Танловлар иқтидорлиларни аниқлади

Мустақиллик шарофати билан ўз эрки, дини, тили ва аждодлари яратган бой маънавий меросга қайта эга бўлган халқимиз ўтган 25 йил мобайнида ёш авлод таълим-тарбиясига улкан эътибор қаратди. Кадрлар тайёрлаш ва мактаб таълимини ривожлантириш умуммиллий дастурларининг қабул қилиниб, таълим-тарбия соҳасида эски, қотиб қолган услублардан холи бўлган янги тизимнинг ҳаётга татбиқ этилганлиги бугун янгича фикрлайдиган, Ватанимизнинг келажагини ўз қўлларига олишга қодир бўлган йигит-қизлар камолга етишишига асос бўлди.

Атрофидаги воқеа-ҳодисаларга аниқ, холис муносабатда бўлаоладиган, Ватан тақдирига дахлдорлик ҳисси билан яшайдиган, сиёсий  фаол ва мустаҳкам фуқаролик позициясига эга бўлган ёшларнинг эришаётган ютуқлари, интилишлари бу улкан  мақсад йўлида амалга  оширилган ишлар нечоғлик самарали бўлганлигини кўрсатиб турибди.

Мамлакатимизда амалга оширилаётган ана шундай улуғвор ишларга ҳисса қўшиш мақсадида "Жайхун илҳомлари” нодавлат нотижорат ташкилоти Ўзбекистон Республикаси Олий Мажлиси ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди таъсис этган грант танловида "Юксак маънавиятли авлод – юрт келажаги” номли лойиҳаси билан қатнашиб, ғолиб бўлган эди. Лойиҳанинг мақсади юртимиз ёшларини ҳар томонлама баркамол, маънавий жиҳатдан етук инсонлар қилиб тарбиялашга ҳисса қўшишдан иборат. Ўтган ўн ой давомида ННТ аъзолари лойиҳа режасида кўзда тутилган тадбирларни ўз муддатларида амалга ошириб, ҳамкор ташкилотлар билан биргаликда мактабларда, ўрта махсус, касб-ҳунар таълими муассасаларида учрашувлар, давра суҳбатлари, бадиий кечалар, концерт  дастурлари, кўргазмалар ташкил қилиб, китоб сайллари уюштиришди, ёшлар учун кўчма кутубхона ташкил қилишди ва лойиҳа доирасидаги тадбирларда фаол иштирок этган ёшларни рағбатлантириб, уларнинг ижод намуналарини матбуотда ёритиб боришди ҳамда тўплам кўринишида нашр қилишга ҳозирлик кўрилмоқда.

Ўтган 10 ой мобайнида туманимиз мактаблари ва ўрта махсус, касб-ҳунар таълими муассасаларида ёшлар ўртасида миллий истиқлол ғояси ва маънавият тарғиботига бағишланган "Маънавият кунлари”да 35 та учрашувлар, овул ва маҳалла ёшлари  учун "Кўчма кутубхона” хизматини йўлга қўйиш мақсадида  30 та "Кўчма кутубхона – ёшлар учун” учрашувлари, ёшларни китобхонликка қизиқтириш, ННТ қошида ташкил қилинган кутубхона китобларини таълим муассасалари ёшлари орасида тарғиб қилиш мақсадида "Китобхонлик – маънавият калити” деб номланган 30 та учрашувлар ўтказилди. Миллий истиқлол ғояси тарғиботи ва глобаллашув даврида ёшлар маънавиятини юксалтириш, ёшларни "оммавий маданият”нинг зарарли таъсиридан ҳимоя қилиш мақсадида туманимизда яшаб, ижод қилаётган ёзувчи ва шоирлар, ижодкорлар ва ННТ аъзоларининг аҳоли, хусусан ёшлар, олис қишлоқлар аҳолиси билан 5 та давра суҳбатлари ташкил қилинди.

Шунингдек "Жайхун илҳомлари” ННТнинг турли лойиҳалари ва танловлари иштирокчиларининг ижодий салоҳиятини рўёбга чиқариш, янада самарали ижод қилишларига шароит яратиш, уларни катта саҳналарга олиб чиқиш мақсадида икки марта концерт дастури, икки марта бадиий кеча ва бир кўргазма ташкил этилди. Мактаблар, академик лицей ва касб-ҳунар коллежларининг билимдон ўқувчиларидан иборат "Ёш маънавият тарғиботчилари” гуруҳи тузилиб, ушбу гуруҳ аъзолари иштирокида 3 та давра суҳбатлари ўтказилди. Юртимизнинг бой маданий мероси, шонли ўтмишини ёшларга тушунтириш, уларда тарихимизга ҳурмат, келажакка ишонч туйғуларини мустаҳкамлаш мақсадида ННТ лойиҳаларида фаол иштирок этган ёшларнинг Хива шаҳрига, "Чилпиқ” ва "Гаур қалъа” тарихий ёдгорликларига саёҳатлари уюштирилди. Ёшлар, айниқса чекка қишлоқлар ёшларининг маданий ҳордиқ чиқаришига кўмаклашиш, мақсадида 21-сонли Болалар мусиқа ва санъат мактабида, "Баркамол авлод” болалар марказида ижодкор-ёшларнинг концертлари ташкил қилинди. Ўтказилган тадбирларнинг кўпчилиги, концерт дастурлари тўлалигича "Амударё телевидениеси”да  намойиш этилди.

Булардан ташқари, "Юксак маънавиятли авлод – юрт келажаги” лойиҳаси доирасида иқтидорли ёшларни тарбиялаш, рағбатлантириш ва уларнинг ижодий салоҳиятини рўёбга чиқариш мақсадида бадиий санъат йўналишида "Рангларда Ватан манзаралари”, адабий ижод йўналишида "Биз – баркамол авлод, порлоқ келажак бунёдкорларимиз”,  мусиқа йўналишида "Қўшиғимда Ватан мадҳи” номли танловлар эълон қилинган эди. Уларга туманимиздаги умумтаълим мактаблари, ўрта махсус, касб-ҳунар таълими муассасаларининг ўқувчи-ёшлари ўз ижод намуналари билан қатнашдилар ва энг сара намуналар "Амударё телевидениеси” ва "Тараққиёт кўзгуси”, "Менинг оилам” газеталарида, amunews.uz веб-сайтида ёритиб борилди.

Ҳакамлар ҳайъати мазкур танловларга келган материалларни кўриб чиқиб, ғолибларни аниқлади.

Шундай қилиб, бадиий санъат йўналишида:

1-ўрин – Шамсиддин Бекишбоевга,

2-ўрин – Сардор Худойбергановга,

3-ўрин – Диёрбек Адилбоевга,

адабий ижод йўналишида:

1-ўрин – Света Шомуродовага,

2-ўрин – Озода Тўлибоевага,

3-ўрин – Севара Сидабуллаеваларга,

мусиқа йўналишида:

1-ўрин – 21-сонли Болалар мусиқа ва санъат мактаби тарбияланувчиси Темур Камолов ва "Баркамол авлод”  болалар марказининг "Шўх болалар” жамоасига,

2-ўрин – 21-сонли Болалар мусиқа ва санъат мактаби тарбияланувчиси Достон Тиловмуродов ва "Баркамол авлод”  болалар марказининг "Ёш доирачилар” гуруҳига,

3-ўрин – 21-сонли Болалар мусиқа ва санъат мактаби тарбияланувчиси Маъруф Жуманиёзов ҳамда "Баркамол авлод” болалар марказининг "Ёш журналист ва нотиқ” тўгараги аъзоси Умида Ердошеваларга насиб этди.

Ғолиблар моддий-маънавий рағбатлантирилди.

"Жайхун илҳомлари” нодавлат нотижорат ташкилоти юксак маънавиятли авлодни камол топтиришдек улуғ ишга келгусида ҳам ўз ҳиссасини қўшаверади.

Ойгул РАЖАБОВА,

"Жайхун илҳомлари”

ННТ аъзоси.