КОЛЛЕЖ “ШУНҚОРЛАРИ”

Дўрман қишлоқ хўжалик касб-ҳунар коллежида ўқувчи-ёшларнинг ҳар томонлама чуқур билим олишлари учун барча шарт-шароитлар яратиб берилган. Айниқса, ёшларни ҳарбий ватанпарварлик руҳида тарбиялаш, уларнинг ҳарбий соҳага қизиқишларини рўёбга чиқариш борасида коллежда олиб борилаётган ишлар эътиборга лойиқ.

2014-2015 ўқув йилида туманимиздаги академик лицей ва касб-ҳунар коллежлари ўқувчилари ўртасида бўлиб ўтган "Шунқорлар” ҳарбий спорт мусобақасида коллежнинг "Жанговор” жамоаси туманда фахрли 1-ўринни эгаллаб, мазкур беллашувнинг Қорақалпоғистон Республикаси босқичига йўлланма олишганди. Жамоа аъзолари зиммасига бу ютуқ катта масъулият юклади. Республика миқёсидаги беллашувларда барча туманлардан келган "Шунқорлар” жамоаларини енгиб, мутлақ ғолибликни қўлга киритган коллеж ўқувчи-ёшлари беллашувнинг Ўзбекистон Республикаси босқичига устозлари Отамурод Юсупов билан пухта тараддуд кўришди.

Яқинда "Шунқорлар” ҳарбий спорт мусобақасининг Ўзбекистон Республикаси босқичи Жиззах вилоятида кўтаринки руҳда ўтказилди. Мазкур мусобақада мамлакатимизнинг барча вилоятларидан келган ғолиб жамоалар ўзаро куч синашдилар. Кучлиларнинг энг кучлилари иштирок этган мусобақа ғоят қизғин ва таассуротларга бой бўлди. Дўрманлик шунқорлар, яъни "Жанговар” жамоаси аъзолари беллашувнинг финал босқичида фахрли 4-ўрин соҳиби бўлишди ва мусобақа ташкилотчилари томонидан қимматбаҳо совғалар, "Фахрий ёрлиқ”лар билан тақдирланишди.

Жамоанинг Шаҳзод Абдурасулов, Сардор Жуматов, Оғабек Абдуллаев, Оғабек Аминов, Юнусбек Раҳимов, Икромжон Собиров, Жалолиддин Соатов, Дилмурод Давлетов, Жўрабек Бекчонов ҳамда Ортиқбой Раҳимбоев каби аъзолари ўзларининг билимдон ва эпчилликлари билан ҳакамлар ҳайъати аъзоларининг эътибор ва олқишига сазовор бўлишди.

Коллежнинг ҳарбий-спортчи ёшлари албатта, келажакда мустақил Ўзбекистоннинг гуллаб-яшнашига хизмат қиладиган муносиб фарзандлар бўлиб вояга етишларига ишонамиз.

Ҳ.ДАВЛЕТОВА, Дўрман қишлоқ хўжалик

касб-ҳунар коллежининг ҳуқуқий маслаҳатчиси.

(Фото - http://uza.uz)