Аёллар муаммоларини ҳал қилишдаги асосий вазифалар юзасидан семинар бўлиб ўтди
Амударё тумани ҳокимлигининг мажлислар залида маҳаллаларда хотин-қизлар муаммоларини ўрганиш ва “Аёллар дафтари”нинг 6-босқичини сифатли ташкил этиш бўйича “Маҳалла еттилиги” олдида турган устувор вазифаларга бағишланган семинар бўлиб ўтди.
Семинарда Қорақалпоғистон Республикаси Вазирлар Кенгаши Раисининг ўринбосари Марям Аҳмедова, Ўзбекистон Республикаси Касаба уюшмалари Федерациясидан бириктирилган вакил Баҳодир Султанов, туман ҳокими Собир Хўжаметов, секторлар раҳбарлари, ҳоким ўринбосарлари ҳамда “Маҳалла еттилиги” аъзолари иштирок этди.
Семинарда Ўзбекистон Республикаси Вазирлар Маҳкамасининг 2024 йил 10 декабрдаги “Ўзбекистон Республикаси Оила ва хотин-қизлар қўмитаси фаолияти ҳамда “Аёллар дафтари” билан ишлаш тизими такомиллаштирилиши муносабати билан Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш тўғрисида”ги 833-сонли қарори ҳамда Қорақалпоғистон Республикаси Вазирлар Кенгашининг 2024 йил 23 декабрдаги махсус баённомасида белгиланган вазифалар ижроси, шунингдек, маҳаллалардаги хотин-қизлар муаммоларини ўрганиш ва 6-босқич “Аёллар дафтари”ни шакллантириш бўйича амалга оширилиши лозим бўлган вазифалар хусусида сўз юритилди.
Семинарда сўзга чиққанлар сўнгги йилларда мамлакатимизда оилаларни мустаҳкамлаш, хотин-қизларнинг ижтимоий-сиёсий фаоллигини ошириш ҳамда бандлигини таъминлаш, тадбиркорлик кўникмаларини шакллантириш, гендер тенглиги масалаларида кенг кўламли ислоҳотлар амалга оширилганлиги хусусида сўз юритдилар.
Таъкидланганидек, давлатимиз раҳбари томонидан бу борадаги ишларга алоҳида эътибор қаратилиб, амалга оширилиши лозим бўлган устувор вазифалар қатор ҳужжатлар билан мустаҳкамлаб қўйилди. Хусусан, Ўзбекистон Республикаси Президентининг 2023 йил 21 декабрдаги “Оила ва хотин-қизлар қўмитасининг фаолиятини такомиллаштиришга оид қўшимча чора-тадбирлар тўғрисида”ги Фармони, “Оилаларни мустаҳкамлаш ва хотин-қизларнинг фаоллигини ошириш бўйича қўшимча чора-тадбирлар тўғрисида” қарори ҳамда “Ўзбекистон маҳаллалари уюшмаси фаолиятини йўлга қўйиш ва маҳаллаларда бошқарув тизимини такомиллаштиришга оид қўшимча чора-тадбирлар тўғрисида” қарорлари бу борадаги амалий ишларда муҳим дастуруламал бўлмоқда.
Семинар иштирокчилари “Аёллар дафтари”нинг 6-босқичини самарали амалга оширишда “Маҳалла еттилиги”нинг роли ва вазифалари, хотин-қизларнинг муаммоларини аниқлаш ва уларни ҳал қилиш учун қандай чоралар кўриш кераклиги юзасидан ўзаро фикр алмашдилар.
Ушбу семинар “Маҳалла еттилиги” аъзоларининг хотин-қизлар билан ишлаш брасидаги ўрни ва вазифаларини тушунишга, уларнинг муаммоларини ҳал қилишда фаол иштирок этишига туртки бўлиб хизмат қилади.
Чарос Арслонова, туман ҳокимлигининг Ахборот хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
