Янги йил байрами арафасида “Ёлғиз кекса” реестрига киритилган ҳамда ногиронлиги бўлган юртдошларимиз иштирокида байрам тадбири ташкил этилди

Ўзбекистон Республикаси Президентининг 2023 йил 27 декабрь кунги “Ўзгалар парваришига муҳтож кексалар ва ногиронлиги бўлган шахсларга ижтимоий хизмат кўрсатиш тизимини такомиллаштириш чора-тадбирлари тўғрисида”ги Қарорида белгиланган “Ижтимоий ҳимояга муҳтож кекса ва ногиронлиги бўлган шахсларни қўллаб-қувватлаш тизимини янада такомиллаштириш бўйича “Йўл харитаси”нинг ижроси” ҳамда Ўзбекистон Республикаси Вазирлар Маҳкамасининг 2024 йил 11 март кунги “Ўзгалар парваришига муҳтож шахсларга ижтимоий хизмат ва ёрдам кўрсатишнинг сифат жиҳатидан янги тизимини жорий этиш тўғрисида”ги Қарори ижросини таъминлаш мақсадида Амударё туманида тизимли ишлар амалга оширилмоқда.

Тумандаги “Ёлғиз кекса” реестрига киритилган ўзгалар парваришига муҳтож ёлғиз ва бир ўзи яшовчи кексалар ҳамда ногиронлиги бўлган шахсларнинг ҳолидан хабар олиш, ижтимоий хизматлар кўрсатишдан ташқари, уларнинг ҳаётдан рози яшашларини таъминлашга қаратилган маънавий-маърифий кўнгилочар тадбирлар ўтказишга ҳам алоҳида эътибор қаратилмоқда.

Хусусан, турли байрам саналари муносабати билан саховатпеша тадбиркорларни жалб қилган ҳолда уларнинг маданий тадбирларда иштирокини ташкил қилиш, жумладан мусиқа ва санъат мактабларининг ҳисобот концертлари, театрлардаги спектакллар, турли хил давра суҳбатлари, учрашувлар ва тренингларда қатнашиши учун шароит яратиш, улар иштирокида самимий мулоқот ва адабий-мусиқий дам олиш кечаларини ташкил этишга қаратилган саъй-ҳаракатлар тизимли равишда амалга ошириб келинмоқда.

Ана шундай тадбирлардан бири жорий йилнинг 21 декабрь санасида Амударё тумани “Инсон” ижтимоий хизматлар маркази, туман Маданият бўлими, “Равшанбек Юлдузхон” фирмаси ҳамда “Diamond” ресторани ҳамкорлигида ташкил этилди.

Тадбирда “Нуронийлар” жамғармаси жамоатчилик Кенгаши Амударё тумани бўлими раиси Бекман Аллаберганов, Ўзбекистон Маҳаллалари уюшмаси Амударё тумани бўлими бошлиғи Алишер Юлдашев, “Инсон” ижтимоий хизматлар маркази директори Ғуломжон Дуйсенбоев ҳамда маҳалла тизими фаоллари иштирок этдилар.

Тадбирни нуроний Бекман Аллаберганов очиб берди ва юртимизда амалга оширилаётган ислоҳотлар, кексаларга кўрсатилаётган эътибор ва ғамхўрликлар ҳақида сўзлаб, барчани яқинлашиб келаётган янги – 2025 йил билан муборакбод этди.

Шундан сўнг Ўзбекистон маҳаллалари уюшмаси Амударё туман бўлими бошлиғи Алишер Юлдашев, “Инсон” ижтимоий хизматлар маркази директори Ғуломжон Дуйсенбоевлар ҳам тадбир иштирокчиларига ўзларининг самимий тилакларини билдиришиб, ўтказилаётган тадбирдан мақсад “Ёлғиз кекса” реестрига киритилган, ўзгалар парваришига муҳтож ёлғиз ва ёлғиз яшовчи кексалар ҳамда ногиронлиги бўлган шахсларнинг ижтимоийлашувини таъминлаш, уларнинг жамиятдаги ўрнини мустаҳкамлаш ва ижтимоий жабҳалардаги фаоллигини оширишдан иборат эканини, бу борада яна янги ислоҳотларни амалга ошириш ҳамда кўнгилочар тадбирларни ташкил этиш режалаштирилганлигини алоҳида таъкидлаб ўтдилар.

Тадбир давомида туман маданият бўлими ходимлари томонидан қизиқарли томошалар намойиш этилди. Айниқса, Қудрат Матсафоев бошчилигидаги иллюзион чиқишлар, кўзбойлағич ва масхарабозлик санъатига оид томошалар, бири-биридан ёқимли куй ва қўшиқлар, дилрабо рақслар ижро этилиб, барчага байрамона кайфият бахш этди.

Тадбир якунида иштирокчи кексалар ҳам сўзга чиқиб, давлатимиз томонидан кўрсатилаётган эътибор, ғамхўрлик, инсонни ҳаётдан завқ олиб яшашга рағбатлантирувчи хизматлар ҳамда олиб борилаётган барча ишлардан мамнунликларини билдиришиб, тадбир ташкилотчиларига ўз миннатдорчиликларини изҳор этдилар ва барчани кириб келаётган байрам муносабати билан муборакбод қилдилар.

Янги йил байрами арафасида, файзли дастурхон атрофида ўтказилган тадбир мамлакатимизда инсон қадри ҳамма нарсадан улуғ экани, ҳеч ким давлатимиз ғамхўрлиги ва эътиборидан четда қолмаслиги ҳамда халқимиз учун ўзаро меҳр-оқибат, саховатпешалик азалий қадрият эканлигининг амалий ифодаси бўлди.

Робия Йўлдошева.