ҚАТЪИЯТЛИ ВА БИЛИМДОН РАҲБАР ЭДИЛАР

Инсон табиат қонунлари, Аллоҳнинг иродаси олдида ҳамиша ожиз. Туманимиз халқи 8 сентябрь куни ўзининг энг фидойи, халқпарвар, қатъиятли фарзандидан жудо бўлди. Кўплар қатори бу жудоликни қабул қилиш мен учун ҳам оғир кечди. Европа халқларида бир ибора бор: "катта шахслар чеккада туғилиб, марказда вафот этади”, деган. Мен Ражапбай Йўлдашевдан раҳбар шахси, одоб-ахлоқи масалаларида ибрат ва сабоқ олган замондош сифатида айтаманки, у Дўрман овулида туғилиб, Республика аҳамиятига молик катта ишларни амалга оширди, эл-юрт фаровонлиги ва ободлиги учун ҳамиша фидойилик қилдилар.

Ражапбай Йўлдашев халқ депутатлари Амударё туман Кенгаши ижроия қўмитаси раисининг ўринбосари, қурилиш ишлари бўйича ўринбосар, биринчи ўринбосар, кейинчалик Нукус тумани ва туманимиз ижроия қўмиталари раиси лавозимларида ишлаган пайтларидан бошлаб ўзининг қатъиятли ва самимий дўстона муносабати билан ҳар биримизнинг кўнглимиздан жой олган эдилар. Ражапбай Йўлдашев Қорақалпоғистон Республикаси Вазирлар Кенгаши раиси, Жўқорғи Кенгес раисининг ўринбосари лавозимларида ишлаган пайтларида ҳам, Қорақалпоғистон Республикаси Жўқорғи Кенгеси депутати сифатида сиёсат майдонида ҳам ўзини аямади. У нафақат қатъиятли раҳбар, балки сиёсий арбоб сифатида ҳам танилган эди. 1990 йилларда у Қорақалпоғистонда миллатлараро можаролар юз беришининг олдини олишда фаол иштирок этди. Фидойилик, қатъиятлилик билан иш юритдилар. Ҳар қандай масалага адолат мезонлари асосида ёндашдилар. Қорақалпоғистоннинг Ўзбекистон Республикаси таркибидаги суверен Республика бўлиши учун ҳисса қўшди. Унинг бу хислати туманимизга раҳбарлик қилган йилларида янада яққол намоён бўлди. Туманимиз у кишининг раҳбарлигида иқтисодий-ижтимоий жиҳатдан энг қолоқ тумандан барча соҳалари равнақ топаётган обод гўшага айланди. Кўз олдимизда юзлаб янги уй-жойлар, тадбиркорлик объектлари қад ростлади. Банкрот ҳолатига тушиб, ишлаб чиқариш тўхтаб қолган корхоналар қайта реконструкция қилинди. Хорижий сармоялар жалб этилиб, "Amudaryotex” хорижий корхонаси, "Asia Silk” шўъба корхонаси, "Қорақалпоққишлоққурилишсервис” МЧЖ каби корхоналар ишга туширилиб, юзлаб амударёлик ёшларни ўз бағрига олди, ўз маҳсулотлари билан жаҳон бозорига чиқди.

Ражапбай Йўлдашев номи билан боғлиқ қилинган эзгу ишларнинг саноғига етиш қийин. Лекин шуни ишонч ва қатъият билан айта оламанки, бу азиз инсоннинг Қорақалпоғистон халқи, Аму эли, амударёликлар учун қилган эзгу ишлари халқимиз дилидан асло ўчмайди.

Аму элининг суюкли фарзанди, билимдон ва қатъиятли раҳбар, халқпарвар инсон Ражапбай Йўлдашев ўзи ҳаётлигида қилган яхши амаллари, эзгу ишлари билан ҳамиша амударёликлар хотирасида яшайверади.

Мавлонберган

ТОЖИБОЕВ,

Қорақалпоғистон Республикасида хизмат кўрсатган тиббиёт ходими.