МАКТАБДА ФУҚАРО МУҲОФАЗАСИ КУНИ

Яқинда 52-сонли мактабда табиий тусдаги фавқулодда вазият, яъни, зилзила содир бўлган пайтда таълим муассасаси ҳудудида мавжуд бўлган одамлар, ўқувчилар ва ўқитувчиларнинг фавқулодда вазиятда ўзини тутиши, ҳаракатланиши, ҳимояланиш ва атрофидагиларга кўмаклашиш, биринчи тиббий ёрдам кўрсатиш, мактаб биноси ва синфхоналаридан ўқувчиларни хавфсиз жойларга олиб ўтиш тартибини тушунтириш мақсадида "Фуқаро муҳофазаси куни” тадбири бўлиб ўтди.

Ўқув машғулотида фуқаро муҳофазаси бошлиғи вазифасини бажарувчи мактаб директори, фуқаро муҳофазаси бошлиғининг эвакуация бўйича ўринбосари, фавқулодда вазиятда тузилган штаб бошлиғи қандай вазифаларни бажариши кераклиги, штаб ҳузурида шакллантирилган қутқарув, ўт ўчириш, санитария, назорат ва жамоат тартибини сақлаш каби гуруҳлар қандай ишларни бажариши лозимлиги амалий машғулотларда кўрсатилди.

"Диққат, ҳаммага, зилзила!” сигналидан кейин мактаб биноси ичкарисидаги барча ўқитувчи ва ўқувчилар зудлик билан белгиланган йўналиш бўйича интизомни сақлаган, ваҳимага берилмаган ҳолда саф бўлиб ташқарига чиқиб, хавфсиз жой саналган мактаб стадионига синфма-синф бўлиб жойлашишди. Синфларда дарс бераётган ўқитувчилар синфдан энг охирида синф журналини олган ҳолда чиқиб, ўқувчиларнинг белгиланган жойга талофатларсиз етиб боришини таъминладилар. Назорат гуруҳи аъзолари бино ичкарисида ҳеч кимнинг қолиб кетмаслигини назорат қилиб турган бўлсалар, қутқарув гуруҳи аъзолари шартли равишда қутқарувга муҳтож фуқароларни хавфли ҳудуддан олиб чиқдилар. Санитарлар гуруҳи биринчи тиббий ёрдамга муҳтожларга ёрдам берди, жамоат тартибини сақлаш гуруҳи аъзолари эса вазиятни мўътадиллаштириб турди.

Ўқув машғулоти жараёнида ўт ўчириш гуруҳи аъзолари ҳам ҳушёр ҳолатда ҳар қандай вазиятга шай турдилар. Машғулотда мактабнинг 5-9- синфлари ўқувчилари ва педагоглар, ишчи ходимлар ва мактаб раҳбарияти қатнашди. Шу куни мактабнинг география фани ўқитувчиси Ўғилжон Матниёзова 5-синф ўқувчиларига "Ер пўстининг ҳаракатлари” мавзусидаги очиқ дарс ўтди.

Бундай ўқув машғулотлари нафақат болаларнинг, балки, катталарнинг ҳам ўз ҳаётларини уйда, кўчада, ишда, таълим муассасаларида важамоат жойларида асрашига ўргатиб бориш, фавқулодда вазиятларда ҳаёт ва соғлиқ учун зарур ҳимоя кўникмаларини шакллантиришга ёрдам бериши билан аҳамиятлидир.

Гулмирза БОБОЖАНОВ, 52-сонли мактаб директорининг маънавият ва маърифат ишлари бўйича ўринбосари, халқ депутатлари туман Кенгаши депутати.

(Фото - http://www.redcrescent.uz)