ҚУЛАЙЛИКДАН ФОЙДАЛАНИШ ҚОИДАЛАРИ БОР

Уй-рўзғоримизда ишлатиладиган маиший газ баллонлари ўтин-кўмирга нисбатан ҳам арзонлиги, ҳам қулайлиги билан уй бекаларига манзурдир.

Ҳозирги кунда табиий газ босими паст бўлган ҳудудларда сиқилган газ баллонларидан фойдаланилмоқда.

Уй-рўзғор ишларида фойдаланилаётган ҳар бир буюм, айниқса, газ баллонларни ишлатишда ўзига хос қўлланилиши лозим бўлган талаблар, қоидалар борлигини, агар ана шу талаб ҳамда қоидалардан четга чиқилса ёки амал қилинмаса, биз тилга олган ўша қулайликнинг ниҳоятда қимматга тушиши ҳеч гап эмас.

Энг аввало, маиший газ баллонидан фойдаланаётган фуқаро бу қоидани биладими? Агар билса, унга амал қилаяптими?  Бу саволга жавоб топиш мақсадида туман ИИБ ЁХБ ва Сургил газ кони 11-ҳарбийлаштирилган ёнғин хавфсизлиги қисми ходимлари туман газ таъминоти корхонаси  ходимлари билан бирга бир қатор текширишлар ва тушунтириш ишларини олиб боришмоқда. Аввало шуни айтиш лозимки, фуқаролар хонадонларида уй-рўзғор ишларида фойдаланиш учун берилган маиший газ баллонлари техник кўрикдан ўтказилиб, созланган ва фойдаланиш рухсатномасига эга бўлиши, фойдаланиш, муддати тугагач, газ таъминоти корхонасига қайтарилиши, қолаверса, газ баллони сақланадиган жой ёнғин техник талабларига жавоб бериши керак. Оловли ишлар олиб борилаётган жойларда ёки қуёш нури муттасил тушиб, қизиб турадиган жойда маиший газ баллонини сақлаш мумкин эмаслигини ҳар бир фойдаланувчи фуқаро яхши билиши лозим. Гарчанд, булар оддий талаблар бўлса-да, уларга амал қилинмаслиги оғир оқибатларга олиб келади. Инсон ҳаётигагина эмас, атроф-муҳитга ҳам салбий таъсир этиши мумкин.

Б.ЙЎЛДОШЕВ,

Сургил газ конини ёнғиндан муҳофаза қилувчи

11-ҲЁХҚ смена бошлиғи, капитан.

(Фото - http://zarnews.uz)