AMUDARYoDA YaNGI IJTIMOIY SOHA OBʼEKTLARI: SIFATLI TAʼLIM VA QULAY ShAROITLAR SARI DADIL QADAM

Bugun Amudaryo tumanida aholining ijtimoiy farovonligini oshirish, yosh avlodning barkamol taʼlim olishi uchun yaratilayotgan imkoniyatlar tobora kengayib bormoqda. Amudaryo tumani hokimligi Axborot xizmati tomonidan tumanda yangi barpo etilgan ijtimoiy soha obʼektlari faoliyati bilan tanishish maqsadida media-tur tashkil etildi.

Mazkur media-turda “Amudaryo” telekanali muxbirlari ham ishtirok etib, joylarda olib borilayotgan bunyodkorlik ishlari, yangi oʻquv maskanlari va bolajonlar uchun yaratilgan shart-sharoitlar bilan yaqindan tanishdilar.

Media-tur ishtirokchilari dastlab Choykoʻl ovulida joylashgan 59-sonli umumtaʼlim maktabi faoliyati bilan tanishdilar. Mazkur taʼlim maskanining 60-oʻrinli eski binosi toʻliq rekonstruktsiya qilinib, unga qoʻshimcha tarzda 180-oʻrinli ikki qavatli yangi bino hamda zamonaviy sport zali qurib bitkazildi.

Bugun maktab binosida barcha sharoitlar yaratilgan, sinfxonalar zamonaviy oʻquv jihozlari bilan toʻliq taʼminlangan, isitish tizimlari yangilangan, oʻquvchilarning bilim olishi uchun qulay muhit yaratilgan. Endilikda choykoʻllik oʻquvchilar zamonaviy, yorugʻ va keng sinfxonalarda taʼlim olish imkoniyatiga ega boʻlishdi. Bu esa ularning bilim va ijodiy salohiyatini oshirishga xizmat qiladi.

Media-tur davomida jurnalistlar Qangli ovulida joylashgan 49-sonli davlat maktabgacha taʼlim tashkiloti faoliyati bilan ham yaqindan tanishdilar. Ushbu taʼlim muassasasi binosi Investitsiya dasturi doirasida 3,5 milliard soʻm mablagʻ evaziga “Jumurtov tex taʼmir servis” MChJ tomonidan qisqa muddatda qurib bitkazilgan.

90-oʻrinli, ikki qavatli zamonaviy bino bolajonlar uchun barcha zarur shart-sharoitlarga ega: keng va yorugʻ guruh xonalari, dam olish maskanlari, oʻyin maydonchalari, oshxona va tibbiyot xonasi namunaviy darajada jihozlangan.

Taʼkidlash joizki, maktabgacha taʼlim — bolaning shaxs sifatida shakllanishida eng muhim bosqich hisoblanadi. Taʼlim sifati va qamrovini oshirish borasidagi islohotlar natijasida bugungi kunda Amudaryo tumanida maktabgacha taʼlim bilan qamrov 75 foizdan oshdi.

Tumanda soʻnggi yillarda oʻnlab yangi taʼlim va ijtimoiy soha obʼektlari bunyod etilib, mavjudlari kapital taʼmirdan chiqarildi. Jumladan, 6 ta yangi maktabgacha taʼlim tashkiloti binolari qurilib, bolajonlar uchun qulay va zamonaviy muhit yaratildi. 31-, 46- va 48-sonli maktablar binolari qayta rekonstruktsiya qilinib, qoʻshimcha ravishda yangi binolar barpo etildi. 59- va 68-sonli umumtaʼlim maktablari binolari esa toʻliq yangidan qurildi. 40-, 67- va 48-sonli maktablarda zamonaviy yopiq sport zallari hamda sport maydonchalari bunyod etildi. Shuningdek, 42-, 35- va 60-sonli maktablarga jami 359 million soʻm mablagʻ hisobiga yangi kompyuter jihozlari xarid qilinib, oʻquv jarayonlari raqamlashtirildi. Ushbu amaliy ishlar tumanda taʼlim sohasining sifat jihatdan yangi bosqichga koʻtarilishiga xizmat qilmoqda.

Bugun taʼlim sohasida yaratilayotgan imkoniyatlar, zamonaviy oʻquv binolari, ilgʻor texnologiyalar asosida jihozlangan sinfxonalar, elektron taʼlim platformalari hamda oʻqituvchilarning malakasini oshirishga qaratilgan tizimli ishlar — barchasi mamlakatimiz kelajagi boʻlgan yoshlarning har tomonlama kamol topishiga zamin yaratmoqda.

Har bir yangi qurilgan yoki taʼmirlangan taʼlim maskani — bu nafaqat gʻishtu tsementdan bunyod etilgan bino, balki yosh avlod tafakkurini yuksaltiruvchi, ularni ijodkorlik, izlanish va mustaqil fikrlashga undovchi muhitdir.

Shubhasiz, ana shunday ezgu islohotlar natijasida Amudaryo tumanida ham taʼlim sifati va samaradorligi yildan-yilga ortib bormoqda. Zamonaviy sharoitlarda tahsil olayotgan yoshlar ertangi kunimizning bilimli, tashabbuskor va vatanparvar farzandlari sifatida jamiyat taraqqiyotiga munosib hissa qoʻshadilar.

Eng muhimi, bugun joylarda amalga oshirilayotgan bu kabi bunyodkorlik ishlari — Prezidentimiz rahnamoligida amalga oshirilayotgan “Inson qadri uchun” tamoyilining amaldagi ifodasidir.

Charos Arslonova, tuman hokimligining Axborot xizmati rahbari.