Ташқи реклама объектлари тартибга солинмоқда
Ташқи реклама ҳар қандай шаҳар ёки ҳудуднинг кўринишига таъсир этувчи муҳим омиллардан бири ҳисобланади. У нафақат тижорат мақсадларида хизмат қилади, балки жамоатчиликка маълумот етказиш, маданий ёки ижтимоий аҳамиятга эга бўлган хабарларни тарқатиш воситаси ҳамдир. Шу боис, ташқи реклама фаолияти қонуний меъёрлар асосида тартибга солиниши жуда муҳим. Бу жараён бозор шаффофлигини таъминлаш, ноқонуний рекламалар тарқалишининг олдини олиш ва тадбиркорлар учун адолатли рақобат муҳитини шакллантиришга хизмат қилади.
Шу кунларда Қорақалпоғистон Республикаси Рақобатни ривожлантириш ва истеъмолчилар ҳуқуқларини ҳимоя қилиш қўмитаси масъуллари ва туман ишчи гуруҳ аъзолари ҳамкорлигида ташқи реклама объектларининг ҳуқуқий жиҳатдан расмийлаштирилиши, реклама матнларининг давлат тили меъёрларига ҳамда одоб-ахлоқ қоидаларига мувофиқлигини таъминлаш, ташқи реклама объектларидан уларнинг тегишли паспортига мувофиқ фойдаланиш бўйича тарғибот ва тушунтириш ишлари амалга оширилмоқда. Қўмита масъуллари томонидан Амударё туманида ҳам шу каби тадбирлар ўтказилди.
Ўзбекистон Республикасининг “Реклама тўғрисида”ги Қонунига кўра, ташқи реклама объектлари белгиланган тартибга мувофиқ жойлаштирилиши керак. Шунингдек, Вазирлар Маҳкамасининг 2023 йил 31 август кунги тегишли қарори асосида “Ташқи реклама” рақамли мониторинг электрон тизими жорий этилди. Бу тизим орқали тадбиркорлар Ягона интерактив давлат хизматлари порталида ташқи реклама объектларини жойлаштириш учун тегишли паспортларни расмийлаштириш имкониятига эга бўлди. Бундай рақамлаштириш тизими реклама соҳасида шаффофликни ошириш, ҳуқуқбузарликларни камайтириш ва тадбиркорлик фаолиятини янада қулайлаштиришга хизмат қилади.
Қорақалпоғистон Республикаси Вазирлар Кенгашининг тегишли қарорига кўра, туманларда ташқи реклама ва ахборот объектларини рўйхатдан ўтказиш, уларнинг қонун талабларига мувофиқ ўрнатилганлигини назорат қилиш тадбирлари доимий равишда олиб борилмоқда. Бу каби тизимли назорат чоралари реклама соҳасининг барқарор ривожланиши, тадбиркорлар ва истеъмолчилар манфаатларининг ҳимоя қилинишига ёрдам беради.
Шунингдек, тадбиркорлар ўз фаолиятларини амалдаги қонунчилик талабларига мувофиқ юритиши, ташқи реклама конструкцияларини белгиланган тартибда расмийлаштириши ҳамда ноқонуний реклама воситаларини ўз вақтида бартараф этиши лозим. Қонунчиликка зид бўлган ташқи реклама материаллари нафақат истеъмолчиларни чалғитиши, балки шаҳар эстетик қиёфасига ҳам салбий таъсир кўрсатиши мумкин.
Бир сўз билан айтганда, ташқи реклама соҳасида қонунийлик, шаффофлик ва ҳалоллик тамойилларига риоя қилиш нафақат давлат ташкилотлари, балки тадбиркорлар учун ҳам муҳим аҳамият касб этади. Бу жараёнда барча манфаатдор томонларнинг ҳамкорлиги самарадорликни оширишга ва ташқи реклама тизимини янада ривожлантиришга хизмат қилади. Зеро, тартибга солинган реклама бозори нафақат тадбиркорлар учун қулай ишбилармонлик муҳитини яратади, балки истеъмолчиларнинг ҳуқуқ ва манфаатларини ҳам ҳимоя қилишга ёрдам беради.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
