Профилактика – осойишталик гарови

Мамлакатимизда жиноятчиликка қарши муросасиз курашиш, ҳуқуқбузарликларнинг олдини олиш ва фуқароларнинг ҳуқуқий маданиятини оширишга алоҳида эътибор қаратилмоқда. Айниқса, жойларда ҳуқуқни муҳофаза қилувчи органлар ва маҳаллий ҳокимият вакиллари иштирокида мунтазам равишда ўтказилаётган тарғибот-ташвиқот учрашувлари бу борадаги муҳим механизмлардан бирига айланган.

Шу мақсадда Амударё тумани Торёп маҳалласида жиноятчилик ва ҳуқуқбузарликларнинг олдини олиш, маҳаллада ҳуқуқий маданиятни юксалтириш масалаларига бағишланган очиқ мулоқот бўлиб ўтди. Учрашувда туман ҳокими Собир Хўжаметов, туман прокурори Баҳрам Машарипов, туман Ички ишлар бўлими бошлиғи Мухамметали Хўжамуратов, сектор раҳбарлари, маҳалла фаоллари, ёшлар ва нуронийлар иштирок этди.

Тадбир давомида жиноят ва ҳуқуқбузарликларнинг сабаблари, уларнинг салбий оқибатлари, ёшлар тарбияси, маҳалланинг ижтимоий муҳитини соғломлаштириш бўйича атрофлича фикр алмашилди. Таҳлилларга мурожаат қилинганида, айрим оилаларда ижтимоий назоратнинг етарли эмаслиги, ёшлар орасида ҳуқуқий билим етишмаслиги айрим салбий ҳолатларга сабаб бўлаётгани таъкидланди.

Жараён мобайнида туман ҳокими Собир Хўжаметов жиноят содир бўлганидан кейин ҳаракат қилиш эмас, уни содир этмасликка эришиш муҳим эканлигини, шу боис ҳар бир маҳалла, ҳар бир хонадоннинг ички муҳитини чуқур ўрганиш, профилактик чора-тадбирларни кучайтириш зарур эканлигини таъкидлади.

Учрашув давомида Торёп маҳалласида кузатилаётган муаммолар — ишсизликни камайтириш, аҳоли бандлигини таъминлаш, ёшларнинг бўш вақтларини мазмунли ташкил этиш, аҳолининг ижтимоий ёрдамга муҳтож қатламига кўмаклашиш масалалари кўтарилди. Туман ҳокими Собир Хўжаметов ҳар бир мурожаатни диққат билан тинглаб, масъул раҳбарларга тегишли топшириқлар берди.

Қайд этиш жоизки, маҳалла — жамият кўзгуси, шу сабабли жиноятчиликни камайтириш учун биринчи навбатда маҳалла муҳитини соғломлаштириш, ёшларнинг маънавиятни юксалтириш, уларни спорт ва касб-ҳунар ўрганишга жалб этиш лозим. Бу борада ҳокимлик, прокуратура, ИИБ ва фуқароларнинг биргаликдаги саъй-ҳаракати муҳим аҳамият касб этади.

Йиғилишда маҳалладаги профилактика инспекторининг фаолияти ҳам таҳлил қилиниб, зарур ресурслар билан таъминлаш бўйича тегишли мутасаддиларга топшириқлар берилди. Маҳалла фаоллари, нуронийлар бундай очиқ мулоқотлар маҳалладаги муҳитни ижобий томонга ўзгартиришда муҳим ўрин тутишини қайд этдилар.

Тадбир якунида жиноятчиликнинг олдини олиш, ҳуқуқбузарликларга қарши курашиш ҳар бир фуқаронинг бурчи экани таъкидланиб, барчани огоҳликка, ҳушёрликка, қонунларга ҳурмат билан қарашга даъват этилди.

Чарос Арслонова, туман ҳокимлигининг Ахборот хизмати раҳбари.