Амударё туманида энергия ресурслари таъминоти аҳволи ўрганилди

Бугун Янги Ўзбекистонда соҳалар кесимида амалга оширилаётган ислоҳотлар ҳам янгича. Ижтимоий ҳаётимиздаги ҳар бир соҳага янгича нафас, янгича ёндашув ҳамда ана шу соҳаларда ишлаётган ходимлар фаолиятига ҳам кучли масъулият кириб келгандай гўё. Давлатимиз раҳбарининг олиб бораётган одилона сиёсати, амалга оширилаётган самарали ислоҳотлар ҳамда ҳар бир жабҳада ўрнатилган назорат ўзининг ижобий натижаларини бермоқда. Масъулларнинг ўз ишига бўлган масъулияти ва меҳри ортган. “Сен тегмасанг – мен тегмайман” каби қўштирноқ ичидаги ёндашувлар ўтмишда қолиб, мутасаддилар жойларга чиққан ҳолда, ўз вақтида муаммоларни ўрганиб, уларга ечим топмоқдалар.

Қорақалпоғистон Республикаси Прокурорининг ўринбосари Ш.Мухаматов Амударё туманида қиш мавсумини беталафот ўтказиш, жисмоний ва юридик истеъмолчиларни ёқилғи-энергия ресурслари билан узлуксиз таъминлаш, энергия ресурсларини иқтисод қилиш, табиий газ ва электр энергиясидан ноқонуний фойдаланиш ҳолатларини аниқлаш ва уни бартараф этиш бўйича рейд тадбирларини самарали ўтказиш ҳамда туманда тиббиёт соҳасидаги аҳвол, соҳада яратилган шарт-шароитлар билан танишиш мақсадида ташриф буюрди.

Тадбир дастлаб, туман тиббиёт бирлашмасининг тез тиббий ёрдам бўлимини кўздан кечириш, бўлимда беморлар учун яратилган шароитларни ўрганишдан бошланди. Шунингдек, тадбир давомида туман юқумли касалликлар бўлими ва наркология бўлимларига ҳам ташриф буюрилиб, у ердаги аҳвол, яратилган шароитлар ҳамда беморларнинг даволаниш давомийлиги, хоналардаги иссиқлик тизими бўйича ва яна шу каби кўплаб масалалар ўрганилди.

Шундан сўнг, Қорақалпоғистон Республикаси Прокурорининг ўринбосари Ш.Мухаматов томонидан “Ҳудудий электр тармоқлари” акциядорлик жамияти Амударё туман электр таъминоти корхонаси ва “Ҳудудгаз Қорақалпоғистон” акциядорлик жамиятининг Амударё туман газ таъминоти бўлими диспетчерлик хизматлари, мурожаатларни қабул қилиш марказлари фаолияти ҳамда захира омбори ўрганилди. Ўрганишлар давомида энергия ресурсларидан ноқонуний фойдаланиш ҳолатларини, айниқса, йирик талон-тарожликларни аниқлаш юзасидан ишларни жадаллаштириш бўйича аниқ ва манзилли топшириқлар берилди.

Шунингдек, тадбирлар давомида Амударё туман ички ишлар бўлими фаолияти, туман ҳудудида ҳуқуқбузарликлар профилактикаси ва жиноятчиликка қарши кураш борасида амалга оширилаётган ишларнинг бориши ўрганилди. Жумладан, туман ИИБ навбатчилик қисми ва тергов-тезкор гуруҳи фаолияти таҳлил қилиниб, масъулларга тегишли кўрсатмалар берилди. Шу билан бирга, туман ИИБнинг вақтинча сақлаш ҳибсхонасидаги шарт-шароитлар кўздан кечирилди.

Шунингдек, келгусида туманда жиноятчиликка қарши курашиш, унинг барвақт олдини олиш, ҳуқуқбузарликлар профилактикасини тизимли ташкил этиш, жамоатчилик билан алоқаларни кучайтириш, жамоат тартиби ва аҳоли хавфсизлигини таъминлаш борасида амалга оширилиши лозим бўлган чора-тадбирлар белгилаб олинди.

Бундан ташқари, “қизил” тоифага киритилган маҳаллаларга куч ва воситаларни тўғри тақсимлаш орқали, ушбу маҳаллаларда ҳуқуқбузарликлар профилактикаси ва жиноятчиликни жиловлаш бўйича масъулларга тегишли топшириқлар берилиб, ижроси алоҳида назоратга олиниши таъкидланди.

Албатта, бу каби тадбирлар келгусида ўз самарасини бериб, юқорида тилга олинган соҳалардаги мавжуд муаммо ва камчиликлар ўз ечимини топса, ажаб эмас.

Азиза Мадраҳимова