ЭНГ БАХТЛИ МАМЛАКАТ ФУҚАРОСИМИЗ
Бу йилги 9 май – Хотира ва қадрлаш куни байрами юртимизда ниҳоятда ҳамжиҳатлик, ўзаро меҳр-оқибат, бурчга садоқат, ота-боболар жасоратига чексиз ҳурмат тамойиллари асосида ўтди.
Мен буни ойнаи жаҳон қаршисида ўтириб, мамлакатимизда инсон омилига, айниқса, ёши улуғ инсонларга кўрсатилаётган эътибор ва эъзозда кўрдим.
Муҳтарам Президентимиз хотира майдонидаги нутқида Иккинчи жаҳон урушининг инсоният бошига ёғдирган мислсиз кулфатлари ҳақида гапирар экан, ўзбек халқининг энг асл ўғлонлари фашизм қурбонига айланганлигини, оналаримиз, фарзандларимиз чеккан азоб-уқубатларни бирма-бир тилга олдилар.
" - Ўзбекистонда ўша пайтда 6,5 миллиондан зиёд аҳоли яшаган бўлса, - деди Юртбошимиз ўз нутқида, - шунинг 1,5 миллиондан кўпроғи урушда қатнашганининг ўзи, қисқа қилиб айтадиган бўлсак, барча эркаклар, мардларимиз қўлига қурол олиб, ягона душманимизга қарши чиққанидан далолат беради.”
Шунингдек, Президентимиз ярим миллиондан зиёд юртдошларимиз бу урушда ҳалок бўлганини, уруш бошиданоқ фронт ҳудудларидан Ўзбекистонга кўчирилган 1 миллионга яқин оила ва болаларни халқимиз бағрига олиб, охирги бир бурда нонини ҳам улар билан баҳам кўрганини, меҳр-мурувват кўрсатганини, миллатлараро тотувлик Ўзбекистонда ҳамиша қадрланишини таъкидладилар.
Ота-боболаримиз бешафқат жанг майдонларида мардлик ва матонат кўрсатгани учун уларнинг 338 нафари Совет Иттифоқи Қаҳрамони унвонига сазовор бўлгани, минглаб юртдошларимиз жанговар орден ва медаллар билан тақдирлангани уларнинг жасоратидан далолатдир.
Менинг қалбимни тўлқинлантирган хушхабардан эса кўзларимдан қувонч ёшлари сизиб чиққанини асло яширмайман. Қаранг, чет эл олимлари ўтказган "Дунёнинг энг бахтли мамлакатлари” мавзусидаги тадқиқот натижаларига кўра, она Ўзбекистонимиз дунёнинг 158 та мамлакати орасида 44-ўринни, МДҲ давлатлари орасида эса фахрли 1-ўринни эгаллаган!
Бир пайтлар собиқ иттифоқ таркибидаги ижтимоий аҳволи ночор, қолоқ давлатлардан бири, деб ҳисобланган она Ўзбекистонимиз истиқлол шарофати, Юртбошимизнинг оқилона сиёсати ва халқимизнинг фидокорона меҳнати туфайли ўша давлатлар орасида энг бахтли мамлакат бўлгани ҳар биримизга ғурур, ифтихор бағишлайди, албатта.
Шу бахтли мамлакатнинг ўттиз миллиондан ортиқ бахтиёр фуқаролари қатори мен ҳам жаннатмакон Ватанда яшаётганимга, инсон меҳнати, қадр-қиммати улуғланган фаровон ҳаётга етишганимга минг-минг шукроналар айтаман. Илоҳо, юртимиздаги тинчлик ва тараққиётга кўз тегмасин!
Иброҳим ИСМОИЛОВ,
халқ таълими фахрийси.
(Фото - http://uza.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
