ИНСОН ҚАДР-ҚИММАТИ ИФОДАСИ
Мен 4 декабрь куни эрта тонгда ҳудудимиздаги 82-сайлов участкасига бориб, Ўзбекистон Республикаси Президенти сайловида қатнашдим, барча сиёсий партиялардан кўрсатилган номзодлар ичида энг муносибига овоз бердим. Шу лаҳзаларни 75 йиллик ҳаётимдаги энг унутилмас лаҳзалар деб биламан. Чунки байрамона безатилган сайлов участкасига эрта тонгданоқ Президент сайловида қатнашадиган фуқаролар, ҳатто кексалар ва имконияти чекланган ногиронларнинг ҳам бу муҳим жараёнда қатнашиш учун ҳам фахр-ифтихор, ҳам ўзгача масъулият билан ошиқиб келаётганининг гувоҳи бўлдим. Шу ўринда аввало сайловга бутун мамлакатимизда қизғин тайёргарлик ишлари олиб борилганини, фуқароларимиз миллий сайлов қонунчилигимиз, қонунчилигимизга янгидан киритилган ўзгартиришлар, Президентликка кўрсатилган номзодларнинг таржимаи ҳоли, сайловолди дастури билан чуқур таништирилганини айтиб ўтиш жоиз.
Шунингдек, сайлов участкаларида сайлов кунида бу муҳим жараённи демократик тамойиллар асосида ўтказиш, сайловда барча сайловчиларнинг эмин-эркин иштирок этиши ва ўз хоҳиш-иродасини эркин билдириши учун зарур шароитлар яратилди.
Менга айниқса, мазкур сайловда сайлов участкасида она ва бола, тиббиёт хоналари, шунингдек, имконияти чекланган фуқаролар учун махсус овоз бериш хонаси ташкил этилганлиги, шунингдек кекса ёшдаги сайловчиларга ҳам улкан эътибор қаратилгани жуда маъқул бўлди. Чунки одам кексайгани сари жисмоний ҳаракати ҳам чекланиб бораверади. Ана шундай ҳолатдаги кексаларнинг ҳам овоз бериши учун қулай имкониятлар яратилгани мамлакатимизда инсон қадр-қиммати юксак эъзозланишининг амалий ифодасидир. Бу юртимизнинг бугунгидай обод ва фаровон ўлкага айланиши учун бутун куч-ғайратини бахшида этиб, кексаликка етган кишиларнинг ҳар бирининг кўнглида шукроналик, давлатимиздан миннатдорлик туйғуларини уйғотиши шабҳасиз.
Мен бугун биринчилардан бўлиб ўзим танлаган муносиб номзодга овоз бердим. Менинг овозим мамлакатимиз, унинг фуқаролари тақдири учун фидойилик кўрсатадиган, тинчлик, осойишталик барқарор бўлмоғи учун курашадиган энг муносиб номзоднинг сайланишига хизмат қилади. Биз келгуси авлодларимиз тақдири учун ҳам масъулмиз.
Саъдулла ХЎЖАНИЁЗОВ,
матбуот фахрийси, Қорақалпоғистонда хизмат кўрсатган журналист.
(Фото - ЎзА)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
