ДЕҲҚОНГА ЭРК БЕРИЛГАЧ...
Агар аграр тармоқда етакчи кучга айланган фермерлар сўзларига қулоқ солсангиз, соҳадаги юксалишлар, янгиланишлар деҳқонга эрк берилганидан, дея фахр билан гапиришади.
"Юсуфхўжа” фермер хўжалиги раҳбарлигини қўлимга олгач, бунинг маъносини теран англадим.
Ҳа, собиқ иттифоқ даврида узоқ йиллар давомида шаклланган пахта якка-ҳокимлиги, бутун имкониятлар фақат пахта хомашёсини тайёрлашга қаратилиши, озиқ-овқат маҳсулотларининг кўп қисми четдан келтирилиши халқимизнинг тинкасини қуритган эди.
Қолаверса, хусусий мулкнинг таъқиб қилиниб, маъмурий тақсимлашга асосланган партия-давлат бошқарув тизимининг қатъий ҳукмронлиги деҳқоннинг, соҳа мутахассисларининг бунёдкорлик хислатини бўғиб қўйган эди.
Мустақиллик туфайли деҳқон ернинг ҳақиқий эгасига айланди. Меҳнати самарасини ўзи кўради, етиштирилган ҳосилдан манфаатдорлиги юқори. Эндиликда соҳада маъмурий буйруқбозлик эмас, ишга ижодий ёндашув ҳукмрон. Фермер мулкдор сифатида ўз ерига, техникасига ўзи жавобгар, меҳнат ресурсларидан унумли фойдаланади.
Энг муҳими, ерга оқилона муносабат ўрнатилди. Бугунги кунда бир вақтлар оталаримиз бутун қиш давомида машаққатлар билан қазиган ариқ-зовурларни ҳозир қудратли техникалар ҳаш-паш дегунча тозалаб ташлайди.
Яратилган имкониятлардан унумли фойдаланиб, бизнинг "Юсуфхўжа” фермер хўжалигимиз деҳқонлари барча соҳаларда мунтазам режа - топшириқларини адо этиб келишмоқда.
Жорий йилда 52 гектар ерга пахта экиб, сидқидилдан меҳнат қилганимиз боис, далаларимизда мўл ҳосил етилди. Илк ҳосилимизни давлатимиз хирмонига топшира бошладик. 106 тонналик маррани яқин кунлар ичида эгаллаймиз.
Шунингдек, 15 гектар майдондаги ғалладан 38 тонна буғдой, 15 қути ипак қурти парвариш қилиб, 900 кг.дан зиёд пилла етиштириб, режаларимизни адо этдик. 8 гектар майдондаги боғимизда мевалар сероб. 70 бош зотдор қорамоллар ветеринария қоидаларига мувофиқ боқилмоқда. Яқинда 1,20 сотих майдондаги ҳовузда балиқчиликни ҳам ташкил қилдик. Натижада фермер хўжалигимиз аъзоларининг даромади мўл, турмуши обод бўлаётир.
Фермер учун ўз ҳудудини обод қилиб, ўзининг, хўжалигида ишловчиларнинг ҳам оиласи фаровон, дастурхони тўкин бўлишига эришиши жуда муҳим. Менинг хўжалик раҳбари сифатидаги энг муҳим мақсадим ҳам шудир.
Барча соҳаларда янгиланишларга, юксалишларга кенг имкониятлар эшигини очиб берган истиқлолимизнинг 25 йиллиги билан бутун туманимиз халқини қизғин табриклайман!
Шавкат ЯХШИМУРОДОВ,
"Юсуфхўжа” фермер хўжалиги раиси.
(Фото - http://turkistonpress.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
