БИЗ ЁШЛАР – АҚИДАПАРАСТ ОҚИМЛАРГА ҚАРШИМИЗ

Халқимизнинг табиатига мутлақо ёт бўлган диний экстремизм, ақидапарастлик  ва бошқа ёвуз оқимларнинг минтақамизга  кириб келиши ва тарқалиши тинчлик ва осойишталикка, ёшларимизнинг келажагига катта хавф туғдиришини  одамлар онгига чуқур сингдириб бориш – ҳар бир онгли ва қалби уйғоқ инсоннинг зиммасидаги юксак масъулиятдир.

Дин кишиларни ҳамиша яхшиликка, эзгу ишларга чорлаган. Жумладан, ота-боболаримиз муқаддас билиб эътиқод қўйган ислом дини ҳам юксак инсоний фазилатларнинг шаклланишига хизмат қилади. У туфайли халқимиз минг йиллар мобайнида бой исломий маънавияти ва мероси, ўзлигини омон сақлаб келди.

Шу нуқтаи назардан қараганда, одамларнинг эътиқоди ва диний ҳиссиётларидан фойдаланиб, экстремистлар ва террорчилар томонидан ислом байроғи остида содир этилаётган жиноятлар уларнинг асл қиёфасини намоён этмоқда, дейиш мумкин. Айни пайтда, бундай жараёнлар кишиларни доимий огоҳ бўлишга, ҳақиқий диний қадриятларни уларнинг сохта ва ғаразли  талқинларидан фарқлашга  ёрдам берадиган  билимларни эгаллашга ундайди.

Терроризм – жамиятда беқарорлик келтириб чиқариш, аҳолининг кенг қатламларида ваҳима ва қўрқув уйғотишга қаратилган сиёсий курашнинг ўзига хос усулидир. У яширин руҳдаги ташкилотлар томонидан беқарорлик келтириб чиқариш орқали давлат ҳокимиятини эгаллаш мақсадида қўлланилади. Террорчи уюшмалар  оммавий бўла олмагани учун ҳам кўп ҳолларда аҳолининг кенг қатламлари номидан ҳаракат қилиш таассуротини уйғотиш мақсадида диний шиорлардан ниқоб сифатида фойдаланадилар.

Терроризмнинг энг асосий хусусиятларидан бири бундай ҳаракат тарафдорларининг "зўрлик давлатни қулатувчи ва ҳокимиятга эришишни осонлаштурувчи парокандаликка олиб келади”, деган ғояга асосланиб ҳаракат қилишларида яққол кўринади. Терроризмнинг яна бир хусусияти ҳеч қандай уруш бўлмаётган, тинчлик ҳукмронлик қилаётган, жамиятда демократик институтлар фаолият кўрсатаётган бир шароитда муқобил усулларни атайин инкор этган ҳолда, сиёсий масалаларни зўрлик йўли билан ҳал қилишга интилишида кўринади.

Минтақамизда диний экстремизм ва терроризмнинг намоён бўлишининг ўзига хос хусусиятлари, ёшлар ва хотин-қизларнинг бундай кучларнинг асосий нишонига айланиши  сабаблари, ғараз мақсадларда бузиб талқин қилинаётган "ҳалифалик”, "шаҳидлик” каби исломий тушунчаларнинг асл мазмунини англаш, жаҳолатга қарши маърифат билан курашиш бугунги давр талабидир.                        

 Демак, биз ёшлар доимо огоҳ бўлишимиз ва бундай ёт ғояларга алданиб қолмаслигимиз керак. Бунинг учун яхши ўқишимиз ва ҳар кимга ишонмаслигимиз, ота-онамизнинг юзини ёруғ қиладиган комил инсон бўлишимиз лозим.

Пайғамбаримизнинг ҳадисларидан бирида: "икки неъмат борки, кўпчилик одамлар уларнинг қадрига етмайдилар. Улар сиҳат-саломатлик  ва тинчликдир” дейилган.

Шундай тинч юртда яшаётганимиздан, шу юртда ўсиб, улғаяётганимиздан,  шу юртнинг фарзанди бўлганимиздан хурсанд бўлишимиз керак. Ўзбекистон мустақилликка эришгандан кейин қанчадан қанча иншоотлар, кўплаб касб-ҳунар коллежлари, мактаб ва бошқа ўқув ўринлари қуриб битказилди. Айниқса, Юртбошимизнинг биз ёшлар учун жон куйдириб қилаётган фидойиликларига жавобан ватанпарвар ва халқпарвар, мард инсонлар бўлиб вояга етишимиз зарур. Бу – биз ёшларнинг халқ ва Ватан олдидаги энг шарафли фарзандлик бурчимиздир.

Олимжон МУРОДОВ, 

Муҳаммад ибн Аҳмад ал-Беруний номли ўрта махсус ислом билим юрти  2-курс талабаси. 

(Фото - http://slayd.arxiv.uz)