Amudaryo tumanida energiya resurslari taʼminoti ahvoli oʻrganildi

Bugun Yangi Oʻzbekistonda sohalar kesimida amalga oshirilayotgan islohotlar ham yangicha. Ijtimoiy hayotimizdagi har bir sohaga yangicha nafas, yangicha yondashuv hamda ana shu sohalarda ishlayotgan xodimlar faoliyatiga ham kuchli masʼuliyat kirib kelganday goʻyo. Davlatimiz rahbarining olib borayotgan odilona siyosati, amalga oshirilayotgan samarali islohotlar hamda har bir jabhada oʻrnatilgan nazorat oʻzining ijobiy natijalarini bermoqda. Masʼullarning oʻz ishiga boʻlgan masʼuliyati va mehri ortgan. “Sen tegmasang – men tegmayman” kabi qoʻshtirnoq ichidagi yondashuvlar oʻtmishda qolib, mutasaddilar joylarga chiqqan holda, oʻz vaqtida muammolarni oʻrganib, ularga yechim topmoqdalar.

Qoraqalpogʻiston Respublikasi Prokurorining oʻrinbosari Sh.Muxamatov Amudaryo tumanida qish mavsumini betalafot oʻtkazish, jismoniy va yuridik isteʼmolchilarni yoqilgʻi-energiya resurslari bilan uzluksiz taʼminlash, energiya resurslarini iqtisod qilish, tabiiy gaz va elektr energiyasidan noqonuniy foydalanish holatlarini aniqlash va uni bartaraf etish boʻyicha reyd tadbirlarini samarali oʻtkazish hamda tumanda tibbiyot sohasidagi ahvol, sohada yaratilgan shart-sharoitlar bilan tanishish maqsadida tashrif buyurdi.

Tadbir dastlab, tuman tibbiyot birlashmasining tez tibbiy yordam boʻlimini koʻzdan kechirish, boʻlimda bemorlar uchun yaratilgan sharoitlarni oʻrganishdan boshlandi. Shuningdek, tadbir davomida tuman yuqumli kasalliklar boʻlimi va narkologiya boʻlimlariga ham tashrif buyurilib, u yerdagi ahvol, yaratilgan sharoitlar hamda bemorlarning davolanish davomiyligi, xonalardagi issiqlik tizimi boʻyicha va yana shu kabi koʻplab masalalar oʻrganildi.

Shundan soʻng, Qoraqalpogʻiston Respublikasi Prokurorining oʻrinbosari Sh.Muxamatov tomonidan “Hududiy elektr tarmoqlari” aktsiyadorlik jamiyati Amudaryo tuman elektr taʼminoti korxonasi va “Hududgaz Qoraqalpogʻiston” aktsiyadorlik jamiyatining Amudaryo tuman gaz taʼminoti boʻlimi dispetcherlik xizmatlari, murojaatlarni qabul qilish markazlari faoliyati hamda zaxira ombori oʻrganildi. Oʻrganishlar davomida energiya resurslaridan noqonuniy foydalanish holatlarini, ayniqsa, yirik talon-tarojliklarni aniqlash yuzasidan ishlarni jadallashtirish boʻyicha aniq va manzilli topshiriqlar berildi.

Shuningdek, tadbirlar davomida Amudaryo tuman ichki ishlar boʻlimi faoliyati, tuman hududida huquqbuzarliklar profilaktikasi va jinoyatchilikka qarshi kurash borasida amalga oshirilayotgan ishlarning borishi oʻrganildi. Jumladan, tuman IIB navbatchilik qismi va tergov-tezkor guruhi faoliyati tahlil qilinib, masʼullarga tegishli koʻrsatmalar berildi. Shu bilan birga, tuman IIBning vaqtincha saqlash hibsxonasidagi shart-sharoitlar koʻzdan kechirildi.

Shuningdek, kelgusida tumanda jinoyatchilikka qarshi kurashish, uning barvaqt oldini olish, huquqbuzarliklar profilaktikasini tizimli tashkil etish, jamoatchilik bilan aloqalarni kuchaytirish, jamoat tartibi va aholi xavfsizligini taʼminlash borasida amalga oshirilishi lozim boʻlgan chora-tadbirlar belgilab olindi.

Bundan tashqari, “qizil” toifaga kiritilgan mahallalarga kuch va vositalarni toʻgʻri taqsimlash orqali, ushbu mahallalarda huquqbuzarliklar profilaktikasi va jinoyatchilikni jilovlash boʻyicha masʼullarga tegishli topshiriqlar berilib, ijrosi alohida nazoratga olinishi taʼkidlandi.

Albatta, bu kabi tadbirlar kelgusida oʻz samarasini berib, yuqorida tilga olingan sohalardagi mavjud muammo va kamchiliklar oʻz yechimini topsa, ajab emas.

Aziza Madrahimova