Profilaktika – osoyishtalik garovi

Mamlakatimizda jinoyatchilikka qarshi murosasiz kurashish, huquqbuzarliklarning oldini olish va fuqarolarning huquqiy madaniyatini oshirishga alohida eʼtibor qaratilmoqda. Ayniqsa, joylarda huquqni muhofaza qiluvchi organlar va mahalliy hokimiyat vakillari ishtirokida muntazam ravishda oʻtkazilayotgan targʻibot-tashviqot uchrashuvlari bu boradagi muhim mexanizmlardan biriga aylangan.

Shu maqsadda Amudaryo tumani Toryop mahallasida jinoyatchilik va huquqbuzarliklarning oldini olish, mahallada huquqiy madaniyatni yuksaltirish masalalariga bagʻishlangan ochiq muloqot boʻlib oʻtdi. Uchrashuvda tuman hokimi Sobir Xoʻjametov, tuman prokurori Bahram Masharipov, tuman Ichki ishlar boʻlimi boshligʻi Muxammetali Xoʻjamuratov, sektor rahbarlari, mahalla faollari, yoshlar va nuroniylar ishtirok etdi.

Tadbir davomida jinoyat va huquqbuzarliklarning sabablari, ularning salbiy oqibatlari, yoshlar tarbiyasi, mahallaning ijtimoiy muhitini sogʻlomlashtirish boʻyicha atroflicha fikr almashildi. Tahlillarga murojaat qilinganida, ayrim oilalarda ijtimoiy nazoratning yetarli emasligi, yoshlar orasida huquqiy bilim yetishmasligi ayrim salbiy holatlarga sabab boʻlayotgani taʼkidlandi.

Jarayon mobaynida tuman hokimi Sobir Xoʻjametov jinoyat sodir boʻlganidan keyin harakat qilish emas, uni sodir etmaslikka erishish muhim ekanligini, shu bois har bir mahalla, har bir xonadonning ichki muhitini chuqur oʻrganish, profilaktik chora-tadbirlarni kuchaytirish zarur ekanligini taʼkidladi.

Uchrashuv davomida Toryop mahallasida kuzatilayotgan muammolar — ishsizlikni kamaytirish, aholi bandligini taʼminlash, yoshlarning boʻsh vaqtlarini mazmunli tashkil etish, aholining ijtimoiy yordamga muhtoj qatlamiga koʻmaklashish masalalari koʻtarildi. Tuman hokimi Sobir Xoʻjametov har bir murojaatni diqqat bilan tinglab, masʼul rahbarlarga tegishli topshiriqlar berdi.

Qayd etish joizki, mahalla — jamiyat koʻzgusi, shu sababli jinoyatchilikni kamaytirish uchun birinchi navbatda mahalla muhitini sogʻlomlashtirish, yoshlarning maʼnaviyatni yuksaltirish, ularni sport va kasb-hunar oʻrganishga jalb etish lozim. Bu borada hokimlik, prokuratura, IIB va fuqarolarning birgalikdagi saʼy-harakati muhim ahamiyat kasb etadi.

Yigʻilishda mahalladagi profilaktika inspektorining faoliyati ham tahlil qilinib, zarur resurslar bilan taʼminlash boʻyicha tegishli mutasaddilarga topshiriqlar berildi. Mahalla faollari, nuroniylar bunday ochiq muloqotlar mahalladagi muhitni ijobiy tomonga oʻzgartirishda muhim oʻrin tutishini qayd etdilar.

Tadbir yakunida jinoyatchilikning oldini olish, huquqbuzarliklarga qarshi kurashish har bir fuqaroning burchi ekani taʼkidlanib, barchani ogohlikka, hushyorlikka, qonunlarga hurmat bilan qarashga daʼvat etildi.

Charos Arslonova, tuman hokimligining Axborot xizmati rahbari.