БУГУН БИЗ – ҲАММАМИЗ ПАХТАКОРМИЗ

Миллий бойлигимиз ҳисобланган "оқ олтин” ни экишдан тортиб то ҳосилини йиғиштириб олишгача бўлган жараённи тасаввур қилсак, унинг замирида қанчалик машаққатли меҳнат, мисли кўрилмаган жасорат ва фидойилик намуналари жо бўлганлигини ҳис қиламиз.

Пахта етиштиришдаги оғир ва машаққатли ишлар фақат фермерлар ёки уларга кўмак бераётган пудратчилар томонидангина амалга оширилаётгани йўқ. Бу ишда бутун фаолияти қишлоқ хўжалигини ривожлантириш билан боғлиқ бўлган бир талай ташкилотлар ходимлари ҳам кечани кеча, кундузни кундуз демай фидокорона меҳнат қилишади.

Биз туманимиз пахтакорларининг йиллик шартномавий режаларини барвақт  бажариб, чексиз қувончларга тўлиб-тошаётган бир дамда бу ғалабаларимизга ҳисса қўшган ушбу ташкилотлар раҳбарларини ҳам табриклаб, уларни суҳбатга тортдик.

Бахтиёр Давеков, "Манғит-Назархон” ирригация тизими бошқармаси бошлиғи:

-Сув-ҳаёт манбаи дейишади. Шу боисдан ҳам бу олий неъмат инсонларнинг, ҳайвонот ва ўсимликлар дунёсининг, барча табиат маҳсулининг ҳаётини таъминловчи манба ҳисобланади.

Бизнинг жамоамиз ана шу бебаҳо неъмат - сув ресурсларидан мақсадли ва оқилона фойдаланишни ҳамда сувдан фойдаланиш қонун-қоидаларига риоя этилишини таъминлаш вазифасини амалга оширмоқда. Бу йил пахта далаларини экишдан олдин ва ғўзаларни суғориш даврида сув исрофгарчилигига йўл қўймай, уни тўғри тақсимлаганимиз сабабли ҳар бир фермер хўжалиги даласига меъёрдаги миқдорда сув етказиб берилишига эришилди.

Пахтакорларимизнинг бугунги ғалабасида бизнинг ҳам ҳиссамиз борлигидан фахрланамиз.

Рўзмат Юсупов, "Амударёдавсувмахсуспудрат”давлат унитар корхонаси директори:

-Унитар корхонамиз ташкил этилгандан буён туманимиздаги сув йўллари доимий равишда таъмирланиб, қишлоқ хўжалиги учун сув таъминотини яхшилаш йўлга қўйилди. Шу билан бирга туманимиздаги мавжуд коллекторларда ҳам таъмирлаш, қайта тиклаш ва реконструкция қилиш ишлари амалга оширилаётганлиги боис зах сувлар ка-майиб, экинлар ҳосилдорлигини оширишга эришилмоқда.

Мазкур йилда туманимизда 5 та мелиорация объектида ва 1 та ирригация объектида бир қанча ишлар амалга оширилди. Ирригация объектларида бажарилган иш ҳажми 954 миллион сўмни ташкил этади.

Шунингдек 18,3 километрлик коллекторлар реконструкция қилиниб, унга 2 млрд. 106 млн. сўмлик, яна 3 та объектда 243,5 километрлик коллекторларни таъмирлаш ва тиклаш ишлари амалга оширилиб, уларга 2 млрд. 86 млн. сўмлик маблағ сарф қилинди.

Биз ерларнинг мелиоратив ҳолатини яхшилаш борасида тинимсиз иш олиб боришимиз билан деҳқончиликнинг, асосан пахта ҳосилдорлигининг ошишига ўз ҳиссамизни қўшаётганимиз билан фахрланамиз.

Туманимиз пахтакорларини меҳнат зафарлари билан табриклаймиз!

Янгибой Эшмуратов, "Амударё – агромаштранс МТП” масъулияти чекланган жамияти раиси:

- Бу йилги экиш мавсумига тайёргарлик кўришда бизнинг масъулияти чекланган жамиятимиз меҳнат аҳли ҳам фаол иштирок қилди.

Ўтган йилнинг куз ойлари ва бу йилнинг баҳор ойларида ерларни суриш ишларида 6 та "Магнум- 89-40”сурим тракторларидан ва шунингдек яна 8 та юқори унумли тракторлардан, экиш даврида эса 1 та "Оптима” сеялкасидан фойдаланилди. Бу даврда бизнинг техникаларимиз ёрдамида 3176 гектар ер майдони сифатли ҳайдалиб, 179 миллион 831 минг сўмлик иш бажарилди.

Биз туманимиз фермер хўжаликларига дала ишларида кўмак беришга ҳамиша тайёрмиз.

Туманимиз пахтакорларининг юксак ғалабасида бизнинг ҳам ҳиссамиз борлигидан фахрланамиз.

Меҳнат ғалабаларингиз муборак бўлсин, азиз пахтакорлар!

Илҳом Жуманиёзов, "Элликқалъа нефть базаси” унитар корхонаси Қоратов филиали директори:

- Бизнинг меҳнат жамоамизнинг бу йилги экиш мавсуми бошланишидан тортиб, то пахта ҳосилини йиғиб-териб олиш ишлари бошлангунига қадар ҳар қачонгидан кўпроқ ҳаракат қилишларига тўғри келди. Чунки бу йил табиат инжиқликлари унча сезилмаганлиги боис қишлоқ хўжалигида олиб борилаётган ишларнинг тўхтаб қолиш ҳолатлари сезилмади. Бу эса биздан фермер хўжаликларига тинимсиз равишда ёнилғи-мойлаш материалларини етказиб беришимизни талаб қилди.

Шу боисдан ҳам биз шу кунгача туманимиздаги фермер хўжаликларига жами 3400 тонна дизел ёнилғиси, 85 тонна мойлаш материаллари етказиб беришга муваффақ бўлдик.

Ҳозирги кунда туманимизда 17 жойда фермерларга ёнилғи тарқатиш шохобчаси фаолият кўрсатмоқда. Шунингдек 17 та ёнилғи тарқатиш агрегати, 14 та ёнилғи ташиш машиналари фермер хўжаликларига хизмат кўрсатмоқда.

Амударё туманининг юксак "оқ олтин” хирмони бунёд бўлишида бизнинг ҳам ҳиссамиз борлигидан фахрланамиз.

Улуғбек Бекниёзов, "ҚРҚишлоқхўжаликкимё” ҳудудий АЖ туман филиали мудири:

-Қишлоқ хўжалиги экинларидан мўл ҳосил олишда минерал ўғитларнинг роли жуда катта эканлигини ҳамма ҳам билса керак. Шу боисдан ҳам биз бу йил чигит экилишидан тортиб, то ғўза парвариши якунланишига қадар фермер хўжаликларини ўзлари учун белгиланган миқдордаги минерал ўғитлар билан узлуксиз равишда таъминлашга ҳаракат қилдик.

Ғўза парвариши даврида биз фермер хўжаликларига жами 4214 тонна азотли, 809 тонна фосфорли, 559 тонна калийли ўғит етказиб беришга эришдик.

Шунингдек, 14500 гектар пахта майдонида дефолиация ишла-рини амалга ошириш учун 145 тонна "Уздеф” дефолиантини етказиб бердик. Бу ишларда туманимиз пахта далаларида 46 та ОВХ агрегатларидан унумли фойдаланилди.

Фурсатдан фойдаланиб, пахта-корларимизни юксак маррани эгаллаганликлари билан табриклайман!

Баҳром Бобожонов, туман ўсимликларни ҳимоя қилиш отряди бошлиғи:

- Ғўза зараркунандалари кенг тарқалган мазкур йил бизнинг ўсимликларни ҳимоя қилиш отрядимиз ходимлари учун ҳар қачонгидан ҳам масъулиятли давр бўлди. Шу сабабли биз энг аввало ўсимликларни ҳимоя қилиш бўйича ишчи гуруҳлар тузиб, уларнинг фаолият юритишлари учун барча шароитларни яратиб бердик. Шунингдек тумандаги мавжуд 15 та биолабораториялар зарур ашёлар билан тўлиқ таъминланди. Бу йилги мавсум учун 140 кг. трихограмма, 63,15 млн. дона олтинкўз, 61,9 млн. дона бракон ишлаб чиқарилиб, улардан унумли фойдаланганимиз пахта ҳосилини сақлаб қолишимизда яхши натижаларни берди.

Биз туманимиз пахтакорлари билан ҳамкорликда қилган меҳнатларимиз натижаси – юксак "оқ олтин” хирмонимиз билан барчани муборакбод қиламиз.

Азат Юлдашев, "Амударё пахта тозалаш” АЖ директори:

- Биз бу йилги пахта йиғим-терими мавсумига пухта тайёргарлик кўрганлигимиз сабабли пахта заводимизда ҳам, жойлардаги 6 та пахта қабул қилиш масканларида ҳам пахтани қабул қилиш ишлари бетўхтов амалга оширилмоқда. Уларда меҳнат қилаётган 450 на-фардан зиёд ишчиларга барча шароитлар яратиб берилмоқда.

Заводимизда пахта ҳосилини қабул қилиш, пахтани ғарамлаш ишлари билан биргаликда янги қабул қилинган ҳосилни қайта ишлаш масаласига ҳам алоҳида эътибор берилмоқда. Шу кунгача заводимизда 6000 тонна пахта хом ашёси қайта ишланди.

Туманимиз пахтакорларининг юксак маррани эгаллаганликлари ҳақидаги хушхабар заводимиз меҳнат жамоасини руҳлантириб юборди.

Ғалабангиз муборак, азиз пахтакорлар!

"Тараққиёт кўзгуси” мухбири Алламберган ЖУМАНИЁЗОВ ёзиб олди.

(Фото - http://muloqot.uz)