Амударёда «Ишбилармон аёл – 2026» кўрик-танловининг туман босқичи ғолиблари аниқланди

Мамлакатимиз иқтисодиётининг барқарор ривожланишида хотин-қизларнинг ўрни ва иштироки тобора ортиб бормоқда. Оила фаровонлигини таъминлашдан ташқари, жамиятнинг ижтимоий-иқтисодий ҳаётида ҳам юксак фаоллик кўрсатаётган аёллар ўзларининг тадбиркорлик қобилиятлари билан кўплаб соҳаларда улкан натижаларга эришмоқдалар. Бу борада хотин-қизларнинг бизнес ташаббусларини қўллаб-қувватлаш, уларнинг салоҳиятларини юзага чиқариш ҳамда илғор тажрибаларини оммалаштириш мақсадида мунтазам равишда турли давлат дастурлари, лойиҳалар ва кўрик-танловлар ташкил этиб келинмоқда. Ана шундай кўрик-танлов яқинда Амударё туманида ҳам бўлиб ўтди. Тумандаги хотин-қизларнинг тадбиркорлик салоҳиятини юксалтириш, уларнинг янги ва креатив бизнес ташаббусларини ҳар томонлама қўллаб-қувватлаш ҳамда жамиятда ўз ўрнини топишга интилаётган фаол хотин-қизларни муносиб рағбатлантириш мақсадида Тадбиркорлар ва ишбилармонлар ҳаракати – Ўзбекистон Либерал-демократик партияси Амударё туман Кенгаши ҳамда Амударё тумани Хотин-қизлар қўмитаси ҳамкорлигида «Ишбилармон аёл – 2026» кўрик-танловининг туман босқичи юқори савияда ташкил этилди.

Тадбирда маҳаллий давлат ҳокимияти органлари вакиллари, сиёсий партия фаоллари, соҳа мутахассислари, катта тажрибага эга бўлган тадбиркор аёллар ва кенг жамоатчилик вакиллари иштирок этдилар. Тадбир аввалида Амударё тумани ҳокимининг ўринбосари, туман хотин-қизлар қўмитаси раиси Гўзал Сабурова, партиянинг туман Кенгаши аппарат раҳбари Яхшимурод Аҳмедов ва бошқалар сўзга чиқиб, бугунги кунда аёлларга давлат томонидан яратилаётган кенг имкониятлар, берилаётган имтиёзли кредитлар, субсидиялар ва уларнинг бандлигини таъминлаш борасида жойларда амалга оширилаётган тизимли ишлар ҳақида атрофлича маълумотлар бердилар.

Танлов давомида иштирокчилар ўзларининг тадбиркорлик фаолияти, ишлаб чиқараётган маҳсулотлари, кўрсатаётган хизмат турлари ва келажакка мўлжалланган янги инновацион лойиҳаларини йиғилганлар эътибори тақдим этдилар. Кўргазмали чиқишлар ва тақдимотлар орқали барча иштирокчилар ўз бизнесининг жамият учун қанчалик фойдали эканлигини, қанча янги иш ўринлари яратганини ва маҳсулотларининг бозордаги рақобатбардошлигини исботлашга ҳаракат қилди. Бу жараён малакали мутахассислар ва ташкилотчилардан иборат ҳакамлар ҳайъати томонидан белгиланган мезонлар асосида, яъни маҳсулот сифати, яратилган иш ўринлари сони ва бизнеснинг истиқболлилиги каби муҳим омиллар бўйича холис ва адолатли баҳоланди.

Қизғин ва муросасиз кечган баҳслар, ўзига хос ижодий ва тижорий рақобат муҳитида ўтган танлов якунларига кўра, энг муносиблар ғолиблик шоҳсупасига кўтарилди. Ҳакамлар ҳайъатининг якуний хулосасига кўра, танлов ғолиблигига 2 нафар фаол тадбиркор аёл муносиб кўрилди. Улардан бири – Гулзор маҳалласидан ташриф буюрган Раъно Нурматова ярим тайёр озиқ-овқат маҳсулотлари ишлаб чиқариш йўналишида ўз маҳоратини юқори даражада намойиш этди. Бугунги тезкор замонда аҳолининг сифатли, қулай ва хавфсиз озиқ-овқат маҳсулотларига бўлган талабини қондириш мақсадида йўлга қўйилган ушбу фаолият тури ҳакамлар томонидан алоҳида эътироф этилди.

Шунингдек, Холимбег овули вакили Юлдуз Исмоилова ҳам 1-ўринга лойиқ деб топилди. У миллий қадриятларимизни ўзида мужассам этган, халқимиз турмуш тарзида доимий эҳтиёж сезиладиган кўрпа ва кўрпача тикиш йўналиши бўйича ўзининг ҳунармандчилик намуналари билан барчанинг диққатини тортди.

Танловнинг фахрли 2-ўрни ҳам муносиб эгаларини топди. Боғ маҳалласида ўз бизнесини узоқ вақтдан бери муваффақиятли юритиб келаётган Малика Худайбергенова ҳамда Дурунки маҳалласидан ташриф буюрган Дилором Бердибоевалар ушбу ўринга муносиб кўрилди. Уларнинг маҳаллий хомашёдан яратган маҳсулотлари ва келгусидаги режалари иқтисодий жиҳатдан барқарор ва истиқболли эканлиги алоҳида қайд этилди.

Бундан ташқари, мазкур кўрик-танловда фаол иштирок этган бошқа номзодларнинг фидокорона меҳнатлари ҳам эътибордан четда қолмади. Хусусан, Янгиобод маҳалласи вакили Барно Муродова ҳамда Бўстон маҳалласидан ташриф буюрган Назокат Сафарова каби тадбиркор хотин-қизлар ҳам мусобақада жуда фаол иштирок этиб, ўзларининг оригинал бизнес ғоялари, сифатли маҳсулотлари билан ҳакамлар ҳайъати ва барча қатнашчиларнинг илиқ фикрларига, юқори эътиборига сазовор бўлдилар. Ушбу хотин-қизларнинг барчаси ўз ҳудудида аёллар тадбиркорлигини ривожлантиришда ҳақиқий ибрат намунаси бўлиб, бошқа уй бекаларини ҳам тадбиркорликка жалб этишда ўзига хос мотивация манбаи сифатида хизмат қилмоқда.

Танловда ғолибликни қўлга киритган ва ўзларининг ташаббускорлиги билан ажралиб турган барча фаол иштирокчилар ташкилотчилар томонидан махсус дипломлар ҳамда қимматбаҳо эсдалик совғалари билан тантанали равишда тақдирландилар.

«Ишбилармон аёл – 2026» кўрик-танловининг туман босқичи хотин-қизларнинг тадбиркорлик фаолиятини янада ривожлантириш, уларнинг жамиятдаги иқтисодий ва ижтимоий фаоллигини ошириш, энг асосийси, олис ва чекка ҳудудларда янги иш ўринларини яратиш орқали аҳоли бандлигини таъминлашга хизмат қилиши билан ғоят аҳамиятли бўлди. Бу каби муҳим лойиҳалар ва танловлар келажакда ҳам мунтазам равишда давом этиб, юртимизнинг барча ҳудудларида кўплаб янги ишбилармон аёлларнинг кашф этилишига, уларнинг мамлакат иқтисодиётига қўшаётган улкан ҳиссасининг янада ортишига ҳамда жамиятда хотин-қизлар мавқеининг бундан-да юксалишига мустаҳкам замин яратади.