, қоида ва тамойиллар – халқимизнинг хоҳиш-иродасини ифода этади.

Халқнинг хоҳиш-иродаси – бу халқимизнинг энг улуғ истаги – тинчлик ва омонлик! Бу нафақат халқ истаги, балки энг буюк мақсади, энг тўғри ва қатъий қароридир!

Ўзбекистондек жаннатмакон юртни ўзларига она Ватан қилиб, аҳилликда яшаётган 136 миллат ва элатлар бахт-саодати мужассам бўлган мамлакатимизнинг ички ва ташқи сиёсат соҳасида тутган йўлини Президентимиз Ш.Мирзиёевнинг илк давлат ташрифларини Туркманистон, Қозоғистон ҳамда Тожикистон ва Россия давлатларига амалга ошириб, ишни мазкур давлатлар билан иқтисодий, сиёсий, маданий ва гуманитар алоқаларни янада мустаҳкамлашдан бошлаганидан ҳам англаш мумкин. Бу ташрифлар чоғида Ўзбекистон атрофида мустаҳкам "Фаровонлик камари”ни шакллантириш, ташриф давомида имзоланган, узоқ йилларга мўлжалланган ўзаро иқтисодий ҳамкорлик стратегиясини изчил амалга ошириш орқали қондош ва қардош давлатлар аро дўстлик ҳамда барқарор тинчликни таъминлаш устувор вазифа қилиб белгиланган.

Азалдан бир-бирлари билан ёнма-ён яшаган қозоқ, туркман, тожик, қирғиз ва русийзабон халқларнинг ўзаро аҳил ва тотув яшаб, яхши қўшничилик тамойиллари асосида турли соҳаларда ҳамкорлик қилишларига қулай шароитлар яратиб берилаётгани ўзаро манфаатларни тан олиш ва ҳар қандай масалани ҳал этишда ҳамкорлик принципига амал қилиниши юртимиз атрофида юқорида айтганимиздай, "фаровонлик камари”ни  шакллантириш, пировардида минтақада барқарорликни янада мустаҳкамлаш, халқларимиз учун муносиб турмуш шароитлари яратишга хизмат қилади. Бу эса мамлакатларнинг юқори суръатларда равнақ топишига кенг йўл очади.

Мухтасар қилиб айтганда, жон қадар азиз, ҳаёт қадар ширин энг олий неъмат – тинчлик, тотувлик, омонлик  – халқимиз учун энг олий қадрият. Зотан, энг аввало инсон тинч бўлса, оила, оила тинч бўлса, миллатлар, мамлакат тинч. Бир сўз билан айтганда, тинчлик бор жойда – инсон албатта бахтли бўлади.

ТАҲРИРИЯТ.

(Фото - http://uza.uz)