Tashqi reklama obʼektlari tartibga solinmoqda
Tashqi reklama har qanday shahar yoki hududning koʻrinishiga taʼsir etuvchi muhim omillardan biri hisoblanadi. U nafaqat tijorat maqsadlarida xizmat qiladi, balki jamoatchilikka maʼlumot yetkazish, madaniy yoki ijtimoiy ahamiyatga ega boʻlgan xabarlarni tarqatish vositasi hamdir. Shu bois, tashqi reklama faoliyati qonuniy meʼyorlar asosida tartibga solinishi juda muhim. Bu jarayon bozor shaffofligini taʼminlash, noqonuniy reklamalar tarqalishining oldini olish va tadbirkorlar uchun adolatli raqobat muhitini shakllantirishga xizmat qiladi.
Shu kunlarda Qoraqalpogʻiston Respublikasi Raqobatni rivojlantirish va isteʼmolchilar huquqlarini himoya qilish qoʻmitasi masʼullari va tuman ishchi guruh aʼzolari hamkorligida tashqi reklama obʼektlarining huquqiy jihatdan rasmiylashtirilishi, reklama matnlarining davlat tili meʼyorlariga hamda odob-axloq qoidalariga muvofiqligini taʼminlash, tashqi reklama obʼektlaridan ularning tegishli pasportiga muvofiq foydalanish boʻyicha targʻibot va tushuntirish ishlari amalga oshirilmoqda. Qoʻmita masʼullari tomonidan Amudaryo tumanida ham shu kabi tadbirlar oʻtkazildi.
Oʻzbekiston Respublikasining “Reklama toʻgʻrisida”gi Qonuniga koʻra, tashqi reklama obʼektlari belgilangan tartibga muvofiq joylashtirilishi kerak. Shuningdek, Vazirlar Mahkamasining 2023-yil 31-avgust kungi tegishli qarori asosida “Tashqi reklama” raqamli monitoring elektron tizimi joriy etildi. Bu tizim orqali tadbirkorlar Yagona interaktiv davlat xizmatlari portalida tashqi reklama obʼektlarini joylashtirish uchun tegishli pasportlarni rasmiylashtirish imkoniyatiga ega boʻldi. Bunday raqamlashtirish tizimi reklama sohasida shaffoflikni oshirish, huquqbuzarliklarni kamaytirish va tadbirkorlik faoliyatini yanada qulaylashtirishga xizmat qiladi.
Qoraqalpogʻiston Respublikasi Vazirlar Kengashining tegishli qaroriga koʻra, tumanlarda tashqi reklama va axborot obʼektlarini roʻyxatdan oʻtkazish, ularning qonun talablariga muvofiq oʻrnatilganligini nazorat qilish tadbirlari doimiy ravishda olib borilmoqda. Bu kabi tizimli nazorat choralari reklama sohasining barqaror rivojlanishi, tadbirkorlar va isteʼmolchilar manfaatlarining himoya qilinishiga yordam beradi.
Shuningdek, tadbirkorlar oʻz faoliyatlarini amaldagi qonunchilik talablariga muvofiq yuritishi, tashqi reklama konstruktsiyalarini belgilangan tartibda rasmiylashtirishi hamda noqonuniy reklama vositalarini oʻz vaqtida bartaraf etishi lozim. Qonunchilikka zid boʻlgan tashqi reklama materiallari nafaqat isteʼmolchilarni chalgʻitishi, balki shahar estetik qiyofasiga ham salbiy taʼsir koʻrsatishi mumkin.
Bir soʻz bilan aytganda, tashqi reklama sohasida qonuniylik, shaffoflik va halollik tamoyillariga rioya qilish nafaqat davlat tashkilotlari, balki tadbirkorlar uchun ham muhim ahamiyat kasb etadi. Bu jarayonda barcha manfaatdor tomonlarning hamkorligi samaradorlikni oshirishga va tashqi reklama tizimini yanada rivojlantirishga xizmat qiladi. Zero, tartibga solingan reklama bozori nafaqat tadbirkorlar uchun qulay ishbilarmonlik muhitini yaratadi, balki isteʼmolchilarning huquq va manfaatlarini ham himoya qilishga yordam beradi.
Shohzod Qurbonboyev
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
