KOLLEJ “ShUNQORLARI”
Doʻrman qishloq xoʻjalik kasb-hunar kollejida oʻquvchi-yoshlarning har tomonlama chuqur bilim olishlari uchun barcha shart-sharoitlar yaratib berilgan. Ayniqsa, yoshlarni harbiy vatanparvarlik ruhida tarbiyalash, ularning harbiy sohaga qiziqishlarini roʻyobga chiqarish borasida kollejda olib borilayotgan ishlar eʼtiborga loyiq.
2014-2015 oʻquv yilida tumanimizdagi akademik litsey va kasb-hunar kollejlari oʻquvchilari oʻrtasida boʻlib oʻtgan "Shunqorlar” harbiy sport musobaqasida kollejning "Jangovor” jamoasi tumanda faxrli 1-oʻrinni egallab, mazkur bellashuvning Qoraqalpogʻiston Respublikasi bosqichiga yoʻllanma olishgandi. Jamoa aʼzolari zimmasiga bu yutuq katta masʼuliyat yukladi. Respublika miqyosidagi bellashuvlarda barcha tumanlardan kelgan "Shunqorlar” jamoalarini yengib, mutlaq gʻoliblikni qoʻlga kiritgan kollej oʻquvchi-yoshlari bellashuvning Oʻzbekiston Respublikasi bosqichiga ustozlari Otamurod Yusupov bilan puxta taraddud koʻrishdi.
Yaqinda "Shunqorlar” harbiy sport musobaqasining Oʻzbekiston Respublikasi bosqichi Jizzax viloyatida koʻtarinki ruhda oʻtkazildi. Mazkur musobaqada mamlakatimizning barcha viloyatlaridan kelgan gʻolib jamoalar oʻzaro kuch sinashdilar. Kuchlilarning eng kuchlilari ishtirok etgan musobaqa gʻoyat qizgʻin va taassurotlarga boy boʻldi. Doʻrmanlik shunqorlar, yaʼni "Jangovar” jamoasi aʼzolari bellashuvning final bosqichida faxrli 4-oʻrin sohibi boʻlishdi va musobaqa tashkilotchilari tomonidan qimmatbaho sovgʻalar, "Faxriy yorliq”lar bilan taqdirlanishdi.
Jamoaning Shahzod Abdurasulov, Sardor Jumatov, Ogʻabek Abdullayev, Ogʻabek Aminov, Yunusbek Rahimov, Ikromjon Sobirov, Jaloliddin Soatov, Dilmurod Davletov, Joʻrabek Bekchonov hamda Ortiqboy Rahimboyev kabi aʼzolari oʻzlarining bilimdon va epchilliklari bilan hakamlar hayʼati aʼzolarining eʼtibor va olqishiga sazovor boʻlishdi.
Kollejning harbiy-sportchi yoshlari albatta, kelajakda mustaqil Oʻzbekistonning gullab-yashnashiga xizmat qiladigan munosib farzandlar boʻlib voyaga yetishlariga ishonamiz.
H.DAVLETOVA,
Doʻrman qishloq xoʻjalik
kasb-hunar kollejining huquqiy maslahatchisi.
(Foto - http://uza.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
